(កណ្តាល)៖ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា នាព្រឹកថ្ងៃទី២៧ ខែមេសា ឆ្នាំ២០២៦ នេះ បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ២៣ មានប្រវែង ១៩,៨៣គីឡូម៉ែត្រ (ពីគល់ស្ពានកោះធំ) ស្ថិតក្នុងឃុំជ្រោយតាកែវ ឆ្លងកាត់ឃុំលើកដែក ស្រុកកោះធំ រហូតដល់ឃុំពាមរាំង ស្រុកលើកដែក នៃភូមិសាស្រ្តខេត្តកណ្តាល។

ពិធីនេះក៏មានការចូលរួមពីលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន លោកស្រី យ៉ាសមីន ស៊ីដឌីហ្គី (Ms. YASMIN SIDDIQI) នាយិកាធនាគារអភិវឌ្ឍន៍អាស៊ីប្រចាំព្រះរាជាណាចក្រកម្ពុជា សមាជិក សមាជិកានៃព្រឹទ្ធសភា រដ្ឋសភា និងរាជរដ្ឋាភិបាល អភិបាលខេត្តកណ្តាល លោក លោកស្រី ជាថ្នាក់ដឹកនាំក្រសួង មន្ទីរខេត្ត និងប្រជាពលរដ្ឋជាច្រើនរូបទៀតផងដែរ។

ថ្លែងនាឱកាសនោះលោក ប៉េង ពោធិ៍នា បានបញ្ជាក់ឱ្យដឹងថា កំណាត់ផ្លូវជាតិលេខ២៣នេះ មានប្រវែង ១៩,៨៣គីឡូម៉ែត្រ ចាប់ផ្តើមពីគីឡូម៉ែត្រលេខ ៣៤+៤០០ (ពីគល់ស្ពានកោះធំ) ស្ថិតក្នុងឃុំ ជ្រោយតាកែវ ឆ្លងកាត់ឃុំលើកដែក ស្រុកកោះធំ រហូតដល់ឃុំពាមរាំង ស្រុកលើកដែក (តភ្ជាប់ជាមួយផ្លូវជាតិលេខ១៤) ត្រង់គីឡូម៉ែត្រ លេខ៥៤+២៣៣ នៃភូមិសាស្រ្តខេត្តកណ្តាល។ គម្រោងនេះមានទទឹងតួផ្លូវប្រវែង ១១ម៉ែត្រ ជាប្រភេទផ្លូវក្រាលកៅស៊ូ AC កម្រាស់ ៨សង់ទីម៉ែត្រ មានគន្លងផ្លូវសម្រាប់រថយន្ត និងទោចក្រយានធ្វើចរាចរណ៍ (២គន្លង ទៅមក)។

គម្រោងនេះរួមបញ្ចូលនូវការស្ថាបនាស្ពានចំនួន ៣កន្លែង ប្រវែងសរុប ១១៦,៤០ម៉ែត្រ ការដាក់លូគ្រប់ប្រភេទ កាត់ទទឹងផ្លូវចំនួន ៤៨កន្លែង និងលូតាមប្រឡាយផ្លូវចំនួន ៨កន្លែងប្រវែងសរុប ២ ៣៤២ម៉ែត្រ បំពាក់អំពូលសូឡា LED ចំនួន ៨០កន្លែង ព្រមទាំងការបំពាក់ផ្លាកសញ្ញាគូសគំនូសសញ្ញា ដាំបង្គោលគីឡូម៉ែត្រ និងបង្គោលសុវត្ថិភាពទៅតាមបទដ្ឋានបច្ចេកទេសផ្លូវថ្នល់។ លើសពីនេះគម្រោងនេះ ក៏មានការស្ថាបនារង្វង់មូល ១កន្លែង នៅត្រង់ចំណុចផ្លូវប្រសព្វទិសចុះពីស្ពានកោះធំ ដើម្បីសម្រួល និងបញ្ចៀសទិសដៅចរាចរណ៍ទៅ-មក ប្រកបដោយសុវត្ថិភាពផងដែរ។

ថ្លែងនាឱកាសនោះដែរលោកឧបនាយករដ្ឋមន្រ្តី អូន ព័ន្ធមុនីរ័ត្ន បានបញ្ជាក់ឱ្យដឹងដែរថា ការសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ២៣នេះ បានឆ្លុះបញ្ចាំងឲ្យឃើញច្បាស់ពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការបន្តលើកកម្ពស់ និងពង្រឹងគុណភាពហេដ្ឋារចនាសម្ព័ន្ធរូបវន្តនៅទូទាំងប្រទេសឲ្យបានកាន់តែប្រសើរឡើងជាលំដាប់ ស្របតាមយុទ្ធសាស្ត្របញ្ចកោណដំណាក់កាលទីមួយ ដែលចាត់ទុកផ្លូវជាអាទិភាពគន្លឹះទី២ បន្ទាប់ពីមនុស្សដែលជាអាទិភាពគន្លឹះទី១។

លោកឧបនាយករដ្ឋមន្រ្តី អូន ព័ន្ធមុនីរ័ត្ន បានបន្ថែមថា រាជរដ្ឋាភិបាលក្នុងគ្រប់នីតិកាលតែងតែយកចិត្តចាត់ទុកការអភិវឌ្ឍវិស័យហេដ្ឋារចនាសម្ព័ន្ធ ផ្លូវ ស្ពាន ជាអាទិភាពគន្លឹះ និងជាមធ្យោបាយដ៏មានប្រសិទ្ធភាពក្នុងការរួមចំណែកកាត់បន្ថយភាពក្រីក្ររបស់ប្រជាពលរដ្ឋ ជាពិសេសផ្លូវស្ពាននេះ គឺជាសរសៃឈាមនៃសរីរាង្គសេដ្ឋកិច្ចរបស់ប្រទេស ស្របតាមទិសស្លោកដ៏ពិសិដ្ឋរបស់សម្ដេចតេជោ ហ៊ុន សែន គឺមានផ្លូវ និងស្ពាន មានក្ដីសង្ឃឹម និងមានការអភិវឌ្ឍលើគ្រប់វិស័យ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានបញ្ជាក់ទៀតថា តាមរយៈការសម្ពោធផ្លូវជាតិលេខ២៣នេះ បានរួមចំណែកយ៉ាងសំខាន់ក្នុងការជួយលើកកម្ពស់ជីវភាពរបស់ប្រជាពលរដ្ឋ ជាពិសេសអ្នកស្រុកកោះធំ និងស្រុកលើកដែក តាមរយៈការជួយកាត់បន្ថយពេលវេលាក្នុងការធ្វើដំណើរ និងងាយស្រួលក្នុងការដឹកជញ្ជូនកសិផល និងទំនិញគ្រប់ប្រភេទទៅកាន់ទីផ្សារក្នុងស្រុក និងទៅតំបន់ផ្សេងទៀត។ ជាងនេះទៀតកំណាត់ផ្លូវនេះ ក៏នឹងជួយលើកកម្ពស់សកម្មភាពសេដ្ឋកិច្ច និងពាណិជ្ជកម្មរវាងកម្ពុជា និងវៀតណាម តាមច្រកព្រំដែនសំខាន់ៗដូចជា៖ ច្រកព្រំដែនជ្រៃធំ-ឡុងប៊ិញ តាមរយៈផ្លូវជាតិលេខ២១ និងច្រកព្រំដែនក្អមសំណ-វិញសឿង ហើយក៏បានភ្ជាប់យ៉ាងប្រទាក់ក្រឡាគ្នាជាមួយផ្លូវជាតិ និងតំបន់ទីប្រជុំជនសំខាន់ដទៃទៀតផងដែរ៕