(ភ្នំពេញ)៖ នៅល្ងាចថ្ងៃទី២៦ ខែមេសា ឆ្នាំ២០២៦ ការប្រកួតបាល់ទាត់មិត្តភាព រវាងក្រុមអ្នកសារព័ត៌មាន (វ័យចាស់) និងសមាគមធនាគារនៅកម្ពុជា (ABC) ត្រូវបានរៀបចំឡើងដូចតាមការគ្រោងទុក នៅតារាងបាល់ទាត់ NBC Sports ក្នុងខណ្ឌសែនសុខ រាជធានីភ្នំពេញ ក្នុងគោលបំណងរួមចំណែកលើកស្ទួយវិស័យកីឡា និងរឹតចំណងមិត្តភាពរវាងវិស័យព័ត៌មាន និងវិស័យធនាគារ។

ក្រុមបាល់ទាត់សារព័ត៌មាន ដឹកនាំដោយលោក លឹម ជាវុត្ថា អគ្គនាយកអង្គភាពព័ត៌មាន Fresh News និង មានការចូលរួមពីថ្នាក់ដឹកនាំស្ថាប័នព័ត៌មាន និងអ្នកសារព័ត៌មានជិត ៣០នាក់មកពី ទីភ្នាក់ងារព័ត៌មានជាតិ (AKP), សារព័ត៌មានឌីជីថលថ្មីថ្មី (ThmeyThmey), សារព័ត៌មាន AMS, សារព័ត៌មាន KiriPost, សារព័ត៌មានភ្នំពេញប៉ុស្តិ៍, សារព័ត៌មាន KhmerTime, សារព័ត៌មានកម្ពុជាថ្មី, សារព័ត៌មាន CCTimes ដែលមានអាយុចាប់ពី ៤០ឆ្នាំឡើងទៅ។

សម្រាប់ក្រុមសមាគមធនាគារនៅកម្ពុជា ដឹកនាំដោយលោក រ័ត្ន សោភ័ណ ប្រធានសមាគមធនាគារនៅកម្ពុជា និងជាអគ្គនាយកនាយកប្រតិបត្តិ និង នាយកប្រចាំប្រទេសនៃធនាគារ Maybank (Cambodia) ព្រមជាមួយសមាជិករបស់សមាគម ដែលថ្នាក់ដឹកនាំរបស់ធនាគារនានានៅកម្ពុជា ប្រមាណជាង ៣០រូប ដូចជា ប្រធាននាយកប្រតិបត្តិ Cambodia Post Bank, ប្រធាននាយកប្រតិបត្តិ ធនាគារ FTB, ប្រធាននាយកប្រតិបត្តិ ធនាគារ CIMB, ប្រធាននាយកប្រតិបត្តិ ធនាគារ Bred Bank, ប្រធាននាយកប្រតិបត្តិ ធនាគារ Hattha Bank, ប្រធាននាយកប្រតិបត្តិ ធនាគារ IBank, ប្រធាននាយកប្រតិបត្តិ វិទ្យាស្ថានធនាគារ និងហិរញ្ញវត្ថុ, អនុប្រធាននាយកប្រតិបត្តិជាន់ខ្ពស់ធនាគារ KB Prasac, អនុប្រធាននាយកប្រតិបត្តិជាន់ខ្ពស់ ធនាគារ PPCB Bank, តំណាងមកពីធនាគារ Acleda Bank, ធនាគារ Campu Bank, ធនាគារ J Trust Royal Bank, តំណាងធនាគារ Sathapana Bank និងធនាគារផ្សេងៗទៀត។

ការប្រកួតបាល់ទាត់មិត្តភាពរវាងក្រុមអ្នកសារព័ត៌មាន និងសមាគមធនាគារនៅកម្ពុជា ប្រព្រឹត្តទៅដោយជោគជ័យ ស្ថិតក្នុងបរិយាកាសសប្បាយរីករាយ និងស្និទ្ធស្នាលបំផុត។ ក្នុងការប្រកួតលើវាលស្មៅសប្បនិម្មិត ៣តង់សរុបចំនួន ៩០នាទី កីឡាករទាំងពីរក្រុម បានប្រកួតដោយការយោគយល់ អាធ្យាស្រ័យគ្នាទៅវិញទៅមក។

ក្រុមអ្នកសារព័ត៌មាន (វ័យចាស់) សូមថ្លែងអំណរគុណយ៉ាងជ្រាលជ្រៅ ចំពោះបណ្ឌិត កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) ដែលបានចូលរួមឧបត្ថម្ភ និងទ្រទ្រង់គ្រប់ការប្រកួតរបស់ក្រុមអ្នកសារព័ត៌មាន៕