(ក្រចេះ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានជំរុញលើកទឹកចិត្តដល់ថ្នាក់ដឹកនាំ មន្ត្រី ឃុំពង្រ ស្រុកឆ្លូង ឱ្យបន្តចូលរួមលុបបំបាត់ភាពអសកម្មនៅមូលដ្ឋានដូចជាក្មេងទំនើង ល្បែងស៊ីសង និងគ្រឿងញៀន ជាពិសេសយកចិត្តទុក ដាក់ការផ្តល់សេវាសាធារណៈជូនប្រជាពលរដ្ឋឱ្យបានល្អ និងលុបបំបាត់ភាពថ្នាំងថ្នាក់ទាំងឡាយរបស់ប្រជាពលរដ្ឋមកលើមន្ត្រី។

ការជំរុញលើកទឹកចិត្តនេះធ្វើឡើងក្នុងពេលប្រធានក្រុមការងារ បានអញ្ជើញជួបសំណេះសំណាលជាមួយអាជ្ញាធរដែនដី មន្ត្រីឃុំពង្រ ស្រុកឆ្លូង ខេត្តក្រចេះ នៅព្រឹកថ្ងៃទី២៧ ខែមេសា ឆ្នាំ២០២៦ នាសាលាឃុំពង្រ។

លោករដ្ឋមន្ត្រី នេត្រ ភក្ត្រា បានគូសបញ្ជាក់ថា អាជ្ញាធរមូលដ្ឋាន គឺជាតួអង្គដ៏សំខាន់ ពីព្រោះជាអ្នកនៅជិតប្រជាពលរដ្ឋ ជាអ្នកដឹងច្បាស់នូវសុខទុក្ខ ក្តីកង្វល់ តម្រូវការរបស់ប្រជាពលរដ្ឋ។ ដូច្នេះការផ្តល់សេវាសាធារណៈល្អ ប្រកបដោយគុណភាព និងតម្លាភាពជូនប្រជាពលរដ្ឋគឺជាកត្តាចាំបាច់បំផុតដែលអាជ្ញាធរដែនដីត្រូវធ្វើ។

នៅក្នុងឱកាសនេះដែរ លោករដ្ឋមន្ត្រី នេត្រ ភក្ត្រា បានលើកទឹកចិត្តដល់ថ្នាក់ដឹកនាំ អាជ្ញាធរដែនដីគ្រប់លំដាប់ថ្នាក់ បង្កើនសាមគ្គីភាព ឯកភាពផ្ទៃក្នុង ដោយផ្តោតការយកចិត្តទុកដាក់ចុះមូលដ្ឋាន ដើម្បីជួបប្រជាពលរដ្ឋ សាកសួរសុខទុក្ខ ស្តាប់បញ្ហាប្រឈម និងសំណូមពរ ជួយដល់ប្រជាពលរដ្ឋក្នុងមូលដ្ឋានឱ្យអស់ពីសមត្ថភាព រួមទាំងការផ្តល់សេវាសាធារណៈ និងតម្រូវការចាំបាច់នានារបស់ប្រជាពលរដ្ឋ។

ជាមួយនេះដែរលោករដ្ឋមន្ត្រី នេត្រ ភក្ត្រា បានជំរុញឱ្យអាជ្ញាធរឃុំ បន្តការពង្រឹងសេវាតម្រូវការ និងគោលនយោបាយភូមិ ឃុំ សង្កាត់មានសុវត្ថិភាពដើម្បីធានាបាននូវសុខដុមនីយកម្មក្នុងមូលដ្ឋាន ថែរក្សាការពារសុខសន្តិភាព ជាពិសេសលុបបំបាត់បញ្ហាគ្រឿងញៀន ក្មេងទំនើង
ល្បែងស៊ីសងខុសច្បាប់ និងភាពអសកម្មនានាឱ្យមានប្រសិទ្ធិភាពខ្ពស់៕