ពលរដ្ឋនៅបាត់ដំបង ស្នើអាជ្ញាធរពិនិត្យសកម្មភាពធ្វើរ៉ែមាស ជះក្លិនស្អុយលើប្រជាពលរដ្ឋ
27-04-2026 21:52
(បាត់ដំបង)៖ ប្រជាពលរដ្ឋរស់នៅក្នុងភូមិបន្ទាយចារ ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង បានផ្ញើសារមកកាន់សារព័ត៌មាន Fresh News ស្នើសុំអាជ្ញាធរពាក់ព័ន្ធពិិនិត្យលើសកម្មភាពរ៉ែមាសនៅក្នុងភូមិ កំពុងជះក្លិនស្អុយខ្លាំងរំខានការរស់នៅរបស់ប្រជាពលរដ្ឋ។
ប្រជាពលរដ្ឋដែលផ្ញើសារមកកាន់ Fresh News បានស្នើសុំមិនឱ្យបញ្ចេញអត្តសញ្ញាណនោះទេ ព្រោះខ្លាចប៉ះពាល់ដល់សុវត្ថិភាពរបស់ខ្លួន។ ទន្ទឹមនឹងផ្ញើព័ត៌មាន ប្រភពដែលសុំលាក់អត្តសញ្ញាណរូបនេះ ក៏បានបង្ហាញរូបភាពទីតាំងគេធ្វើរ៉ែមាស ចំនួន៣សន្លឹកមកជាមួយផងដែរ។
ប្រភពបានសរសេររៀបរាប់យ៉ាងដូច្នេះ «នេះជាសកម្មភាពចម្រាញ់មាសខុសច្បាប់ ដែលប្រព្រឹត្តឡើងនៅចំណុចភូមិចាស់ ស្ថិតក្នុងភូមិបន្ទាយចារ ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង។ សកម្មភាពនេះប្រព្រឹត្តឡើងជាង ៣ខែហើយ ដោយឈ្មោះ ភិន ជី ត្រូវជាបងប្រុសអនុភូមិបន្ទាយចារ ឈ្មោះ ភិន ជីប។ សកម្មភាពនេះ ធ្វើដោយកូនប្រុសលោក ភិន ជី ឈ្មោះ សម្បត្តិ ជាអ្នកដឹកជញ្ជូនរ៉ែមាសដែលជីករកបាន មកធ្វើការចម្រាញ់កណ្តាលភូមិតែម្ដង ដែលវាជះក្លិនស្អុយខ្លាំង និងធ្វើឱ្យមាន់ទា និងគោ នៅផ្ទះជាប់នោះងាប់ជាបណ្តើរៗ»។
ប្រភពបានបញ្ជាក់ទៀតថា កាលពីពេលចូលឆ្នាំខ្មែរថ្ងៃទី២ ក្លិនស្អុយខ្លាំងចេញពីកន្លែងចម្រាញ់ ធ្វើឱ្យក្មេងៗថប់ដង្ហើម រត់ទៅនៅដើមភូមិ នៅពីលើខ្យល់) ដើម្បីគេចពីក្លិន។
ប្រភពបានបន្តទៀតថា គ្មានអ្នកភូមិហ៊ាននិយាយអ្វីពីសកម្មភាពចម្រាញ់រ៉ែនេះឡើយ ដោយគេត្រូវដងត្រូវផ្លែជាមួយអាជ្ញាធរមូលដ្ឋាន និងអាជ្ញាធរស្រុករួចអស់ហើយ។
អ្វីដែលប្រជាពលរដ្ឋបានផ្តល់មកនេះ Fresh News មិនទាន់បានបញ្ជាក់ពីអាជ្ញាធរនៅឡើយនោះទេ ព្រោះសារទទួលបានយប់ជ្រៅទៅហើយ។
សង្ឃឹមថា អាជ្ញាធរពាក់ព័ន្ធនឹងចុះពិនិត្យទីតាំងខាងលើ ដើម្បីពិនិត្យថា តើសកម្មភាពធ្វើរ៉ែមាសនោះមានច្បាប់ទម្លាប់ដែរទេ? តើពិតជាបានជះក្លិយស្អុយរំខានដល់ប្រជាពលរដ្ឋដូចសេចក្តីរាយការណ៍នេះដែរឬយ៉ាងណា?
Fresh News រង់ចាំផ្សាយត្រឡប់នូវការបញ្ជាក់របស់អាជ្ញាធរពាក់ព័ន្ធដោយមេត្រីភាព៕
