មន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍ ចែករំលែកបទពិសោធពាក់ព័ន្ធនឹងការអភិវឌ្ឍវិស័យឌីជីថល ក្នុងវេទិកាអន្តរជាតិ នៅប្រទេសហ្វីលីពីន
28-04-2026 11:16
(ហ្វីលីពីន)៖ លោក សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគមន៍ បានអញ្ជើញចូលរួមកម្មវិធី Digital and Green Innovation Forum Asia-Pacific ដែលរៀបចំឡើងដោយ GIZ ដើម្បីលើកកម្ពស់កិច្ចសហប្រតិបត្តិការ និងការតភ្ជាប់ក្នុងតំបន់ អាស៊ី-ប៉ាស៊ីហ្វិក ចាប់ពីថ្ងៃទី២១ ដល់២៤ ខែមេសា ឆ្នាំ២០២៦។
ក្នុងវេទិកានេះ លោក សំ សិទ្ធិសេរី បានបង្ហាញ និងចែករំលែកបទពិសោធពាក់ព័ន្ធនឹងការអភិវឌ្ឍវិស័យឌីជីថល ការរៀបចំគោលនយោបាយ និងការជំរុញប្រព័ន្ធអេកូឡូស៊ីនវានុវត្តន៍និងធុរកិច្ចថ្មីឌីជីថល ព្រមទាំងបរិវត្តកម្មឌីជីថល ដើម្បីគាំទ្រការអភិវឌ្ឍសេដ្ឋកិច្ចនិងសង្គមឌីជីថលប្រកបដោយចីរភាព។
វេទិកានេះក៏បានលើកឡើងអំពីសារៈសំខាន់នៃបរិស្ថានសាកល្បងនវានុវត្ត (Innovation Sandbox) ក្នុងការអនុញ្ញាតឱ្យសាកល្បង និងអភិវឌ្ឍដំណោះស្រាយបច្ចេកវិទ្យាថ្មីៗ ដោយមានការគ្រប់គ្រងហានិភ័យសមស្រប ដើម្បីគាំទ្រដល់នវានុវត្តន៍ឌីជីថល។
កម្មវិធីនេះបានប្រមូលផ្តុំតំណាងពីរដ្ឋាភិបាល អង្គការអន្តរជាតិ និងវិស័យឯកជន ពីបណ្តាប្រទេសក្នុងតំបន់ ដើម្បីពង្រឹងការសហប្រតិបត្តិការ ការចែករំលែកបទពិសោធ និងការជំរុញនវានុវត្តន៍បច្ចេកវិទ្យា សម្រាប់អនាគតប្រកបដោយចីរភាព៕
