រសជាតិឆ្ងាញ់ និងប្លែកគេ នាំឱ្យផលិតផលដែលមានសក្តានុពល ៥ប្រភេទជាទៀត ត្រូវបានក្រសួងពាណិជ្ជកម្ម ចុះបញ្ជីម៉ាកសម្គាល់ភូមិសាស្ត្រ និងម៉ាកសមូហភាព (Video inside)
28-04-2026 17:59
(ភ្នំពេញ)៖ ផលិតផលខ្មែរ ដែលមានសក្តានុពលចំនួន៥ប្រភេទ ត្រូវបានក្រសួងពាណិជ្ជកម្ម សម្រេចចុះបញ្ជីជាម៉ាកសម្គាល់ភូមិសាស្រ្ត (GI) និង ម៉ាកសមូហភាព ដើម្បីជំរុញ និងលើកកម្ពស់អត្តសញ្ញាណ និងកេរ្តិ៍ឈ្មោះផលិតផលរបស់កម្ពុជា នៅលើទីផ្សារអន្តរជាតិ។
ផលិតផលដែលបានចុះបញ្ជីម៉ាកសម្គាល់ភូមិសាស្ត្រ ដែលត្រូវបានប្រកាសជាផ្លូវការ នៅថ្ងៃទី២៨ ខែមេសា ឆ្នាំ២០២៦នេះ រួមមាន៖ ១) សូត្រមាសភ្នំ ស្រុក ២) ក្តាមថ្មកោះកុង ៣) ស្វាយឧត្តរមានជ័យ ៤) ស្វាយចន្ទី កំពង់ធំ និងម៉ាកសមូហភាពឃ្មុំព្រៃព្រះវិហារ។
ការចុះបញ្ជីម៉ាកសម្គាល់ភូមិសាស្រ្តបន្ថែម ៤ទៀតនេះ បានធ្វើឱ្យម៉ាកសម្គាល់ភូមិសាស្ត្រទំនិញកម្ពុជា មានការកើនឡើងដល់ចំនួន ១២ ដែលក្នុងនោះមាន៖ ១) ម្រេចកំពត ២) ស្ករត្នោតកំពង់ស្ពឺ ៣) ឃ្មុំព្រៃមណ្ឌលគិរី ៤) ក្រូចថ្លុងកោះទ្រុង ៥) ទឹកត្រីកំពតកែប ៦) អំបិលកំពតកែប ៧) បង្កងតាកែវ ៨) ប្រហុកសៀមរាប ៩) ស្វាយចន្ទីកំពង់ធំ ១០) ស្វាយឧត្តរមានជ័យ ១១) ក្តាមថ្មកោះកុង និង ១២) សូត្រមាសភ្នំស្រុក។
លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា «គ.ក.ប.» គូសបញ្ជាក់ថា តាមរយៈការចុះបញ្ជីម៉ាកសម្គាល់ភូមិសាស្ត្រនេះ គឺជាជំហានសំខាន់មួយ ក្នុងការជំរុញ និងលើកកម្ពស់អត្តសញ្ញាណ និងកេរ្តិ៍ឈ្មោះផលិតផលរបស់កម្ពុជា នៅលើទីផ្សារអន្តរជាតិ ហើយជាជំហានបន្ទាប់ ដើម្បីបន្តពិនិត្យលទ្ធភាពក្នុងការស្នើសុំចុះបញ្ជីការពារជាលក្ខណៈអន្តរជាតិ ក្រោមក្របខណ្ឌច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោនផងដែរ។
ថ្លែងប្រាប់អ្នកសារព័ត៌មាន ក្នុងទិវាកម្មសិទ្ធិបញ្ញាពិភពលោក លោកស្រីរដ្ឋមន្រ្តី បានសម្តែងមោទភាព ដែលបានសម្របសម្រួល និងជំរុញការចុះបញ្ជីកសិផលខ្មែរបន្ថែមទៀត ដើម្បីបង្ហាញសក្តានុពល ចាប់យកទីផ្សារក្នុងស្រុក និងអន្តរជាតិ។
សូមស្តាប់ការពន្យល់បន្ថែមបន្ថែមរបស់លោកស្រី ចម និម្មល និងប្រធានសមាគមតំណាងផលិតផលម៉ាក សម្គាល់ភូមិសាស្ត្រមួយចំនួន ពីមូលហេតុដែលផលិតផលទាំងនេះ ត្រូវបានចុះបញ្ជីម៉ាកសម្គាល់ភូមិសាស្ត្រ៖
