(ភ្នំពេញ)៖ នៅព្រឹកថ្ងៃទី២៩ ខែមេសា ឆ្នាំ២០២៦នេះ គណៈបញ្ជាការឯកភាពរាជធានីភ្នំពេញ ដឹកនាំដោយលោក ឯក ឃុនដឿន អភិបាលរងរាជធានីភ្នំពេញ បានដឹកនាំកម្លាំងចម្រុះ ចុះត្រួតពិនិត្យទីតាំងបើកតារាងបាល់ទះ ស្ថិតនៅដីឡូត៍លេខ០៥ ផ្លូវលេខ២៤៧ ក្រុមទី១ ភូមិ១ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ តាមការចុះផ្សាយរបស់បណ្ដាញសារព័ត៌មានថា ទីតាំងនេះមានការបើកលេងល្បែងស៊ីសងខុសច្បាប់។

កម្លាំងសមត្ថកិច្ចបានធ្វើការពិនិត្យទិដ្ឋភាពរួមក្នុងទីតាំងរួមមាន៖ តារាងបាល់ទះចំនួន២, បន្ទប់ដេកចំនួន៣, បន្ទប់ធំ១, ឃ្លាំងសម្រាប់ដាក់សម្ភារៈចំនួន១ និងផ្ទះបាយចំនួន១។ សមត្ថកិច្ចពិនិត្យជាក់ស្ដែង ពុំមានការលេងល្បែងស៊ីសងខុសច្បាប់នោះទេ។ ក្រោយពីត្រួតពិនិត្យចប់សព្វគ្រប់កម្លាំងចម្រុះ បានធ្វើការណែនាំដល់លោកស្រី វ៉ាង ស្រីកា អាយុ២១ឆ្នាំ (ជាតំណាងម្ចាស់ទីតាំង) ដែលមានខ្លឹមសារដូចខាងក្រោម៖

១៖ ហាមយកទីតាំងនេះបើកកន្លែងលេងល្បែងស៊ីសងខុសច្បាប់គ្រប់ប្រភេទ
២៖ ហាមយកទីតាំងចែកចាយ, ជួញដូរ និងប្រើប្រាស់គ្រឿងញៀនខុសច្បាប់
៣៖ បើមិនអនុវត្តតាមកិច្ចសន្យាខាងលើ រដ្ឋបាលរាជធានីភ្នំពេញ និងចុះផ្អាកអាជីកម្មជាបណ្ដោះអាសន្ន៕