(ភ្នំពេញ)៖ យោងតាមសេចក្ដីប្រកាសព័ត៌មានរបស់ក្រសួងការបរទេស បានឱ្យដឹងថា ភាគីចិន បានបញ្ជាក់ជាថ្មីនូវការបន្តគាំទ្រគម្រោងគ្រប់គ្រងធនធានទឹកចម្រុះហ្វូណនតេជោ។ ការបញ្ជាក់នេះ ធ្វើឡើងនៅក្នុងជំនួប​ទ្វេភាគីរវាង ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក វ៉ាង យី រដ្ឋមន្ត្រីការបរទេសចិន។

គួររំលឹកថា គម្រោងគ្រប់គ្រងធនធានទឹកចម្រុះហ្វូណនតេជោ គឺជាគម្រោងប្រវត្តិសាស្ត្រដ៏សំខាន់ប្រវែងសរុប ១៧២,៦ គីឡូម៉ែត្រ ដែលមានគោលដៅតភ្ជាប់ផ្លូវទឹករវាងទន្លេមេគង្គទៅកាន់សមុទ្រខេត្តកែប។ គម្រោងនេះ ត្រូវបានបែងចែកជាពីរដំណាក់កាល ដោយដំណាក់កាលទី១ ប្រវែង ២១ គីឡូម៉ែត្រ បានបើកការដ្ឋានកាលពីថ្ងៃទី៥ ខែសីហា ឆ្នាំ២០២៤ ខណៈដំណាក់កាលទី២ ប្រវែង ១៥១,៦ គីឡូម៉ែត្រ ត្រូវបានសម្ពោធបើកការដ្ឋានជាផ្លូវការដោយសម្តេចមហាបវរធិបតី ហ៊ុន ម៉ាណែត នៅថ្ងៃទី១១ ខែមេសា ឆ្នាំ២០២៦។

យោងតាម Fresh Ai, គម្រោងផ្លូវទឹកនេះមានជម្រៅ ៤,៧ ម៉ែត្រ និងទទឹង ៦០ម៉ែត្រ ឆ្លងកាត់ខេត្តចំនួនបួន រួមមានកណ្ដាល តាកែវ កំពត និងកែប ដែលរំពឹងថានឹងបញ្ចប់នៅអំឡុងឆ្នាំ២០២៨។ គម្រោងហ្វូណនតេជោរំពឹងថានឹងផ្តល់អត្ថប្រយោជន៍ដ៏មហាសាលដូចជា ពង្រឹងឯករាជ្យភាពផ្លូវទឹក បង្កើនប្រសិទ្ធភាពដឹកជញ្ជូន បង្កើតការងាររាប់ម៉ឺននាក់ និងជំរុញការអភិវឌ្ឍសេដ្ឋកិច្ច-សង្គមជាតិប្រកបដោយចីរភាព។

គម្រោងហ្វូណនតេជោ ដែលមានទុនវិនិយោគសរុបប្រមាណ ១,១៧ ពាន់លានដុល្លារអាម៉េរិក ទទួលបានការបោះទុនពី សហគ្រាសសាធារណៈ និងក្រុមហ៊ុនក្នុងស្រុកចំនួន ៥១ភាគរយ និងពីក្រុមហ៊ុនវិនិយោគរបស់ប្រទេសចិនចំនួន ៤៩ភាគរយ។

ដើម្បីជំរុញដំណើរការគម្រោងនេះ, ភាគីចិន តាមរយៈរដ្ឋមន្ត្រីការបរទេស លោក វ៉ាង យី បានគូសបញ្ជាក់ជាថ្មីថា​ «ភាគីចិន ចិននៅតែបន្តគាំទ្រគម្រោងគ្រប់គ្រងធនធានទឹកចម្រុះហ្វូណនតេជោ»៕