(ភ្នំពេញ)៖ ស្ថានភាពសេរីភាពសារព័ត៌មាន និងសណ្តាប់ធ្នាប់សារព័ត៌មាននៅកម្ពុជាមានភាពល្អប្រសើរ» នេះ ជាលទ្ធផលនៃការស្ទង់មតិនៅទូទាំងប្រទេស ស្តីពីស្ថានភាពសេរីភាពសារព័ត៌មាននៅកម្ពុជាឆ្នាំ២០២៦ ដែលត្រូវបានក្រសួងព័ត៌មានផ្សព្វផ្សាយក្នុងសន្និសីទសារព័ត៌មាននារសៀលថ្ងៃទី២៩ ខែមេសា ឆ្នាំ២០២៦នេះ នៅទីស្តីការក្រសួងព័ត៌មាន។

ពិធីនេះធ្វើក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងដោយមានការចូលរួមពីសំណាក់អ្នកសារព័ត៌មាន និងតំណាងប្រព័ន្ធផ្សព្វផ្សាយនៅកម្ពុជាយ៉ាងច្រើនកុះករ។

ការស្ទង់មតិបានផ្តល់លទ្ធផលឱ្យឃើញថា ៨០,៨% នៃអ្នកចូលរួមក្នុងការស្ទង់មតិ ដែលតំណាងឱ្យអ្នកអនុវត្តសកម្មភាពក្នុងវិស័យព័ត៌មាននៅក្នុងប្រទេសកម្ពុជា បានវាយតម្លៃស្ថានភាពសេរីភាពសារព័ត៌មានថាមានភាពល្អប្រសើរ។

ការផ្សព្វផ្សាយរបាយការណ៍ស្តីពីស្ថានភាពសេរីភាពសារព័ត៌មាននៅកម្ពុជា បានធ្វើឡើងស្របពេលនឹងទិវាសេរីភាពសារព័ត៌មានពិភពលោកឆ្នាំ២០២៦ ក្រោមប្រធានបទ «ការរៀបចំអនាគតប្រកបដោយសន្តិភាព៖ ការលើកកម្ពស់សេរីភាពសារព័ត៌មាន ដើម្បីសិទ្ធិមនុស្ស ការអភិវឌ្ឍ និងសន្តិសុខ»។ វាជាឱកាសមួយបន្ថែមទៀតសម្រាប់អ្នកសារព័ត៌មាន តួអង្គក្នុងវិស័យព័ត៌មាន និងសាធារណជន ក្នុងការទទួលព័ត៌មាន និងស្វែងយល់ការពិតអំពីការអនុវត្តការងាររបស់អ្នកសារព័ត៌មាន និងលំហសេរីភាពនៅកម្ពុជា ជាមួយវឌ្ឍនភាព វិជ្ជមាន ដែលត្រូវបានឆ្លុះបញ្ចាំងតាមរយៈលទ្ធផលនៃការស្ទង់មតិបែបវិទ្យាសាស្ត្រនៅទូទាំងព្រះរាជាណាចក្រកម្ពុជា។

ក្នុងន័យនេះ អ្នកស្ទង់មតិចំនួន ៨៥,៨% បានអះអាងថា ពួកគេមានសេរីភាពពេញលេញក្នុងការប្រមូលប្រភពព័ត៌មាន និងផ្សព្វផ្សាយព័ត៌មានជូនប្រជាពលរដ្ឋ។ នេះគឺជាភស្តុតាងរឹងមាំមួយ ដែលបានឆ្លុះ បញ្ចាំងពីបរិយាកាសការងារប្រកបដោយភាពអំណោយផល និងការគាំពារពីក្រសួងព័ត៌មាន រាជរដ្ឋាភិបាល ក្នុងការលើកកម្ពស់សេរីភាពសារព័ត៌មាន ដោយភ្ជាប់ទៅនឹងបុព្វហេតុសិទ្ធិមនុស្ស ការជំរុញការអភិវឌ្ឍ សង្គម-សេដ្ឋកិច្ច និងការរក្សាសន្តិសុខជាតិ៕

ខាងក្រោមនេះជាសេចក្តីប្រកាសព័ត៌មាន៖