(ភ្នំពេញ)៖ កម្មវិធីជាតិសុខភាពភ្នែកនៃក្រសួងសុខាភិបាល បានរៀបចំពិធីប្រគល់ និងទទួលសម្ភារបរិក្ខារចក្ខុសាស្រ្តជូនមន្ទីរពេទ្យថ្នាក់ជាតិ និងមន្ទីរសុខាភិបាលរាជធានី-ខេត្ត ក្រោមអធិបតីភាពលោកសាស្រ្តាចារ្យ ងី ម៉េងទី ប្រឹក្សាក្រសួងសុខាភិបាល ជានាយកមន្ទីរពេទ្យមិត្តភាពខ្មែរ-សូវៀត និងជាប្រធានកម្មវិធីជាតិសុខភាពភ្នែក។

ពិធីប្រគល់ទទួលនេះក៏មានការចូលរួមពីលោកសាស្រ្តាចារ្យ ដោរ សីហា នាយករងមន្ទីរពេទ្យមិត្តភាពខ្មែរ-សូវៀត និងជាអនុប្រធានកម្មវិធីជាតិសុខភាពភ្នែក លោក បាក់តូក្យូ នាយកមូលធិនិហ្វេ្រដហូឡូប្រចាំប្រទេសកម្ពុជា ដែលមានអ្នកចូលរួមពី មន្ទីរពេទ្យថ្នាក់ជាតិ និង មន្ទីរសុខាភិបាលរាជធានីខេត្ត ចំនួន២៥រូប ដែលប្រព្រឹត្តទៅនាថ្ងៃទី២៧ ខែមេសា ឆ្នាំ២០២៦។

សម្រាប់សម្ភារបរិក្ខារចក្ខុសាស្រ្តដែលបានប្រគល់ជូនអង្គភាពចំនួន ១៤ រួមមាន៖ មន្ទីរពេទ្យបង្អែកខេត្តកំពង់ឆ្នាំង មន្ទីរពេទ្យបង្អែកជ័យជំនះ ខេត្តកណ្តាល មន្ទីរពេទ្យបង្អែកខេត្តកំពង់ស្ពឺ មន្ទីរពេទ្យបង្អែកខេត្តកំពង់ធំ មន្ទីរបង្អែកខេត្តព្រះសីហនុ មន្ទីរពេទ្យព្រះនរោត្តមសីហនុត្បូងឃ្មុំ មន្ទីរពេទ្យបង្អែកខេត្តកំពង់ចាម មន្ទីរពេទ្យបង្អែកខេត្តសៀមរាប មន្ទីរពេទ្យ១៦មករា ខេត្តព្រះវិហារ មន្ទីរពេទ្យបង្អែកខេត្តឧត្តរមានជ័យ មន្ទីរពេទ្យបង្អែកខេត្តរតនគីរី មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យបង្អែករាជធានីភ្នំពេញ រួមទាំងកម្មវិធីជាតិសុខភាពភ្នែក ដែលសម្ភារទាំងអស់តម្លៃសរុបចំនួន ១៤៣,១៥៤ដុល្លារអាមេរិក។

ក្នុងឳកាសនោះដែរលោកសាស្រ្តាចារ្យ ងី ម៉េង បានផ្ដល់ណែនាំ ដល់អង្គភាពខាងលើ ត្រូវប្រើប្រាស់ឱ្យអស់លទ្ធភាព និងថែទាំសម្ភារចក្ខុសាស្រ្តតាមបច្ចេកទេសឱ្យបានយូរអង្វែង, ត្រូវពង្រឹងសមត្ថភាពបុគ្គលិក និងពង្រឹងគុណភាពសេវា,
ត្រូវផ្ដល់សេវាជូនប្រជាពលរដ្ឋឱ្យបានច្រើន និងត្រូវចុះបញ្ជីសារពើភណ្ឌសម្ភារក្នុងអង្គភាពឱ្យបានត្រឹមត្រូវ។

ឆ្លៀតឱកាសនេះលោកសាស្រ្តាចារ្យ ក៏បានថ្លែងអំណរគុណយ៉ាងជ្រាលជ្រៅចំពោះមូលនិធិហ្រ្វេដហូឡូ ដែលតែងតែសហការជាដៃគូដ៏សកម្ម ជាមួយកម្មវិធីសុខភាពភ្នែក និងមន្ទីរសុខាភិបាលរាជធានីខេត្ត ក្នុងការចូលរួមកាត់បន្ថយភាពពិការភ្នែក និងគំហើញចុះខ្សោយជូនប្រជាពលរដ្ឋនៅក្នុងប្រទេសកម្ពុជា។

ការគាំទ្រនេះលើការផ្តល់សម្ភារបរិក្ខារនេះ នឹងអាចធានាដល់ការផ្ដល់សេវាសុខភាពភ្នែកប្រកបដោយគុណភាព និងសមធម៌ជូនប្រជាពលរដ្ឋ៕