(កណ្តាល)៖ សិប្បកម្មស្លរចម្រាញ់យកផ្លាកទីនស្ថិតនៅភូមិអូរ ឃុំម្កាក់ ស្រុកអង្គស្នួល ខេត្តកណ្ដាល បានបង្កការប៉ះពាល់ដល់ប្រជាពលរដ្ឋដោយមានក្លិនឈ្ងៀមខ្លាំង និងប៉ះពាល់ដល់បរិស្ថានផងដែរ។

នៅរសៀលថ្ងៃទី២៩​ ខែមេសា​ ឆ្នាំ២០២៦​ ក្រុមការងារមន្ទីរបរិស្ថានខេត្តកណ្ដាល ដឹកនាំ​ដោយ អាន តូរ៉ា ប្រធានការិយាល័យគាំពារបរិស្ថាន សហការជាមួយរដ្ឋបាល​ស្រុក​អង្គ​ស្នួល និងអាជ្ញាធរ ភូមិ ឃុំ បានចុះទៅពិនិត្យទីតាំងសិប្បកម្មស្លរចម្រាញ់យកផ្លាកទីន​នេះ។

សិប្បកម្មនេះ បានបើកដំណើរនៅខែវិច្ឆិកា ឆ្នាំ២០២៥ និងមិនច្បាប់អនុញ្ញាតនោះ​ឡើយ។ ក្រុមការងារ បានណែនាំម្ចាស់សិប្បកម្ម​ផ្អាក​សកម្មភាពទាំងស្រុង​រហូតដល់​បំពេញបែបបទនីតិវិធីច្បាប់បានរួចរាល់។

ក្រុមការងារក៏បានណែនាំម្ចាស់សិប្បកម្មរកវិធីសាស្រ្តកាត់បន្ថយបញ្ហាផ្សែង និងក្លិ​ន​ឈ្ងៀម ឱ្យនៅកម្រិតអតិប្បមា ជៀសវាងប៉ះពាល់ដល់បរិស្ថាន, បញ្ឈប់យកប្រេងខ្មៅ​យក​ទៅដុតដេញផ្តាច់សំណបន្តទៀត និងត្រូវកែបច្ចេកទេសឡចម្រាញ់បន្ថែមទៀត​ដោយ​ធានាមិនបង្កផលប៉ះពាល់ដល់ប្រជាពលរដ្ឋ និងបរិស្ថានជុំវិញ។

ក្រុមការងារ ក៏បានណែនាំម្ចាស់សិប្បកម្មត្រូវរៀបចំកិច្ចសន្យាការពារបរិស្ថានជាមួយ​មន្ទីរ​បរិស្ថានខេត្តកណ្តាល និងត្រូវគ្រប់គ្រងសំណល់ផេះធ្យូងថ្មឱ្យបានត្រឹមត្រូវ។

ក្រុមការងារក៏បានដាក់វិន័យអន្តរការតាមច្បាប់ទៅលើម្ចាស់សិប្បកម្ម ព្រោះដំណើរការសិប្បកម្មដោយពុំមានលិខិតអនុញ្ញាត៕