(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាល នៃរដ្ឋបាលខេត្តព្រះវិហារ នៅថ្ងៃទី២៨ ខែមេសា ឆ្នាំ២០២៦ បានដឹកនាំកិច្ចប្រជុំសំខាន់មួយ ជាមួយថ្នាក់ដឹកនាំមន្ទីរពេទ្យបង្អែកខេត្ត ១៦មករា ដោយមានការចូលរួមពីអនុប្រធានមន្ទីរពេទ្យ នាយផ្នែក និងនាយសាលទាំងអស់ ដើម្បីពង្រឹងប្រសិទ្ធភាពការគ្រប់គ្រង និងលើកកម្ពស់គុណភាពសេវាសុខាភិបាលជូនប្រជាពលរដ្ឋ។

នាឱកាសនេះ លោកវេបណ្ឌិត គួង ឡូ បានថ្លែងផ្តោតសំខាន់លើទស្សនៈគំនិត ស្តីពីការគ្រប់គ្រង និងភាពជាអ្នកដឹកនាំ ដោយបញ្ជាក់ថា «ថ្នាក់ដឹកនាំទាំងអស់ ទាំងថ្នាក់ដឹកនាំមន្ទីរពេទ្យ ទាំងនាយសាល ទាំងនាយផ្នែក ត្រូវដើរតួជាអ្នកដឹកនាំផង និងជាអ្នកគ្រប់គ្រងផង» ក្នុងពេលតែមួយ ហើយត្រូវដឹងច្បាស់ពីពេលវេលានៃតួនាទីនីមួយៗ។

លោកបានពន្យល់យ៉ាងច្បាស់ថា នៅពេលដែលអ្នកនិយាយថា «អ្វី ឬហេតុអ្វី» នោះគឺអ្នកកំពុងតែដឹកនាំ ខណៈនៅពេលដែលអ្នកនិយាយថា «របៀបណា ឬក៏នៅពេលណា» នោះមានន័យថា អ្នកកំពុងតែគ្រប់គ្រង។ អ្នកដឹកនាំល្អ ត្រូវធ្វើឲ្យមនុស្សមានការចូលរួម ខិតខំប្រឹងប្រែង ខណៈអ្នកគ្រប់គ្រងត្រូវធ្វើឲ្យការងារសម្រេចគោលដៅ។

លោកវេជ្ជបណ្ឌិត គួង ឡូ បានបន្ថែមថា អ្នកដឹកនាំត្រូវមានគុណលក្ខណៈសំខាន់៣គឺ ភាពជាម្ចាស់ (Ownership), បុរេសកម្មភាព (Proactive), នវានុវត្តន៍ (Innovation)។ ជាមួយគ្នានេះ ដើម្បីសម្រេចជោគជ័យក្នុងការងារ ត្រូវមានភាពអត់ធ្មត់ ការខិតខំប្រឹងប្រែង និងការតស៊ូបន្តដោយមិនចុះចាញ់។

លើសពីនេះលោកប្រធានមន្ទីរសុខាភិបាលខេត្ត ក៏បានថ្លែងផ្តោតលើការពង្រឹងការផ្តល់សេវាសុខាភិបាល ដោយដាក់អាទិភាពលើការធ្វើបដិសណ្ឋារកិច្ចល្អចាប់ពីចំណុចទទួលសេវា រហូតដល់ការបញ្ចប់ ដោយរួមមាន មន្ត្រីសុខាភិបាល បុគ្គលិកសម្អាត សន្តិសុខ និងអ្នកបើកបររថយន្តសង្គ្រោះ ក៏ដូចជាការពង្រឹងសេវា២៤ម៉ោង ដោយយកអ្នកជំងឺជាចំណុចកណ្តាល ផ្តល់សេវាប្រកបដោយគុណភាព ប្រសិទ្ធភាព សមធម៌ និងគោរពតាមក្រមសីលធម៌វិជ្ជាជីវៈ និងសីលធម៌មនុស្ស។

ជាមួយនឹងនេះ លោក គួង ឡូ បានណែនាំឲ្យពង្រឹងការធ្វើកោសលវិច្ច័យឲ្យបានលឿន និងមានគុណភាព និងបានស្នើសុំឲ្យមន្ទីរពេទ្យលើកលែងថ្លៃសេវា ជូនក្រុមអ្នកស្ម័គ្រចិត្តសុខភាពភូមិ (VHSG) ដែលត្រូវបានមន្ទីរពេទ្យឯកភាពអនុវត្ត។ កិច្ចប្រជុំបានបង្ហាញពីការប្តេជ្ញាចិត្តរួម ក្នុងការលើកកម្ពស់គុណភាពសេវាសុខាភិបាល និងការថែរក្សាសុខភាពប្រជាពលរដ្ឋឲ្យកាន់តែប្រសើរឡើង៕