(ភ្នំពេញ)៖ នៅក្នុងបរិបទដែលវិស័យទេសចរណ៍កំពុងប្រឈមនឹងឧបសគ្គ និងទទួលរងឥទ្ធិពលពីកត្តាខាងក្រៅជាច្រើន ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (ក.ផ.ផ) បានបន្តបង្កើនសន្ទុះសកម្មភាព និងជំរុញការផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិឲ្យកាន់តែខ្លាំងក្លា ស្របតាមទស្សនទាន «ជួបឧបសគ្គកាន់តែច្រើន កាន់តែត្រូវមានភាពធន់នឹងវិបត្តិ»។

លោក ហួត ហាក់ ប្រធានក្រុមប្រឹក្សាភិបាល ក.ផ.ផ នៅថ្ងៃទី២៩ ខែមេសា ឆ្នាំ២០២៦ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារត្រីមាសទី១ ឆ្នាំ២០២៦ និងលើកទិសដៅការងារត្រីមាសទី២ ឆ្នាំ២០២៦ ដោយមានការចូលរួមពីតំណាងរដ្ឋ និងវិស័យឯកជន សមាជិកក្រុមប្រឹក្សាភិបាល លោកនាយកប្រតិបត្តិ និងអង្គភាពប្រតិបត្តិរបស់ ក.ផ.ផ។

កិច្ចប្រជុំនេះមានគោលបំណងពិនិត្យវឌ្ឍនភាពការងារ វិភាគ និងវាយតម្លៃលើស្ថិតិ និងស្ថានភាពទេសចរណ៍ទាំងក្នុងប្រទេស តំបន់ និងពិភពលោក ព្រមទាំងកំណត់កត្តាហានិភ័យ និងកាលានុវត្តភាព ដើម្បីរៀបចំយុទ្ធសាស្ត្រ និងផែនការសកម្មភាពឲ្យមានភាពចំគោលដៅ ទាន់ពេលវេលា មានភាពបត់បែន និងឆ្លើយតបនឹងស្ថានភាពបច្ចុប្បន្ន និងរយៈពេលមធ្យម។

ក្នុងឱកាសនេះ លោកប្រធាន ក.ផ.ផ បានកោតសរសើរ និងវាយតម្លៃខ្ពស់ចំពោះលទ្ធផលសម្រេចបានក្នុងត្រីមាសទី១ ដែលបានចូលរួមជំរុញការផ្សព្វផ្សាយសក្ដានុពលទេសចរណ៍កម្ពុជាទៅកាន់ទីផ្សារអន្តរជាតិ និងគាំទ្រទិសដៅការងារបន្ត។ ទន្ទឹមនឹងនេះ ក៏បានណែនាំឱ្យយកចិត្តទុកដាក់លើការងារសំខាន់ៗមួយចំនួន រួមមាន៖

ទី១៖ ជំរុញការផ្សព្វផ្សាយយុទ្ធនាការ «Visit Cambodia in Green Season» (ខែឧសភា ដល់ ខែតុលា) ភ្ជាប់នឹងគំនិតផ្តួចផ្តើម «The Green Wonder» របស់ ក.ផ.ផ
ទី២៖ រៀបចំផែនការគាំទ្រការលើកលែងទិដ្ឋាការសម្រាប់ប្រជាពលរដ្ឋចិន កាន់លិខិតឆ្លងដែន PRC ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦
ទី៣៖ ធ្វើពិពិធកម្មទីផ្សារទេសចរណ៍ដោយមានភាពបត់បែន
ទី៤៖ ជំរុញយុទ្ធនាការ «ចាក់ទឹកថ្លាក្នុងទឹកល្អក់» ដើម្បីលើកកម្ពស់កិត្តិនាមកម្ពុជាលើឆាកអន្តរជាតិ
ទី៥៖ រៀបចំផែនការយុទ្ធសាស្ត្រផ្សព្វផ្សាយព្រឹត្តិការណ៍កិច្ចប្រជុំកំពូលហ្វ្រង់កូហ្វូនី លើកទី២០ ឆ្នាំ២០២៦ ដែលកម្ពុជានឹងធ្វើជាម្ចាស់ផ្ទះ នៅខែវិច្ឆិកា ឆ្នាំ២០២៦ នៅរាជធានីភ្នំពេញ ដើម្បីទាក់ទាញភ្ញៀវទេសចរអន្តរជាតិ និងវិនិយោគិនបរទេសឲ្យបានកាន់តែច្រើន៕