(កំពង់ស្ពឺ)៖ កម្លាំងនគរបាលខេត្តកំពង់ស្ពឺ កាលពីយប់ថ្ងៃទី២៩ ខែមេសា ឆ្នាំ២០២៦ បានស្ទាក់ចាប់ជនជាតិបរទេសសរុបចំនួន៨៧នាក់ ដែលរត់ចេញពីក្រុងប៉ោយប៉ែត កន្លែងដែលកម្លាំងសមត្ថកិច្ចបង្ក្រាបទ្រង់ទ្រាយធំពាក់ព័ន្ធ នឹងបទល្មើស Scam Online។

យោងតាមរបាយការណ៍ដែលភ្នាក់ងារព័ត៌មាន Fresh News ទទួលបាននៅរសៀលថ្ងៃទី៣០ ខែមេសា ឆ្នាំ២០២៦ បានឲ្យដឹងថា ក្រោយទទួលបានព័ត៌មានជនជាតិបរទេសមួយចំនួនបាននាំគ្នាចេញពីក្រុងប៉ោយប៉ែត ដើម្បីគេចពីការចាប់ខ្លួននោះ ស្នងការនគរបាលខេត្តកំពង់ស្ពឺ លោកឧត្តមសេនីយ៍ទោ ឃឹម សុកខៃ​ បានបញ្ជាឲ្យកម្លាំងនគរបាលជំនាញ សហការជាមួយកម្លាំងនគរបាលមូលដ្ឋាន ដាក់គោលដៅត្រួតពិនិត្យ និងស្ទាក់ចាប់មុខសញ្ញាទាំងនេះកាលពីវេលាម៉ោងជាង ១១យប់ថ្ងៃទី២៩ ខែមេសា។

របាយការណ៍បានបន្តថា ក្រោយដាក់គោលដៅស្ទាក់ កម្លាំងនគរបាលបានឃាត់រថយន្តដែលដឹកជនជាតិបរទេសបានចំនួន៨៧នាក់ ក្នុងនោះមានជនជាតិឥណ្ឌូនេស៊ីចំនួន៥៩នាក់ ជនជាតិចិនចំនួន២៧នាក់ និងជនជាតិវៀតណាមម្នាក់ ដែលពួកគេមានទិសដៅធ្វើដំណើរទៅខេត្តព្រះសីហនុ។

សម្រាប់ជនជាតិបរទេសទាំងនេះ ត្រូវបានបញ្ជូនទៅកាន់ស្នងការដ្ឋាននគរបាលខេត្ត ដើម្បីសួរនាំ និងចាត់ការបន្តទៀត៕