(ភ្នំពេញ)៖ លោក សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគមន៍ នៅព្រឹកថ្ងៃទី៣០ ខែមេសា ឆ្នាំ២០២៦ បានអញ្ជេីញជាអធិបតី ក្នុងសិក្ខាសាលាប្រមូលធាតុចូលលើសេចក្តីព្រាង «យុទ្ធសាស្ត្រជំរុញអភិវឌ្ឍបញ្ញាសិប្បនិម្មិតក្រសួងប្រៃសណីយ៍និងទូរគមនាគមន៍ (ក.ប.ទ.)» ដោយមានការអញ្ជើញចូលរួមពីមន្ត្រីជំនាញរបស់ក្រសួង វិស័យឯកជន និងគ្រឹះស្ថានអប់រំសរុបប្រមាណជា ៨០នាក់។

សិក្ខាសាលានេះបានរៀបចំឡើងក្នុងគោលបំណង (១) ផ្សព្វផ្សាយទិសដៅយុទ្ធសាស្ត្ររបស់ ក.ប.ទ. លើការអភិវឌ្ឍនិងចាប់ប្រើប្រាស់បញ្ញាសិប្បនិម្មិត ជាពិសេសសម្រាប់វិស័យប្រៃសណីយ៍ វិស័យទូរគមនាគមន៍ និងវិស័យបច្ចេកវិទ្យាឌីជីថល (២) ផ្សព្វផ្សាយអំពីវឌ្ឍនភាពលើការរៀបចំឯកសារយុទ្ធសាស្ត្រនេះ និង (៣) ប្រមូលធាតុចូលពីតួអង្គពាក់ព័ន្ធ ដើម្បីធានាថាយុទ្ធសាស្រ្តនេះ មានលក្ខណៈអនុវត្តនិយម ឆ្លើយតបតម្រូវការជាក់ស្តែង និងចូលរួមពង្រឹងប្រព័ន្ធអេកូឡូស៊ីបញ្ញាសិប្បនិម្មិតនៅកម្ពុជា។

ក. ប.ទ. នឹងបន្តសហការជាមួយវិស័យឯកជន គ្រឹះស្ថានអប់រំ និងដៃគូពាក់ព័ន្ធ ដើម្បីពង្រឹងប្រព័ន្ធអេកូឡូស៊ីបញ្ញាសិប្បនិម្មិត និងបង្កើនសមត្ថភាពប្រកួតប្រជែងរបស់កម្ពុជាលើទីផ្សារអន្តរជាតិ៕