(ព្រះសីហនុ)៖ សម្តេច​មហាបវរធិបតី ហ៊ុន ម៉ាណែត នាយក​រដ្ឋ​មន្ត្រីនៃកម្ពុជា បានថ្លែងបញ្ជាក់ថា បើនីតិវិធីការងារត្រួតគ្នា ប្រព័ន្ធការងារមានភាពច្របូកច្របល់ស្មុគស្មាញ គឺជាឧបសគ្គដល់ការធ្វើអាជីវកម្មនានា នឹងមិនអាចធ្វើការប្រកួតប្រជែងបានដែរ ព្រោះមនុស្សទោះបីពូកែធ្វើតាមក្បូនយ៉ាងណាក៏ដោយ តែបើក្បួនមានស្មុគស្មាញ យើងអត់ឈ្នះគេទេ ដូចនេះនីតិវិធីការងារត្រួតគ្នា និងស្មុគស្មាញមួយចំនួនគួរលុបចោលទៅ។

សម្តេច​មហាបវរធិបតី ហ៊ុន ម៉ាណែត បានថ្លែងដូចនេះនាព្រឹកថ្ងៃទី០១ ខែឧសភា ឆ្នាំ២០២៦នេះ នាឱកាសអញ្ជើញ​ជួប​សំណេះសំណាលមួយមន្ត្រីរាជការ បុគ្គលិក កម្មករ និយោជិតដែល​កំពុង​​បម្រើការងារនៅ​កំពង់ផែស្វយ័តក្រុងព្រះសីហនុ ដែលពីធី​សំណេះ​សំណាល​នេះធ្វើឡើងជាការអបអរសាទរខួប​អនុ​ស្សា​វរីយ៍លើកទី១៤០ នៃទិវាពលកម្ម​អន្តរ​ជាតិ ១ ឧសភា ឆ្នាំ២០២៦។

ថ្លែងនាឱកាសនោះសម្តេចមហាបវរធិបតី ហ៊ុន ម៉ាណែត បានណែនាំក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធ ត្រូវបន្តបង្កើនកិច្ចសហការឱ្យបានជិតស្និទ្ធ ប្រកបដោយ​តម្លា​ភាព និងប្រសិទ្ធភាពខ្ពស់ ស្របតាមអភិក្រម «ជវភាពនៃប្រព័ន្ធតួអង្គតែមួយ» ដើម្បី​កែលម្អប្រព័ន្ធគ្រប់គ្រងសេវាកម្មគ្រប់ផ្នែកនៅក្នុងកំពង់ផែស្វយ័តក្រុងព្រះសីហនុ ឱ្យបានកាន់តែប្រសើរឡើង ដែលទាំងអស់នេះមានសារៈសំខាន់បំផុតក្នុងការលើក​កម្ពស់​ការជឿទុកចិត្តពីសំណាក់អតិថិជន វិនិយោគិនជាតិ-អន្តរជាតិលើសេវាកំពង់ផែ។

ពាក់ព័ន្ធនឹងការកែលម្អប្រព័ន្ធគ្រប់គ្រងសេវាកម្មនេះ សម្តេច​មហាបវរធិបតី ហ៊ុន ម៉ាណែត បានថ្លែងដូចនេះថា «ចំណុចនេះគឺជាការប្រកួតប្រជែង ជាគន្លឹះមួយនៃការប្រកួតប្រជែង, មានហេដ្ឋារចនាសម្ព័ន្ធទំនើបយ៉ាងម៉េចក៏ដោយ មានឧបករណ៍ទំនើបយ៉ាងម៉េចក៏ដោយ មានមនុស្សពូកែយ៉ាងម៉េចក៏ដោយ ប៉ុន្តែបើមានភាពច្របូកច្របល់នៃនីតិវិធីការងារ ការរៀបចំប្រព័ន្ធការងារមានភាពច្របូកច្របល់ ស្មុគស្មាញត្រួតគ្នាយូរ ក៏មិនអាចប្រកួតប្រជែងបានដែរ ព្រោះមនុស្សទោះបីពូកែធ្វើតាមក្បូនយ៉ាងណាក៏ដោយ តែបើក្បួនហ្នឹងវាស្មុគស្មាញ យើងអត់ឈ្នះគេទេ»។

សម្តេច​មហាបវរធិបតី ហ៊ុន ម៉ាណែត បានបន្ថែមថា ផែទោះចង់បាន ១លាន ឫ ២លានTEUs ក៏ដោយ តែបើការនាំចេញពីកុងតឺន័រត្រូវការពេល ៣ថ្ងៃ ស្របពេលដែលផែនៅប្រទេសផ្សេងគេធ្វើតែមួយថ្ងៃនោះ យើងមិនអាចឈ្នះគេនោះទេ ហើយនេះជាកិច្ចការដែលសំខាន់ដែលត្រូវគិតគូរ, បច្ចេកវិទ្យាល្អម៉េចក៏ដោយក៏នៅតែត្រូវការមនុស្ស ហើយមនុស្សនៅតែធ្វើតាមនីតិវិធីដែរ។

សម្តេច​មហាបវរធិបតី ហ៊ុន ម៉ាណែត បានបញ្ជាក់ទៀតថា ការត្រួតស៊ីគ្នានៃនីតិវិធីមួយចំនួនស្មុគស្មាញគួរលុបចោលទៅ ទំនើបកម្មគឺធ្វើទំនើបកម្មប្រព័ន្ធការងារ ​ហើយដើម្បីឱ្យមានការប្រកួតប្រជែងទាល់តែធ្វើឱ្យមានភាពសាមញ្ញ និងមានប្រសិទ្ធភាព កុំស្មុគស្មាញពេក ហើយបើស្មុគស្មាញត្រួតគ្នា មានតែយើងដែលយល់ ហើយអ្នកផ្សេងទៀតមិនយល់វាពិបាកណាស់ ដូចនេះគួរធ្វើយ៉ាងណាឱ្យងាយស្រួល ទាំងអតិថិជនងាយយល់ និងមានតម្លាភាព គឺងាយស្រួលធ្វើតែម្តង ហើយកិច្ចការងារនេះគឺសំខាន់ណាស។

ជាមួយនោះសម្តេច​មហាបវរធិបតី ហ៊ុន ម៉ាណែត ក៏បានថ្លែងកោត​សរសើរដល់កំពង់ផែស្វយ័តក្រុងព្រះសីហនុ និងគ្រប់ស្ថាប័នទាំងអស់មិនថា ស្ថាប័នគយ និងកំពង់ផែ ដែលបានខិតខំកែរសម្រួលជាច្រើន ក្នុងការធ្វើយ៉ាងណាឱ្យការនាំចេញ និងនាំចូលទំនិញបានដោយប្រសិទ្ធភាព បានលឿន និងកាត់បន្ថយពេលវេលា ហើយបានបង្កើនលើការវិនិយោគលើបច្ចេកវិទ្យាថ្មីៗ ដើម្បីជួយកាត់បន្ថយពេលវេលាក្នុងការធ្វើការងារ និងកាត់បន្ថយតម្លៃផងដែរ៕