(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងបញ្ជាក់លម្អិតឡើងវិញថា ក្មេងទំនើងមិនបញ្ជូនទៅកាន់អាវុធនៅសមរភូមិជួរមុខនោះទេ គឺសម្រាប់បម្រើសកម្មភាពសមរភូមិជួរមុខ ដូចជាការចាក់បេតុង ជាដើម។

ការថ្លែងរបស់សម្តេចធិបតី បានធ្វើឡើងនាឱកាសអញ្ជើញ​សំណេះសំណាល​ជាមួយមន្ត្រីរាជការ បុគ្គលិក កម្មករ និយោជិតកំពង់ផែស្វយ័តក្រុងព្រះសីហនុ នៅថ្ងៃទី១ ខែឧសភា ឆ្នាំ២០២៦។

សម្តេចធិបតី ហ៊ុន ម៉ាណែត កាលពីថ្ងៃទី២៦ ខែមេសា ឆ្នាំ២០២៦ បានណែនាំឲ្យ ឧបនាយករដ្ឋមន្ដ្រី កើត រិទ្ធ រដ្ឋមន្ត្រីក្រសួងយុត្តិធម៌, នាយឧត្តមសេនីយ៍ ស ថេត អគ្គស្នងការនគរបាលជាតិ និង នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ សិក្សាផ្លូវច្បាប់ ដើម្បីយកក្មេងទំនើង ដែលបង្កអសន្តិសុខក្នុងសង្គម ទៅបម្រើការងារនៅសមរភូមិមុខ ដូចជាការ ចាក់បេតុងលេណដ្ឋាន ជាដើម។ គោលបំណងនៃការស្នើនេះ គឺដើម្បីអប់រំក្រុមក្មេងទំនើងឲ្យដឹងពីការលះបង់របស់កងទ័ពក្នុងការការពារជាតិ និងដើម្បីភ្ជាប់ពួកគេទៅនឹងការបម្រើជាតិ ព្រមទាំងចៀសវាងការទុកពួកគេនៅពន្ធនាគារដោយឥតប្រយោជន៍។

សម្តេចបានបញ្ជាក់ថា នេះមិនមែនជាការយកពួកគេទៅកាន់កាំភ្លើងនោះទេ ប៉ុន្តែជាការជួយកងវិស្វកម្មក្នុងការចាក់ពុម្ពលេណដ្ឋាន។ ប៉ុន្តែ មានអ្នកបកស្រាយខុស ហើយបែរជានិយាយថា ការបញ្ជូនក្មេងទំនើងទៅសមរភូមិមុខ គឺជាគំនិតនៃបុគ្គលអវិជ្ជាវិស័យការពារជាតិ។

សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «គ្មានគោលការណ៍ឲ្យធ្វើច្បាប់ថ្មីទេ គឺឲ្យសិក្សាច្បាប់ចាស់ អាហ្នឹងទី១ […] ទី២ ខ្ញុំថាឲ្យយកទៅបម្រើសកម្មភាពនៅសមរភូមិមុខ មិនមែនបញ្ជូនទៅសមរភូមិមុខទេ។ ខ្ញុំនិយាយច្បាស់ថា មិនកាន់កាំភ្លើងទេ។ ខ្ញុំមិនយកក្មេងទំនើងទៅកាន់កាំភ្លើង ខូចសណ្តាប់ធ្នាប់ទ័ព នៅខាងពេលខាងមុខទេ»។

បើតាមប្រសាសន៍សម្តេចធិបតី ជាគោលគំនិត ក្មេងទំនើងប្រព្រឹត្តខុសច្បាប់ ត្រូវអនុវត្តច្បាប់ជាធរមាន ដែលត្រូវតែមានអ្នកត្រូវការអប់រំ និងអ្នកត្រូវជាប់ឃុំ។ អ្នកត្រូវជាប់ឃុំ មិនមែនឲ្យគាត់ហូបដេកទេ គឺធ្វើការងារជាប្រចាំ ហេតុនេះសម្តេច ចង់ឲ្យសិក្សាយកអ្នកជាប់ឃុំ ទៅធ្វើការងារដូចជា ការដាំបន្លែ និងចាក់បេតុងលេណដ្ឋាន នៅសមរភូមិមុខ។

ការរៀបចំធ្វើបែបនេះចំពោះក្រុមក្មេងទំនើងដែលបង្កអសន្តិសុខនៅក្នុងសង្គមជាតិ ដើម្បីឱ្យពួកគេដឹងថា កងទ័ព ដែលជាយុវជនដូចគ្នា ពួកគាត់កំពុងតែឈរជើងការពារទឹកដីប្រឈមនឹងការគ្រោះថ្នាក់ដល់អាយុជីវិត ក្នុងបុព្វហេតុបម្រើជាតិ មាតុភូមិ តែនៅពេលដែលខ្លួនមានឱកាស មានសេរីភាព ដើរហើរ បែរជាដើរបង្កបញ្ហានៅក្នុងសង្គមទៅវិញ។ ដូច្នេះ ការធ្វើបែបនេះគឺជាការផ្សាភ្ជាប់គ្នារបស់យុវជនដូចគ្នា ចំពោះការលះបង់ ដើម្បីជាតិ៕