(ព្រះសីហនុ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំឲ្យមានការគិតគូរ និងប្រើប្រាស់ឲ្យបានច្បាស់លាស់នូវតួនាទីនៃកំពង់ផែនីមួយៗរបស់កម្ពុជា ដោយមិនត្រូវធ្វើការដាក់បញ្ចូលទីតាំងមួយច្រើនគោលបំណងនោះទេ ពោលត្រូវបែងចែកច្បាស់លាស់កំពង់ផែណាសម្រាប់ទេសចរណ៍, កំពង់ផែសម្រាប់ទំនិញ និងកំពង់ផែពហុបំណងជាដើម។

ក្នុងឱកាសអញ្ជើញជួប​សំណេះសំណាលមួយមន្ត្រីរាជការ បុគ្គលិក កម្មករ និយោជិត ដែល​កំពុង​​បម្រើការងារនៅ​កំពង់ផែស្វយ័តក្រុងព្រះសីហនុ នាព្រឹកថ្ងៃទី១ ខែឧសភា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត បានអះអាងថា រាជរដ្ឋាភិបាលកម្ពុជា កំពុងគិតគូរពីការរៀបចំកំពង់ផែបម្រើដល់ការស្ដុកប្រេងឥន្ធនៈ និងឧស្ម័ន (ហ្គាស) ផងដែរ បន្ទាប់ពីជួបវិបត្តិកើតចេញពីសង្គ្រាមអ៉ីរ៉ង់។

សម្ដេចមហាបវរធិបតី ហ៊ុន ម៉ាណែត បានគូសបញ្ជាក់ថា កន្លងទៅសម្ដេចបានផ្អាកឲ្យចេញអាជ្ញាប័ណ្ណធ្វើកំពង់ផែអន្ដរជាតិ ព្រោះថាបច្ចុប្បន្នកំពង់ផែនៅក្នុងប្រទេសកម្ពុជា គឺមានច្រើនរួចរាល់ហើយ ហើយអ្វីដែលសំខាន់បន្ដទៀតនេះមិនមែនធ្វើការចេញអាជ្ញាប័ណ្ណឡើយ ពោលត្រូវគិតគូរពង្រឹងដល់ការលើកកម្ពស់សមត្ថភាព បែងចែកភារកិច្ច និងបំពេញឲ្យគ្នាទៅវិញទៅមក មិនត្រូវធ្វើការប្រកួតប្រជែងគ្នាឡើយ។

សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «ដើម្បីឲ្យមានប្រសិទ្ធភាពយើងត្រូវធ្វើយ៉ាងមិចឲ្យផែទាំងអស់នោះ បំពេញគ្នាទៅវិញទៅមក ជៀសវាងការប្រកួតប្រជែងគ្នា ដូច្នេះការសិក្សាបន្ថែមទៅលើការរៀបចំ តើផែមួយមានភារកិច្ចអ្វី ផែនេះជាផែសម្រាប់ដឹកកុងទឺន័រ និងទំនិញចម្រុះផ្សេងៗ ដែលជាអាទិភាពសម្រាប់មជ្ឈមណ្ឌលភស្ដុភារកម្ម ពាក់ព័ន្ធទំនិញកសិផលផ្សេងៗ [...] យើងកំពុងសិក្សាមួយកន្លែងទៀត សម្រាប់មូលដ្ឋានកសាងសម្រាប់កន្លែងស្ដុកប្រេងតែម្ដង ព្រោះវិបត្តិនៃសង្គ្រាមពីអ៉ីរ៉ង់មកធ្វើឲ្យមានវិបត្តិផ្នែកថាមពល ឲ្យយើងគិត និងខិតខំជំរុញក្នុងការកសាងសមត្ថភាពរក្សាប្រេងបម្រុង ឧស្ម័ន (ហ្គាស) បម្រុង»។

បើតាមប្រសាសន៍របស់សម្ដេចមហាបវរធិបតី នាយករដ្ឋមន្ដ្រី, ថ្ងៃក្រោយបើសិនប្រទេសកម្ពុជា មានការអភិវឌ្ឍប្រេងនៅខាងក្នុង ត្រូវភ្ជាប់ជាមួយឧស្សាហ៍កម្មបម្រើឲ្យការចម្រាញ់ប្រេង ដូច្នេះត្រូវគិតគូរបែងចែកកន្លែងណាដែលជាតំបន់សម្រាប់ធ្វើទាំងអស់នេះ មិនគួរកសាងពោងប្រេង ឬកន្លែងចម្រាញ់ប្រេងនៅជាប់កំពង់ផែនោះទេ ព្រោះត្រូវទៅថ្ងៃមុខកំពង់ផែទំនិញ ត្រូវពង្រីកកន្លែងស្ដុកកុងទឺន័រទើបជាភារកិច្ចរបស់ផែ។

សម្ដេចប្រមុខនៃរាជរដ្ឋាភិបាលកម្ពុជា បានបន្ថែមទៀតថា ឆ្នេរសមុទ្ររបស់កម្ពុជាមានប្រវែងត្រឹមជាង៣០០គីឡូម៉ែត្រ ដូច្នេះងាយស្រួលក្នុងការគ្រប់គ្រងកំពង់ផែ ដែលត្រូវរៀបចំធ្វើយ៉ាងណាឲ្យកំពង់ផែទាំងអស់នោះបំពេញគ្នាទៅវិញទៅមក មិនផ្ដោតសំខាន់លើការបន្ដចេញអាជ្ញាប័ណ្ណកសាងកំពង់ផែថ្មីបន្ថែមទៀតឡើយ៕