(ព្រៃវែង)៖ លោក ម៉ុក វណ្ណា ប្រធានក្រុមការងារចុះជួយឃុំសំរោង ស្រុកស្វាយអន្ទរ ខេត្តព្រៃវែង នៅព្រឹកថ្ងៃទី១ ខែឧសភា ឆ្នាំ២០២៦ បានដឹកនាំកិច្ចប្រជុំការងារគណបក្សឆ្នាំ២០២៥ និងលើកទិសដៅឆ្នាំ២០២៦ នៅស្នាក់ការគណបក្សប្រជាជនកម្ពុជាឃុំសំរោង នឹងស្ដាប់បញ្ហាប្រឈម ក៏ដូចជាការសំណូមពរនានារបស់សមាជិកបក្ស ក្នុងការពន្លឿនដោះស្រាយជូនពួកគាត់ឲ្យបានទាន់ពេលវេលា។

កិច្ចប្រជុំនេះក៏មានការចូលរួមពីលោកអនុប្រធានក្រុមការងារចុះជួយមូលដ្ឋានឃុំសំរោង លោកលោកស្រីដែលជាប្រធាន អនុប្រធានគណបក្សឃុំនិងសមាជិកសមាជិកាគណបក្សជាច្រើនរូបទៀតផងដែរ។

ក្នុងឱកាសនោះ លោក ម៉ុក វណ្ណា បានលើកឡើងថា រាជរដ្ឋាភិបាល ក្រោមការដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានយកចិត្តទុក្ខដាក់ជាខ្លាំង ដល់ជីវភាពរស់នៅ និងតម្រូវការរបស់បងប្អូនប្រជាពលរដ្ឋនៅមូលដ្ឋាន។

លោកបានលើកឡើងអំពីភាពខ្លាំងរបស់គណបក្សប្រជាជន ដែលមានភាពរឹងមាំទាំងសម្ព័ន្ធអង្គការចាត់តាំង អគារ ទីតាំងធ្វើការ ហើយក៏មានភាពខ្លាំងទាំងធនធានមនុស្ស ប្រកបដោយសមត្ថភាពខ្ពស់ តាំងពីថ្នាក់ដឹកនាំកំពូល ដល់ថ្នាក់មូលដ្ឋាន។

លោកបានសំដែងនូវការសប្បាយ ចិត្តដែលបានចូលរួមធ្វើការ ជាមួយសមាជិកសមាជិកាបក្ស នៅឃុំសំរោងនិងបានសន្យាថា នឹងខិតខំរួមជាមួយ សមាជិកឃុំ ភូមិឱ្យអស់ពីសមត្ថភាព ដើម្បីដោះស្រាយ និងបង្កើនការងារដល់ប្រជាពលរដ្ឋ តាមរយៈការ ស្វែងរកអ្នកវិនិយោគមកបណ្តាក់ទុនរកស៊ីនៅឃុំសំរោងក៏ដូចជាស្រុកស្វាយអន្ទរទាំងមូលផងដែរ។

បន្ថែមលើសពីនេះលោក ម៉ុក វណ្ណា បានស្នើដល់អាជ្ញាធរ ក៏ដូចជាក្រុមការងារ មន្រ្តីគណបក្សទាំងអស់ត្រូវបន្តយកចិត្តទុកដាក់ដោះស្រាយបញ្ហាប្រឈម និងសំណូមពរនានានៅមូលដ្ឋានឲ្យមានតម្លាភាព និងគណនីយភាពជូន ប្រជាពលរដ្ឋ ជាពិសេសត្រូវបន្តពុះពារសម្រេចឱ្យខានតែបាននូវការប្តេជ្ញាចិត្តជាយុទ្ធសាស្រ្តរបស់គណបក្ស ដោយត្រូវបន្តកសាង ពង្រឹង ពង្រីកកម្លាំងស្នូល ផ្តើមពីការពង្រឹងរចនាសម្ព័ន្ធមូលដ្ឋានភូមិ ឃុំ ពិសេសក្រុមបក្ស និងគ្រួសារបក្ស ជំរុញការចុះឈ្មោះបោះឆ្នោតរបស់សមាជិកបក្ស និងប្រជាជនគ្រប់ទិសទីនៅមូលដ្ឋាន ហើយត្រូវចុះច្បាមជាប់មូលដ្ឋានភូមិផ្សារភ្ជាប់សុខទុក្ខជាប្រចាំជាមួយប្រជាពលរដ្ឋ៕