(ព្រៃវែង)៖ នៅព្រឹកថ្ងៃទី១ ខែឧសភា ឆ្នាំ២០២៦នេះ ក្នុងបរិយាកាសដ៏សប្បាយរីករាយ និងស្និទ្ធស្នាល លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង បានអញ្ជើញសំណេះសំណាលជាមួយកម្មករនិយោជិត ចំនួន៣,១០៨នាក់ នៅខេត្តព្រៃវែង ក្នុងឱកាសខួបអនុស្សាវរីយ៍លើកទី១៤០ ទិវាពលកម្មអន្តរជាតិ ១ ឧសភា នៅបរិវេណក្រុមហ៊ុន អរិន មេនុហ្វេកធឺរីង (ខ្មែរ) ក្នុងស្រុកកំចាយមារ ខេត្តព្រៃវែង។

លោកអភិសន្តិបណ្ឌិត ស សុខា បាននាំមកនូវការសួរសុខទុក្ខពីសំណាក់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនដល់កម្មករទាំងអស់ និងបានវាយតម្លៃខ្ពស់ចំពោះការខិតខំបំពេញការងារ ដែលជាកម្លាំងចលករយ៉ាងសំខាន់ក្នុងការជំរុញកំណើនសេដ្ឋកិច្ចជាតិ។ លោកបានសង្កត់ធ្ងន់លើគោលនយោបាយរបស់រាជរដ្ឋាភិបាល ក្នុងការបន្តលើកកម្ពស់ជីវភាព និងសិទ្ធិសេរីភាពរបស់កម្មករ និយោជិត ក៏ដូចជាការធានាឲ្យបាននូវលក្ខខណ្ឌការងារល្អប្រសើរ និងសុវត្ថិភាពនៅតាមរោងចក្រ សហគ្រាស។

ឧបនាយករដ្ឋមន្ដ្រី ស សុខា បានថ្លែងអំណរគុណដល់ក្រុមហ៊ុន អរិន មេនុហ្វេកធឺរីង ដែលបានផ្ដល់ឱកាសការងារជូនដល់ប្រជាពលរដ្ឋក្នុងមូលដ្ឋាន និងបានសហការល្អជាមួយអាជ្ញាធរ ក្នុងការបង្កើតបរិយាកាសការងារប្រកបដោយសុខដុមរមនា។ លោកបានបន្ដថា ទិវាពលកម្មអន្តរជាតិ ១ ឧសភា មិនត្រឹមតែជាការរំលឹកនូវប្រវត្តិសាស្ត្រ នៃការតស៊ូរបស់វណ្ណៈកម្មករនោះទេ ប៉ុន្តែវាគឺជាសក្ខីភាព នៃការផ្ដល់តម្លៃ និងការដឹងគុណចំពោះកម្លាំងពលកម្ម ដែលកំពុងកសាងអនាគតដ៏រុងរឿងសម្រាប់កម្ពុជា។

​ក្នុងឱកាសនោះ លោកអភិសន្តិបណ្ឌិត បានរៀបចំអាហារសាមគ្គី និងផ្តល់ជូននូវក្រមា និងថវិកា ដល់កម្មករនិយោជិតទាំង៣,១០៨នាក់ ដោយក្នុងម្នាក់ៗទទួលបាន៖ ក្រមា ចំនួន១ និងថវិកា ចំនួន៤ម៉ឺនរៀល។ ដោយឡែកសម្រាប់ស្ត្រីមានផ្ទៃពោះ ៧៩នាក់ ក្នុងម្នាក់ៗទទួលបាន៖ ក្រមា ចំនួន១ និងថវិកាចំនួន១៤ម៉ឺនរៀលផងដែរ៕