(ព្រះសីហនុ)៖ កាលពីថ្ងៃទី២៩ ខែមេសា ឆ្នាំ២០២៦ សាលាដំបូងខេត្តព្រះសីហនុ បានចាត់ការលើសំណុំរឿងព្រហ្មទណ្ឌ លេខ៤៧៤ ចុះថ្ងៃទី២៦ ខែមេសា ឆ្នាំ២០២៦ ទាក់ទិននឹងបទល្មើសប៉ុនប៉ងឆបោក តាមប្រព័ន្ធបច្ចេកវិទ្យា មានស្ថានទម្ងន់ទោស ដោយមានការរៀបចំជាក្រុមមានការចាត់តាំង (ONLINE SCAMS) មានជនត្រូវចោទ៖

១- ឈ្មោះ LI YONGQI ភេទប្រុស កើតឆ្នាំ១៩៩៩ ជនជាតិចិន
២- ឈ្មោះ XIE NENGKU ភេទប្រុស កើតឆ្នាំ២០០០ ជនជាតិចិន
៣-ឈ្មោះ CHEN LIBAO ភេទប្រុស កើតឆ្នាំ១៩៩៩ ជនជាតិចិន
៤-ឈ្មោះ WEI QIANSHUN ភេទប្រុស កើតឆ្នាំ២០០០ ជនជាតិចិន

ពីបទប៉ុនប៉ងឆបោក តាមប្រព័ន្ធបច្ចេកវិទ្យា មានស្ថានទម្ងន់ទោស ដោយមានការរៀបចំជាក្រុមមាន ការចាត់តាំង (ONLINE SCAMS) ប្រព្រឹត្តនៅចំណុចផ្ទះជួលមួយកន្លែង ស្ថិតនៅភូមិថ្មធំ សង្កាត់រាម ក្រុងកំពង់សោម ខេត្តព្រះសីហនុ កាលពីថ្ងៃទី២១ ខែមេសា ឆ្នាំ២០២៦ បទល្មើសដែលមានបញ្ញាត្តិឱ្យផ្តន្ទា ទោសតាមមាត្រា៥ កថាខណ្ឌ១ និងកថាខណ្ឌ៣ ចំណុចទី១ នៃច្បាប់ស្តីពីការប្រឆាំងការឆបោកតាម ប្រព័ន្ធបច្ចេកវិទ្យា និងមាត្រា២៧ នៃក្រមព្រហ្មទណ្ឌ។

អ្នកនាំពាក្យសាលាដំបូងខេត្តព្រះសីហនុ សូមបញ្ជាក់ថា កាលពីថ្ងៃទី២១ ខែមេសា ឆ្នាំ២០២៦ វេលាម៉ោង១២៖២០នាទី កម្លាំងគណៈបញ្ជាការឯកភាពរដ្ឋបាលខេត្តព្រះសីហនុ បានចុះទៅពិនិត្យ ជាក់ស្តែងនៅចំណុច ផ្ទះជួលមួយកន្លែង នៅភូមិថ្មធំ សង្កាត់រាម ក្រុងកំពង់សោម ខេត្តព្រះសីហនុ និង ឆែកឆេររកឃើញជនបរទេសជាជនជាតិចិនចំនួន ៤នាក់ ឈ្មោះ LI YONGQI, ឈ្មោះ XIE NENGKU, ឈ្មោះ CHEN LIBAO, និងឈ្មោះ WEI QIANSHUN និងដកហូតបាន កុំព្យូទ័រលើតុ (ALL IN ONE) ចំនួន ៤គ្រឿង, កុំព្យូរទ័រយួដៃចំនួន ១គ្រឿង និងទូរស័ព្ទដៃចំនួន ៣៩ គ្រឿង។

តាមការស្រាវជ្រាវរបស់មន្ត្រីជំនាញ បញ្ជាក់ថា ឧបករណ៍អេឡិចត្រនិច និងកុំព្យូទ័រខាងលើ មានតម្រុយពាក់ព័ន្ធនឹងករណី ឆបោកតាមប្រព័ន្ធ បច្ចេកវិទ្យា (ONLINE SCAMS) ដោយក្នុងកុំព្យូទ័រទាំងនោះ មានសារសម្រាប់បោកប្រាស់ (SCRIPT)។

បន្ទាប់ពីបានសួរយកចម្លើយ និងពិនិត្យភស្តុតាង ចៅក្រមស៊ើបសួរ សម្រេចឃុំខ្លួនបណ្តោះអាសន្ន លើជនត្រូវចោទខាងលើ ដើម្បីបន្តការស៊ើបសួរតាមនីតិវិធី៕