(ភ្នំពេញ)៖ ព្រះឥន្ទមុនី សុំ សុខា ព្រះចៅអធិការវត្តភ្នៀតសិម្ពលី ព្រះរាជាគណៈថ្នាក់ចត្វា ឧត្តមទីប្រឹក្សាគណៈសង្ឃនាយក សមាជិកលេខាធិការដ្ឋានគណៈសង្ឃនាយកនៃព្រះរាជាណាចក្រកម្ពុជា ព្រះវិន័យធរគណរាជធានីភ្នំពេញ ព្រះគ្រូអនុគណខណ្ឌកំបូល ព្រះចៅអធិការវត្តភ្នៀតសិម្ពលី និងជាព្រះប្រធានពុទ្ធិកសមាគមកម្ពុជរដ្ឋ បាននិមន្តដឹកនាំព្រះសង្ឃ លោកអាចារ្យ គណៈកម្មការ និងពុទ្ធបរិស័ទ ព្រមទាំងសិស្សានុសិស្ស ខ្ទង់ពាន់រូប ប្រារព្ធធ្វើពិធីបុណ្យ វិសាខបូជា ដើម្បីរំលឹកដល់ថ្ងៃ ដែលព្រះសម្មាសម្ពុទ្ធ ទ្រង់ប្រសូត ត្រាស់ដឹង និងបរិនិព្វាន។

នៅក្នុងកម្មវិធីបុណ្យ ដែលរៀបចំនៅក្នុងថ្ងៃ ១៥កើត ពេញបូណ៌មី ខែពិសាខ ត្រូវនឹងថ្ងៃទី១ ខែឧសភា ឆ្នាំ២០២៦ មានរបៀបវារៈដូចជា៖

*នមស្សការព្រះរតនត្រ័យ សមាទានសីល
*ពិធីនាងសុជាតាថ្វាយមធុបាយាស
*សូត្រពុទ្ធជ័យមង្គល
*ប្រកាសវិសាខបូជា
*សូត្រនមោ៨បទ
*នមស្សការវិសាខបូជា
*សូត្រធម្មនិយាម៣០
*ផ្សាយមេត្តាធម៌ និងមានការបណ្តែតប្រទីប ផងដែរ។

បុណ្យវិសាខបូជា គឺជាទិវាប្រវត្តិសាស្ត្រដ៏សំខាន់សម្រាប់ពុទ្ធសាសនិកជនទូទាំងពិភពលោក ដែលប្រារព្ធឡើងជារៀងរាល់ឆ្នាំនៅ ថ្ងៃពេញបូណ៌មី ខែពិសាខ ដើម្បីរំលឹកដល់ ថ្ងៃប្រសូត ថ្ងៃត្រាស់ដឹង និងថ្ងៃចូលបរិនិព្វានរបស់ព្រះសម្មាសម្ពុទ្ធ។ ព្រឹត្តិការណ៍ទាំងបីនេះបានកើតឡើងនៅថ្ងៃតែមួយ ខុសគ្នាតែឆ្នាំប៉ុណ្ណោះ។ អង្គការសហប្រជាជាតិ បានកំណត់យកថ្ងៃនេះជា ទិវាអន្តរជាតិ ចាប់តាំងពីឆ្នាំ១៩៩៩មកម្ល៉េះ ដោយទទួលស្គាល់ពីការរួមចំណែករបស់ព្រះពុទ្ធសាសនាក្នុងការលើកស្ទួយចិត្តវិញ្ញាណមនុស្សជាតិ។ ពុទ្ធបរិស័ទតែងប្រារព្ធពិធីដោយការដើរហែរប្រទក្សិណ ថ្វាយផ្កា ស្ដាប់ធម្មទេសនា និងយកធម៌ទៅប្រតិបត្តិក្នុងជីវិតប្រចាំថ្ងៃ៕