(ភ្នំពេញ)៖ លោក ចេង មុនីរ៉ា អភិបាល និងជាប្រធានគណៈបញ្ជាការឯកភាពរដ្ឋបាលខណ្ឌសែនសុខ នៅព្រឹកថ្ងៃទី០២ ខែឧសភា ឆ្នាំ២០២៦ បានជួបសំណេះសំណាលជាមួយកងកម្លាំងនគរបាល នៃអធិការដ្ឋាននគរបាលខណ្ឌសែនសុខ និងកម្លាំងមូលដ្ឋានកងរាជអាវុធហត្ថខណ្ឌសែនសុខ ដើម្បីពង្រឹងការងាររក្សាសន្តិសុខ សុវត្ថិភាព ការរៀបចំសណ្តាប់ធ្នាប់ ការសម្រួលចរាចរណ៍ ការបង្ការទប់ស្កាត់អគ្គិភ័យ និងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា(Online Scams) ។

នាឱកាសនោះ លោក ចេង មុនីរ៉ា បានដាក់ចេញនូវិធានការដែលត្រូវអនុវត្តបន្ត ត្រូវរួមគ្នាអនុវត្តគោលនយោបាយភូមិ សង្កាត់ មានសុវត្ថិភាព ឱ្យមានប្រសិទ្ធភាព ជាពិសេសត្រូវរួមគ្នាអនុវត្តបទបញ្ជា ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឱ្យបានម៉ឺងម៉ាត់បំផុត ក្នុងការលប់បំបាត់ល្បែងស៉ីសង ល្បែងតាមអនឡាញគ្រប់ប្រភេទ និងត្រូវរួមគ្នាលុបបំបាត់សកម្មក្មេងទំនើងឱ្យមានប្រសិទ្ធិភាព ចុះត្រួតពិនិត្យជាប្រចាំនៅតាមសាលារៀន តាមហាងកាហ្វេ តាមវត្តអារាម និងនៅតាមភូមិសាស្ត្រងាយរងគ្រោះដោយក្រុមក្មេងទំនើងជួបជុំប្រមូលផ្តុំ។

ប្រធានគណៈបញ្ជាការឯកភាពរដ្ឋបាលខណ្ឌសែនសុខ បានសង្កត់ធ្ងន់ថា ការងារសន្តិសុខនេះ ជាកត្តាសំខាន់ណាស់ ដែលមិនអាចខ្វះបាន ហើយមនុស្សគ្រប់គ្នា គ្រប់ស្រទាប់វណ្ណៈ មិនថាអ្នកមាន ឬអ្នកក្រនោះទេ គឺចង់បានមូលដ្ឋានមានសន្តិសុខល្អ រស់នៅក្នុងភាពសុដមរម្យនា។ កងកម្លាំង ត្រូវរួមគ្នាខិតខំអនុវត្តឱ្យមានប្រសិទ្ធភាព ក្នុងចុះការងាររៀបចំសណ្តាប់ធ្នាប់សាធារណៈឱ្យបានល្អប្រសើរថែមទៀត។ ចំណុចមួយទៀត ពេលសិស្សចេញពីរៀន កងកម្លាំងចុះជួយសម្រួលចរាចរ នៅតាមសាលារៀនទាំងអស់ ដើម្បីសុខសុវត្ថិភាពសិស្ស និងអ្នកដំណើរលើដងផ្លូវ។

ជាមួយគ្នានេះ លោក ចេង មុនីរ៉ា ក៏បានកោតសសើរដល់កងកម្លាំងទាំងអស់ របស់គណៈបញ្ជាការឯកភាពខណ្ឌ បានសហការគ្នាល្អ ក្នុងការចុះជួយអន្តរាគមន៍ ពេលមានគ្រោះអគ្គិភ័យ ការពារសន្តិសុខសណ្តាប់ សាធារណៈបានល្អប្រសើរ ដើម្បីផ្តល់សេចក្តីសុខជូនប្រជាពលរដ្ឋ សូមកងកម្លាំងទាំងអស់ ត្រូវអនុវត្តឱ្យបានម៉ឺងម៉ាត់បំផុត តាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត ក្នុងការលុបបំបាត់ល្បែងស៉ីសងគ្រប់ប្រភេទ និងសកម្មភាពក្មេងទំនើង នៅក្នុងមូលដ្ឋាន៕