(កំពង់ចាម)៖ លោក អះម៉ាត់ ម៉ូស្តាហ្វា មន្ត្រីកសិកម្មឃុំអារក្សត្នោត ស្រុងស្ទឹងត្រង់ ខេត្តកំពង់ចាម បានប្រាប់អង្គភាពសារព័ត៌មាន Fresh News ថា ទុរេននៅស្រុកស្ទឹងត្រង់ ខេត្តកំពង់ចាម អាចប្រមូលផលយឺតជាងឆ្នាំមុនមួយខែ ដោយសារបម្រែបម្រួលអាកាសធាតុ ពោលគឺនឹងប្រមូលផលចុងខែនេះ។

ជាការកត់សម្គាល់របស់លោកផ្ទាល់, ទុរេននាំនេះគឺល្អធម្មតា មិនមានការថយចុះទិន្នផលនោះទេ គ្រាន់តែថារយៈពេលនៃការប្រមូលផលគឺយឺតជាងឆ្នាំមុនជិតមួយខែ ដោយសារតែឆ្នាំនេះ ទុរេនចេញផ្កាយឺតជាងឆ្នាំមុន ដោយសារតែអាកាសធាតុប្រែប្រួល ធ្លាក់ភ្លៀងច្រើន។

លោក បានបញ្ជាក់ផងដែរពីពូជទុរេនដែលកសិករនៅមូលដ្ឋានរបស់លោកនិយមដាំ មានដូចជា ពូជ Musang king និងពូជ ម៉នថង។ ចំពោះពូជ Musang king កសិករកំពុងតែចាប់ផ្ដើមប្រមូលផលហើយ ក៏ប៉ុន្តែពូជនេះមិនសូវមានអ្នកដាំច្រើនទេ ដោយឡែកពូជ ម៉នថង ជាពូជដែលគេនិយមដាំ ហើយនៅក្នុងចុងខែឧសភានេះ ទុរេនអាចនឹងចាប់ផ្ដើមប្រមូលផលច្រើនហើយ។

សូមជម្រាបថា ក្នុងខេត្តកំពង់ចាម មានផ្ទៃដីដាំដុះទុរេនប្រមាណ ១,៨៤៩ហិចតា ដែលអាចទទួលបានទិន្នផលក្នុងរង្វង់ ១២,៧៣៨.៥តោន ស្មើនឹង ១១.៤២%នៃផ្ទៃដីសរុប ខណៈដែលផ្ទៃដីដាំដុះសរុបទូទាំងប្រទេសមានប្រមាណ ១៦,១៩៣ហិចតា៕