(ស្វាយរៀង)៖ លោកបណ្ឌិត សៅ សុវណ្ណី អនុប្រធានក្រុមការងារគណបក្សប្រជាជនកម្ពុជា ចុះជួយស្រុករំដួល នៅព្រឹកថ្ងៃទី២ ខែឧសភា ឆ្នាំ២០២៦នវ បានអញ្ជើញចូលរួមបុណ្យផ្កាប្រាក់សាមគ្គី ពិសាខបូជា និង សម្ពោធឆ្លងសាលាឆាន់ និងសមិទ្ធផលនានាដែលមានតម្លៃប្រមាណ ៤៥ម៉ឺនដុល្លារ នៅវត្តបុសផ្លាំង ឃុំបុសមន ស្រុករំដួល ខេត្តស្វាយរៀង។

ពិធីនេះក៏មានការចូលរួមពីលោកបណ្ឌិត ហាន បូរិន ប្រធានក្រុមការងារសាខាសមាគមសិស្សនិស្សិតបញ្ញវន្តក្មេងវត្ត ខណ្ឌព្រែកព្នៅ និងក្រុមការងារ លោកមេឃុំបុស មន អាជ្ញាធរដែនដីកងកម្លាំង និងប្រជាពលរដ្ឋប្រមាណ ៣០០ នាក់ផងដែរ។

ក្នុងឱកាសនោះលោកបណ្ឌិត សៅ សុវណ្ណី បានថ្លែងនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែនប្រធានគណបក្សប្រជាជនកម្ពុជា និងសម្ដេចធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា, សម្ដេចកិត្តិសង្គហបណ្ឌិត ម៉ែន សំអន ប្រធានក្រុមការងារគណបក្សប្រជាជនកម្ពុជាចុះជួយខេត្តស្វាយរៀងជូនដល់បងប្អូនប្រជាពលរដ្ឋ អាជ្ញាធរដែនដី នៅស្រុករំដួល ខេត្តស្វាយរៀងផងដែរ។

លោកបណ្ឌិតបានគូសបញ្ជាក់ថា សាលាឆាន់ដ៏ថ្មីស្រឡាងនៅចំពោះមុខយើងនេះ គឺជាសមិទ្ធផលបានមកពីកម្លាំងមហាសាមគ្គីគ្នា ក្នុងនោះរូបលោក និងក្រុមគ្រួសារ ក៏បានចូលរួមបច្ច័យកសាងមួយចំនួនធំផងដែរ ព្រមទាំងមានការចូលរួមជាមួយពុទ្ធបរិស័ទជិតឆ្ងាយ ទើបកសាងរួចរាល់ជាស្ថាពរ ដូចនេះ សូមលោកយាយ លោកតា អ៊ំពូមីង បងប្អូនពុទ្ធបរិស័ទទាំងអស់ សូមចូលរួមថែរក្សា ឲ្យបានគង់វង្សយូរអង្វែង សម្រាប់កូនចៅជំនាន់ក្រោយៗប្រើប្រាស់ជាសម្បត្តិរួម។

លោកបណ្ឌិតបានបន្តថា សមិទ្ធិផលដែលលេចធ្លោនាពេលនេះ គឺដោយសារប្រទេសជាតិទទួលបានសុខសន្តិភាព ស្ថេរភាពនយោបាយ ក្រោមគោលនយោបាយ ឈ្នះឈ្នះ របស់សម្តេចតេជោ ហ៊ុន សែន អតីតជានាយករដ្ឋមន្ត្រីនៃកម្ពុជា បច្ចុប្បន្នជាប្រធានព្រឹទ្ធសភា និងជាប្រធានគណបក្សប្រជាជនកម្ពុជា បន្តវេនដោយសម្ដេចមហាបបវរធិបតី ហ៊ុន ម៉ាណែតជានាយករដ្ឋមន្ត្រីនៃកម្ពុជា បានបន្តយកចិត្តទុកដាក់ ក្នុងការអភិវឌ្ឍប្រទេសជាតិឲ្យមានការរីកចម្រើនជាបន្តបន្ទាប់។

លោកបណ្ឌិតបន្តថា ប្រទេសជាតិត្រូវបានស្តារ និងអភិវឌ្ឍន៍ឡើងវិញ ចាប់ពីលេខសូន្យ រហូតមានការរីកចម្រើនមកទល់សព្វថ្ងៃ ទាំងវិស័យពុទ្ធចក្រ និងអាណាចក្រ, គោលនយោបាយយុទ្ធសាស្ត្របញ្ចាកោណដំណាក់កាលទី១ របស់រាជរដ្ឋាភិបាលក្នុងអាណត្តិរបស់សម្ដេចធិបតី ហ៊ុន ម៉ាណែត បានយកចាត់ទុកដាក់វិស័យជាអាទិភាពមាន៥សំខាន់ គឺ ផ្លូវ ទឹក ភ្លើង ធនធានមនុស្ស និងបច្ចេកវិទ្យាឌីជីថល ជាកត្តាសំខាន់ក្នុងការអភិវឌ្ឍន៍ប្រទេសជាតិ កាត់បន្ថយភាពក្រីក្ររបស់ប្រជាពលរដ្ឋ។

លោកបណ្ឌិតបានបញ្ជាក់ថា សេរីភាពខាងជំនឿសាសនា ពិតជាត្រូវបានរាជរដ្ឋាភិបាលយកចិត្តទុកដាក់ លើកកម្ពស់ និងផ្តល់សិទ្ធិជូនប្រជាពលរដ្ឋទាំងអស់ គោរពប្រតិបត្តិតាមជំនឿរៀងៗខ្លួន ហើយក្នុងនោះដែរ ប្រទេសកម្ពុជាយើងបានចាត់ទុកសាសនាព្រះពុទ្ធគឺជាសាសនារបស់រដ្ឋ គឺសំដៅរួមគ្នាកសាង សន្តិភាព ផ្លូវចិត្ត ពីព្រោះសាសនា ជាចលករដ៏សំខាន់ ក្នុងការជម្រុញឲ្យមានការអភិវឌ្ឍន៍ ប្រកបដោយនិរន្តរភាព រួមចំណែកជាមួយរាជរដ្ឋាភិបាលកម្ពុជា។

លោកបណ្ឌិត បានថ្លែងអំណរគុណចំពោះព្រះគ្រូចៅអធិការវត្តបុស្សផ្លាំង ព្រះសង្ឃគ្រប់ព្រះអង្គ លោកគ្រូអាចារ្យគណៈកម្មការវត្ត ព្រមទាំងពុទ្ធបរិស័ទ​ សប្បុរសជន​ទាំងក្នុង និង ក្រៅប្រទេស ដែលមានសទ្ធាជ្រះថ្លាដ៏បរិសុទ្ធ រួមគ្នាកសាងសាលាឆាន់ និងសមិទ្ធិផលនានា ក្នុងវត្តបុសផ្លាំងនេះឡើងទុកជាសម្បត្តិនៃព្រះពុទ្ធសានា។

លោកបណ្ឌិតសៅ សុវណ្ណី បានផ្តាំផ្ញើដល់អាជ្ញាធរមូលដ្ឋាន ជាពិសេសពុទ្ធបរិស័ទចំណុះជើងវត្តបុសផ្លាំង ជួយថែរក្សាការពារ និងជួយផ្គត់ផ្គង់ដល់ព្រះសង្ឃ ព្រមទាំងចូលរួមដោះស្រាយបញ្ហាប្រឈម ក៏ដូចជាសំណូមពរនានារបស់បងប្អូនប្រជាពលរដ្ឋឲ្យកាន់តែល្អប្រសើរបន្ថែមទៀត និងសូមសំណូមពរដល់អាជ្ញាធរនិងសមត្ថកិច្ចគ្រប់ជាន់ថ្នាក់ត្រូវសហការបង្ការទប់ស្កាត់ និងបង្ក្រាបបទល្មើស អំពើចោរកម្ម គ្រឿងញៀន ក្មេងទំនើង scam online និងរួមគ្នាគោរពច្បាប់ចរាចរណ៍បានឲ្យបានភ្ជាប់ខ្ជួន។

សូមបញ្ជាក់ថា នៅក្នុងឱកាសនោះ លោកបណ្ឌិត សៅ សុវណ្ណី និងក្រុមការងារក៏បានចូលបច្ច័យកសាងវត្តនិងឧបត្ថម្ភក្នុងកម្មវិធីសរុបបច្ច័យចំនួន ២០៥០ដុល្លារ និងផ្តល់អំណោយអាហារូបករណ៍ ថ្នាក់បរិញ្ញាបត្រចំនួន ៥០កន្លែង របស់លោកបណ្ឌិត ហាន បូរិន ព្រមទាំងចុះពិនិត្យអាគារសិក្សានៅសាលាបឋមសិក្សាបុសមន និងអនុវិទ្យាល័យ សៅ យ៉ាត បុសមនផងដែរ៕