(សៀមរាប)៖ នៅថ្ងៃទី២ ខែឧសភា ឆ្នាំ២០២៦នេះ សភាកម្ពុជា បានសហការណ៍ជាមួយសភាប្រើភាសាបារាំង និងអង្គការអន្តរជាតិហ្វ្រង់កូហ្វូនី បានរៀបចំសិក្ខាសាលា ស្ដីពី «ក្របខ័ណ្ឌ និងការប្រើប្រាស់ឌីជីថល និងបញ្ញាសិប្បនិម្មិតនៅក្នុងសភា» ដែលសភាកម្ពុជាធ្វើជាម្ចាស់ផ្ទះ ទទួលរៀបចំកិច្ចប្រជុំក្រុមការងារសើរើលក្ខន្ដិកៈ និងគណៈកម្មការនយោបាយនៃសភាប្រើភាសាបារាំង នៅលើទឹកដីខេត្តសៀមរាប-អង្គរ ដែលជាបេះដូងនៃវប្បធម៌ដ៏សម្បូរបែប នៃព្រះរាជាណាចក្រកម្ពុជា។

សិក្ខាសាលានេះ មានរយៈពេល ៣ថ្ងៃ ពីថ្ងៃទី២ ដល់ទី៤ ខែឧសភានៅសណ្ឋាគារអង្គរប៉ារ៉ាឌី ក្រុងសៀមរាប ស្ថិតក្រោមអធិបតេយ្យភាពរបស់លោក ឈាង វ៉ុន ប្រធានគណៈកម្មាការសេដ្ឋកិច្ច ហិរញ្ញវត្ថុធនាគារ និងសវនកម្មនៃរដ្ឋសភា ជាអនុប្រធានក្រុមសភាជាតិកម្ពុជានៃសភាប្រើភាសាបារាំង និងជាប្រធានគណៈអធិបតីនៃអង្គសិក្ខាសាលា ព្រមទាំងមានវត្តមាន លោក លោកស្រី សមាជិកសភាជាតិ និងអន្តរជាតិ លោក Guillaume Chevrollier (ហ្គោយ៉ូម សេវ្រ៉ូលីយ៉េ) តំណាងសភាប្រើភាសាបារាំង និងលោកស្រី Julia Tortel (ជូលីយ៉ា តូរ៍តែល) តំណាងអង្គការអន្តរជាតិហ្វ្រង់កូហ្វូនី ព្រមទាំងវត្តមាន លោក ប្រាក់ សោភ័ណ អភិបាលខេត្តសៀមរាប លោក លោកស្រី អគ្គលេខាធិការនៃសភាប្រើភាសាបារាំង អគ្គរដ្ឋទូត និងតំណាងទូត ព្រមទាំងវាគ្មិន ។

លោក ខេង សិទ្ធិគុណ អគ្គលេខាធិការរងព្រឹទ្ធសភានៃព្រះរាជាណាចក្រកម្ពុជា បានមានប្រសាសន៍ឳ្យដឹងថា៖ នេះជាឳកាសដំបូងបង្អស់ ដែលសភាកម្ពុជា បានសហការណ៍ជាមួយសភាប្រើភាសាបារាំង និងអង្គការអន្តរជាតិហ្វ្រង់កូហ្វូនី បានរៀបចំសិក្ខាសាលា ស្ដីពី «ក្របខ័ណ្ឌ និងការប្រើប្រាស់ឌីជីថល និងបញ្ញាសិប្បនិម្មិតនៅក្នុងសភា» ដែលសភាកម្ពុជាធ្វើជាម្ចាស់ផ្ទះ ហើយកកាលពូឆ្នាំ២០២៤ សភាកម្ពុជាបានសហការជាមួយសភាប្រើភាសាបារាំង មូលនិធិកាណាដាពិភពលោក និងមជ្ឈមណ្ឌលសភាអាស៊ីរៀបចំសិក្ខាសាលា ស្ដីពី «ការតម្កល់ឯកសារ ការចងក្រងឯកសារ និងការស្រាវជ្រាវវិទ្យាសាស្ត្រនៅក្នុងសភា»។

លោកបានគូសបញ្ជាក់ថា៖ ក្នុងរយៈពេលជាច្រើនឆ្នាំកន្លងមកនេះ សភាកម្ពុជា មានកិច្ចសហប្រតិបត្តិការជិតស្និទ្ធ និងរឹងម៉ាំជាមួយសភាប្រើភាសាបារាំង ដែលបានស្ដែងចេញតាមរយៈការរៀបចំសិក្ខាសាលាជាច្រើនលើក សម្រាប់សមាជិកសភា និងមន្ត្រីអគ្គលេខាធិការដ្ឋានសភា ដោយផ្ដោតលើប្រធានបទសំខាន់ៗ ជាអាទិ៍÷ ថវិកាជាតិ ការទូសសភា ស្វ័យភាពសេដ្ឋកិច្ចរបស់ស្ត្រីនៅតាមជនបទ វិធីសាស្ត្រសម្របសម្រួលក្នុងកិច្ចការសភា និងការចុះបញ្ជីអត្រនុកូលដ្ឋាននៅកម្ពុជា ជាដើម ដែលសុទ្ធសឹងតែជាប្រធានបទដ៏សំខាន់សម្រាប់ការអភិវឌ្ឍស្ថាប័ននីតិប្បញ្ញត្តិ ។

ក្នុងនាមអគ្គលេខាធិការដ្ឋានសភាទាំងពីរ ពិតជាសូមថ្លែងអំណរគុណយ៉ាងជ្រាលជ្រៅបំផុត ចំពោះដៃគូរកិច្ចសហប្រតិបត្តិការទាំងអស់ ដែលបាននិងកំពុងបន្តជួយគាំទ្រយ៉ាងសកម្មក្នុងការរៀបចំសិក្ខាសាលានេះឡើង។ ទោះបីជាស្ថានភាពពិភពលោក និងក្នុងតំបន់កំពុងតែជួបនូវភាពតានតឹងយ៉ាងណាក៏ដោយ ក៏កិច្ចខិតខំប្រឹងប្រែងរួមគ្នានេះ បានក្លាយជាសក្ខីភាពមិនអាចកាត់ថ្លៃបាន និងបង្ហាញពីស្មារតីចំណងមិត្តភាព សាមគ្គីភាពដ៏រឹងម៉ាំ និងកិច្ចសហប្រតិបត្តិការដ៏ល្អប្រសើររវាងស្ថាប័នយើង ៕