(ព្រៃវែង)៖ នៅថ្ងៃទី១ ខែឧសភា ឆ្នាំ២០២៦ ត្រូវនឹងថ្ងៃ ១៥កើត ខែវិសាខ ដែលជាថ្ងៃបុណ្យវិសាខបូជា ព្រះសង្ឃគ្រប់ព្រះអង្គ រួមជាមួយថ្នាក់ដឹកនាំរដ្ឋបាលខេត្ត និងពុទ្ធបរិស័ទយ៉ាងច្រើនកុះករទូទាំងខេត្តព្រៃវែង បានរៀបចំដង្ហែក្បួនយ៉ាងអធិកអធម ដើម្បីអបអរសាទរ និងរំលឹកដល់គណព្រះសម្មាសម្ពុទ្ធបរមគ្រូ។

ព្រះខេមរញណ ភី យ៉ា ព្រះជាគណៈថ្នាក់កិត្តិយស និងជាព្រះវិន័យធរគណខេត្ត ព្រះអនុគណក្រុងព្រៃវែង និងជាព្រះចៅអធិការវត្តសុវណ្ណរង្សី មានសង្ឃដីការថា បុណ្យវិសាខបូជា ជាបុណ្យមួយយ៉ាងធំក្នុងព្រះពុទ្ធសាសនា សម្រាប់រំលឹកដល់ព្រះពុទ្ធសមណគោត្តមបរមគ្រូ នាថ្ងៃពេញបូណ៌មី ថ្ងៃ១៥កើត ខែវិសាខ ដែលពុទ្ធសាសនិកទាំងព្រះសង្ឃ ទាំងគ្រហស្ថតែងធ្វើសក្ការបូជាប្រកបដោយជំនឿថាជាមហាកុសលដ៏ប្រសើរ។

មិនតែប៉ុណ្ណោះ ពិធីបុណ្យវិសាខបូជា គឺជាព្រឹត្តិការណ៍សាសនាអន្តរជាតិដ៏ធំមួយ ដែលមានសារៈសំខាន់សម្រាប់ពុទ្ធសាសនិកជន និងប្រជាជនដែលមានជំនឿចំពោះព្រះពុទ្ធសាសនា ជុំវិញពិភពលោក។ រីឯប្រទេសកម្ពុជាវិញ បានចាត់ទុកព្រះពុទ្ធសាសនាជាសាសនារបស់រដ្ឋ ព្រមទាំងត្រូវបានពុទ្ធបរិស័ទ នាំគ្នាប្រារព្ធពិធីបុណ្យវិសាខបូជានេះយ៉ាងអធិកអធម តាមវត្តអារាមនានានៅទូទាំង ប្រទេស ប្រកបដោយសេចក្ដីជ្រះថ្លាយ៉ាងក្រៃលែង។

ព្រះអង្គបន្តថា ពិធីបុណ្យវិសាខបូជាជាពិធីបុណ្យដ៏ធំបំផុតនិងមានសារៈសំខាន់ក្នុងព្រះពុទ្ធសាសនា ដែលប្រារព្ធធ្វើឡើងដើម្បីរំលឹកដល់ថ្ងៃ ព្រះអង្គប្រសូត្រ ត្រាស់ដឹង និងថ្ងៃចូល បរិនិពាន្វ របស់ព្រះសមណគោត្តម ដែលជាព្រះសម្មាសម្ពុទ្ធបរមគ្រូនៃយើង ដោយព្រឹត្តិការណ៍នេះ កើតឡើងនៅចំថ្ងៃពេញបូណ៌មី១៥កើត ខែពិសាខតែមួយ ខុសគ្នាតែឆ្នាំប៉ុណ្ណោះ។

ជាធម្មតាក្នុងថ្ងៃវិសាខបូជា ប្រជាពុទ្ធសាសនិកតែងតែធ្វើដំណើរទៅវត្តណាមួយដែលខ្លួនពេញចិត្ត ដើម្បីចូលរួមក្នុងការប្រារព្ធពិធី មានការដើរហែប្រទក្សិណជុំវិញព្រះវិហារ ការថ្វាយគ្រឿងសក្ការៈបូជាមានទៀនធូប ផ្កាភ្ញី និងការសូត្រធម៌រំឭកសរសើរ ការស្តាប់ធម្មទេសនាជាដើម។

កិច្ចការទាំងនេះត្រូវបានពុទ្ធសាសនិកជឿថា ជាមហាកុសលដ៏ថ្លៃថ្លានិងទទួលបាន នូវអានិសង្ស ដែលកើតមកពីការធ្វើបុណ្យ ធ្វើទាន និងរក្សាសីលជាដើម៕