(ភ្នំពេញ)៖ នាថ្ងៃទី២ ខែឧសភា ឆ្នាំ២០២៦នេះ អ្នកតំណាងរាស្ដ្រមណ្ឌលរាធានីភ្នំពេញ លោកសាស្ដ្រាចារ្យ ម៉ម ប៊ុនហេង បានចុះជួបសំណេះសំណាលសួរសុខទុក្ខ និងពិនិត្យស្ថានភាពជំងឺរបស់អ្នកជំងឺ ដែលបានមកសម្រាកព្យាបាលនៅមន្ទីរពេទ្យបង្អែកមិត្ដភាពកម្ពុជា-ចិន សែនសុខ និងមន្ទីរពេទ្យជាតិ តេជោសន្ដិភាព។

ក្នុងឱកាសចុះសំណេះសំណាលនេះដែរ លោកសាស្ដ្រាចារ្យ ម៉ម ប៊ុនហេង ក៏បានណែនាំដល់ក្រុមគ្រូពេទ្យ បន្ដយកចិត្ដទុកដាក់ និងតាមដានស្ថានភាពអ្នកជំងឺឱ្យបានកាន់តែល្អប្រសើរ ប្រកបដោយភាពច្បាស់លាស់ និងរហ័សទាន់ចិត្ដ ដើម្បីផ្ដល់ភាពកក់ក្ដៅ និងទំនុកចិត្ដកាន់តែខ្ពស់បន្ថែមទៀតដល់អ្នកជំងឺ និងគ្រួសារអ្នកជំងឺ។

ការសំណេះសំណាលអ្នកជំងឺប្រកបដោយភាពកក់ក្ដៅខាងលើនេះ អ្នកជំងឺ និងគ្រួសារអ្នកជំងឺ បានសម្ដែងនូវការរំភើបចិត្ដជាខ្លាំងចំពោះការយកចិត្ដទុកដាក់ និងទឹកចិត្ដរបស់លោកសាស្ដ្រាចារ្យ ម៉ម ប៊ុនហេង ដែលតែងតែមានវត្ដមានលោកសាស្ដ្រាចារ្យ ចុះមកពិនិត្យការបម្រើសេវាសុខាភិបាលនៅតាមមន្ទីរពេទ្យរហូតមក ទោះក្នុងកាលៈទេសៈណាក៏ដោយ ដែលជាអ្វីដែលប្រជាពលរដ្ឋគ្រប់រូបត្រូវការ និងកក់ក្ដៅជាទីបំផុតនៅក្នុងចិត្ដ។

ជាមួយគ្នានេះក្រុមគ្រូពេទ្យនៃមន្ទីរពេទ្យខាងលើ ក៏បានបង្ហាញនូវការសប្បាយរីករាយ និងថ្លែងអំណរគុណដល់លោកសាស្ដ្រាចារ្យ ម៉ម ប៊ុនហេង ដែលបានអញ្ជើញចុះមកសួរសុខទុក្ខអ្នកជំងឺ និងក្រុមគ្រូពេទ្យជានិច្ច ពិសេសបានមានប្រសាសន៍ណែនាំ ចង្អុលបង្ហាញផ្ទាល់ៗនៃរបៀបថែទាំ ព្យាបាល អ្នកជំងឺដល់ក្រុមគ្រូពេទ្យ ដែលជាចំណេះជំនាញមួយក្រើនរម្លឹកនូវចំណុចខ្វះខាតដែលអាចកើតមានឡើងនៅក្នុងប្រការណាមួយ។

គូររម្លឹកថាអ្នកតំណាងរាស្ដ្រមណ្ឌលភ្នំពេញ លោកសាស្រ្ដាចារ្យ ម៉ម ប៊ុនហេង តែងតែចុះសំណេះសំណាលសួរសុខទុក្ខអ្នកជំងឺ ជាញឹកញាប់ ដើម្បីផ្ដល់ជាការកម្លាំងចិត្ដ ក៏ដូចជាលើកទឹកចិត្ដដល់អ្នកជំងឺ និងគ្រួសារអ្នកជំងឺ ក្រៅពីចុះការពិនិត្យមើលការបម្រើសេវាសុខាភិបាលរបស់ក្រុមគ្រូពេទ្យ ជូនដល់ប្រជាជន៕