មានការលួចនាំចូលជ្រូកពីប្រទេសជិតខាងដោយខុសច្បាប់ ខណៈសមាគមអ្នកចិញ្ចឹមសត្វថា ជ្រូកក្នុងស្រុកអាចផ្គត់ផ្គង់គ្រប់គ្រាន់ ហើយជ្រូកដែលលួចនាំចូលនេះ ភាគច្រើនមានប្រភពដើមមកពីថៃ (Video inside)
03-05-2026 12:57
(ព្រះវិហារ)៖ មន្ត្រីជំនាញរបស់អគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយមន្ត្រីនៃមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ នៅថ្ងៃទី១ ខែឧសភា ឆ្នាំ២០២៦ បានចុះប្រតិបត្តិការត្រួតពិនិត្យជាក់ស្ដែងលើការដឹកជញ្ជូនសត្វ និងផលិតផលសត្វ នៅលើផ្លូវម្លូព្រៃ ខាងមុខមន្ទីរសេដ្ឋកិច្ច និងហិរញ្ញវត្ថុ ត្រង់ចំណុចសង្កាត់ប្រណាក ក្រុងព្រះវិហារ ខេត្តព្រះវិហារ។
ក្នុងប្រតិបត្តិការនោះ បានធ្វើការឃាត់រថយន្ត ១គ្រឿង ម៉ាក HYUNDIA ពាក់ស្លាកលេខភ្នំពេញ 3H-3878 ដឹកសត្វជ្រូករស់ចំនួន ១៧០ក្បាល នាំចេញពីប្រទេសឡាវ មកកាន់ព្រះរាជាណាចក្រកម្ពុជា តាមច្រកកំពង់ស្រឡៅ ស្រុកឆែប ខេត្តព្រះវិហារ ឆ្ពោះទៅលក់ចែកចាយបន្តនៅស្រុករវៀង ខេត្តព្រះវិហារ។
ក្រោយពីមន្ត្រីជំនាញបាន ពិនិត្យជាក់ស្តែងឃើញថា ការដឹកជញ្ជូនជ្រូករស់ខាងលើ ពុំមានលិខិតអនុញ្ញាតឱ្យនាំចូលពីក្រសួងកសិកម្ម រុក្ខាប្រមាញ់ និងនេសាទ ដែលផ្ទុយទៅនឹងច្បាប់ស្ដីពីសុខភាពសត្វ និងផលិតកម្មសត្វ។
ជាមួយគ្នានេះដែរ មន្ត្រីជំនាញបាននាំយកវត្ថុតាងមករក្សាទុកនៅចត្តាឡីស័ករបស់មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ដើម្បីចាត់វិធានការតាមនីតិវិធីច្បាប់។
ថ្លែងប្រាប់អង្គភាពសារព័ត៌មាន Fresh News នៅថ្ងៃទី៣ ខែឧសភា ឆ្នាំ២០២៦នេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបាន បញ្ជាក់ថា ជ្រូករស់ ១៧០ក្បាលដែលអគ្គនាយកដ្ឋានសុខភាពសត្វបានឃាត់នេះ ជាជ្រូកនាំពីថៃឆ្លងកាត់តាមច្រកឡាវ មកកាន់កម្ពុជា។
ដោយ លោក ស្រ៊ុន ពៅ បានបញ្ជាក់ថា «ជ្រូកនេះថ្វីដ្បិតតែដឹកជញ្ជូនតាមច្រកឡាវមកកម្ពុជាពិតមែន តែឡាវមិនទាន់មានសមត្ថភាពនាំជ្រូកចេញនៅឡើយ ដែលភាគច្រើនជ្រូកនោះជាជ្រូកឆ្លងកាត់ពីថៃតាមច្រកព្រំដែនឡាវ ឆ្ពោះមកកម្ពុជា»។
លោកសំណូមពរដល់បងប្អូនអ្នកនាំចូលសត្វទាំងអស់ សូមបង្វែរពីការនាំចូលមកកម្ពុជា ទៅជារួមគ្នាចិញ្ចឹមសត្វក្នុងស្រុក មិនត្រឹមតែសត្វជ្រូកទេ រួមទាំងមាន់ ទា គោ ជាដើម ព្រោះការនាំចូលមិនអាចឱ្យប្រទេសជាតិ របស់យើងជឿនលឿនបានទេ លុះត្រាតែយើងអាចធ្វើបានដោយខ្លួនឯង ទើបយើងរីកចម្រើន៕
សូមស្តាប់ការលើកឡើងរបស់លោក ស៊្រុន ពៅ៖
