(កែប)៖ លោកបណ្ឌិត សោម ពិសិដ្ឋ អភិបាលខេត្តកែប បានទទូចឱ្យមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ ចូលរួមសហការយ៉ាងរឹងមាំបោសសំអាតបទល្មើស ឆបោកតាមប្រព័ន្ធបច្ចេកវិទ្យា Scam Online ឱ្យអស់ពីមូលដ្ឋាន។

លោកបណ្ឌិត សោម ពិសិដ្ឋ បានបញ្ជាក់ថា បទល្មើសឆបោកតាមប្រព័ន្ធបច្ចេកវិទ្យា (Online Scams) មិនត្រឹមតែជាអន្ទាក់ឆក់ប្លន់យកទ្រព្យសម្បត្តិដែលជាញើសឈាមរបស់ប្រជាពលរដ្ឋប៉ុណ្ណោះទេ តែវាកំពុងបំផ្លាញកិត្តិយស សេចក្តីថ្លៃថ្នូរ និងមុខមាត់ដ៏ស្រស់ត្រកាលរបស់ប្រទេសជាតិយេីង។

លោកបណ្ឌិត សោម ពិសិដ្ឋ បានគូសបញ្ជាក់ថា៖ «ក្នុងន័យនេះ ខ្ញុំសូមអំពាវនាវយ៉ាងទទូចដល់ មន្ត្រីរាជការ កងកម្លាំង ប្រដាប់ អាវុធ គ្រប់ប្រភេទ បងប្អូនប្រជាពលរដ្ឋ និងសាធារណជនទាំងអស់ក្នុងភូមិសាស្ត្រខេត្តកែប មេត្តាចូលរួមសហការយ៉ាងមុតមាំជាមួយអាជ្ញាធរមានសមត្ថកិច្ច ដើម្បីរួមគ្នាទប់ស្កាត់ និងបោសសម្អាតឧក្រិដ្ឋកម្មនេះឱ្យអស់ពីមូលដ្ឋានរបស់យើង»។

ជាមួយគ្នានេះដែរ លោកបណ្ឌិត សោម ពិសិដ្ឋ បានអំពាវនាវសូមបងប្អូនបង្កើនការប្រុងប្រយ័ត្នខ្ពស់ ដោយកុំងាយជឿ កុំចុចតំណភ្ជាប់ (Links) ផ្តេសផ្តាស កុំផ្ទេរប្រាក់ទៅជនអនាមិក និងត្រូវរាយការណ៍ជាបន្ទាន់ជូនអាជ្ញាធរមូលដ្ឋាន ក្នុងករណីប្រទះឃើញទីតាំង ឬសកម្មភាពសង្ស័យណាមួយ ដេីម្បី ឱ្យគណៈបញ្ជាការឯកភាពរដ្ឋបាលខេត្ត និង ស្ថាប័ន តុលាការ ចុះអនុវត្ត នីតិវិធី ច្បាប់ ស្របតាម អនុក្រឹត្យ លេខ០៣ របស់ រាជរដ្ឋាភិបាល និង ច្បាប់ ស្ដីពី ការប្រឆាំងការឆបោកតាមប្រព័ន្ធ បច្ចេកវិទ្យា ក្រោម ការដឹកនាំ ដ៏ ប៉ិនប្រសប់ របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

អភិបាលខេត្តកែប បានលើកឡើងថា ដើម្បីរក្សាខេត្តកែប ឱ្យក្លាយជាតំបន់ទេសចរណ៍ដ៏ទាក់ទាញប្រកបដោយសុវត្ថិភាព និងគ្មានឧក្រិដ្ឋកម្មបច្ចេកវិទ្យា យេីងមិនត្រូវបណ្តោយឱ្យក្រុមជនខិលខូចមួយចំនួនតូចដេីម្បីតែ ផលប្រយោជន៍ ផ្ទាល់ ខ្លួន មកបំផ្លាញសហគមន៍ ខេត្ត និង ប្រទេស ជាតិយេីងឡើយ៕