(ឧត្តរមានជ័យ)៖ លោក ផុន ចាន់និល អភិបាលក្រុងសំរោង ខេត្តឧត្តរមានជ័យ នៅថ្ងៃទី៣ ខែឧសភា ឆ្នាំ២០២៦នេះ បានដឹកនាំក្រុមការងារចុះពិនិត្យស្ថានភាពជាក់ស្ដែង និងវាយតម្លៃផលប៉ះពាល់ បន្ទាប់ពីមានហេតុការណ៍ខ្យល់កន្ត្រាក់កាលពីល្ងាចថ្ងៃទី២ ខែឧសភា ឆ្នាំ២០២៦កន្លងទៅ ក្នុងភូមិសាស្ត្រសង្កាត់សំរោង និងសង្កាត់បន្សាយរាក់។

តាមរយៈការចុះពិនិត្យតាមខ្នងផ្ទះនីមួយៗ ក្រុមការងារបានរកឃើញផ្ទះដែលរងផលប៉ះពាល់មានចំនួនសរុប៤២ខ្នងផ្ទះ ក្នុងនោះសង្កាត់សំរោង ចំនួន៤០ខ្នងផ្ទ និងនៅសង្កាត់បន្សាយរាក់ចំនួន២ខ្នងផ្ទះ ដែលមានកម្រិតខូចខាត របើកដំបូលទាំងស្រុង ៤ខ្នង និងរបើកផ្នែកខ្លះ ៣៨ខ្នង (ខូចខាតស័ង្កសីសរុបជាង៤០០ សន្លឹក) តែមិនមានការប៉ះពាល់ដល់អាយុជីវិតមនុស្ស ឬសត្វពាហនៈឡើយ។

ក្រោយការចុះពិនិត្យរួច លោក ផុន ចាន់និល បានជួបពិភាក្សាការងារជាបន្ទាន់ជាមួយលោកឧត្តមសេនីយ៍ទោ ខូវ លី ប្រធានក្រុមការងាររាជរដ្ឋាភិបាលចុះមូលដ្ឋានក្រុងសំរោង និងលោក ឆឹម តឿ ប្រធានក្រុមការងារចុះជួយសង្កាត់បន្សាយរាក់ ដើម្បីដាក់ចេញវិធានការសង្គ្រោះបឋម ផ្នែកសម្ភារ រៀបចំផ្ដល់ជូនស័ង្កសី ដើម្បីជួយជួសជុលដំបូលផ្ទះដែលខូចខាតឡើងវិញឱ្យបានឆាប់បំផុត និងបានស្បៀងសង្គ្រោះបឋម ត្រៀមនាំយកនូវអំណោយសង្គ្រោះបន្ទាន់ រួមមាន អង្ករ មី ទឹកបរិសុទ្ធ និងសម្ភារប្រើប្រាស់ចាំបាច់ ចែកជូនដល់គ្រួសាររងគ្រោះទាំង៤២គ្រួសារ។

នៅក្នុងឱកាសនោះ លោកអភិបាលក្រុងសំរោង បានថ្លែងនូវការសោកស្ដាយចំពោះហេតុការណ៍គ្រោះធម្មជាតិខ្យល់កន្ត្រាក់ ដែលធ្វើឱ្យបាត់បង់ទ្រព្យសម្បត្តិប្រជាពលរដ្ឋ។ លោកបាននាំនូវការផ្តាំផ្ញើសាកសួរសុខទុក្ខពីសំណាក់លោក មាន ចាន់យ៉ាដា អភិបាលខេត្តឧត្តរមានជ័យ ក៏ដូចជាលោកទេសរដ្ឋមន្ត្រីកិត្តិសង្គហបណ្ឌិត គន់ គីម ប្រធានក្រុមការងាររាជរដ្ឋាភិបាលចុះមូលដ្ឋានខេត្តឧត្តរមានជ័យ និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ដោយបានផ្ដល់កម្លាំងចិត្តដល់ប្រជាពលរដ្ឋឱ្យមានស្មារតីរឹងមាំ ព្រមទាំងធានាថា នឹងនាំយកជំនួយមកប្រគល់ជូនដល់ដៃជនរងគ្រោះ នាពេលឆាប់ៗខាងមុខនេះ ដោយមិនទុកឱ្យបងប្អូនណាម្នាក់រងគ្រោះ ដោយគ្មានទីជម្រកនោះឡើយ៕