(ភ្នំពេញ)៖ លោក រឿន រតនា លេខាប្រតិបត្តិសមាគមទុរេនកម្ពុជា នៅថ្ងៃទី៤ ខែឧសភា ឆ្នាំ២០២៦ បានស្នើទៅកាន់មន្ត្រីនៅតាមបន្ទាត់ព្រំដែន រឹតបន្ដឹងការនាំចូលទុរេនដែលគ្មានគុណភាព នាំឱ្យប៉ះពាល់ដល់សុខភាព និងសេចក្ដីទុកចិត្តរបស់អ្នកបរិភោគ។

ថ្មីៗនេះនៅលើបណ្ដាញសង្គម ផ្ទុះការចាប់អារម្មណ៍លើសារសំឡេងរបស់ស្ត្រីជាអ្នកលក់ទុរេនមួយរូបនៅខេត្តបាត់ដំបង ចំពោះការលួចនាំចូលទុរេនដោយខុសច្បាប់ពីប្រទេសថៃ មកកាន់ប្រទេសកម្ពុជា ស្របពេលដែលទំនិញនេះស្ថិតនៅក្រោមការហាមឃាត់របស់អគ្គនាយកដ្ឋានគយ។

លេខាប្រតិបត្តិសមាគមទុរេនកម្ពុជា មើលឃើញពីកង្វះខាតការត្រួតពិនិត្យ និងរឹតបន្ដឹងលើការនាំចូល ជាពិសេសនៅតាមបន្ទាត់ព្រំដែនថៃ និងស្នើឱ្យមានការតាមដានដោយយកចិត្តទុកដាក់ ដ្បិតថាកន្លងទៅទុរេនរបស់ថៃ ត្រូវបានប្រទេសចិនរកឃើញសារធាតុគីមីលើសកម្រិត និងផ្អាកនាំចូលទុរេនពីថៃផងដែរ។

លោក រឿន រតនា បានប្រាប់អង្គភាពសារព័ត៌មាន Fresh News ដូច្នេះថា៖ «ក្នុងនាមលេខាប្រតិបត្តិសមាគមទុរេនកម្ពុជា ស្នើសុំទៅកាន់កុងត្រូលគយ នៅតាមច្រកព្រំដែន ឬមួយក៏ច្រករបៀងតូចៗនៃព្រះរាជាណាចក្រកម្ពុជា សូមមេត្តាមានការរឹតបន្ដឹងនូវការនាំចូលទុរេនពីបណ្ដាប្រទេសវៀតណាម ក៏ដូចជាប្រទេសថៃក្ដី ពីព្រោះដោយសារប្រទេសទាំងពីរនេះ គេបានរកឃើញថាប្រើប្រាស់នូវសារធាតុមួយដែលអាចប៉ះពាល់ដល់សុខភាព លើសកម្រិត»។

ជាមួយគ្នានេះដែរ លោកថា សមាគម ក៏បានតាមដានលើការអនុវត្តបច្ចេកទេសរបស់កសិករខ្មែរ ជាពិសេសនៅឃុំអារក្សត្នោត ស្រុកស្ទឹងត្រង់ ខេត្តកំណង់ចាម ដើម្បីឱ្យស្របទៅតាមគោលការណ៍កសិកម្មល្អ របស់ក្រសួងកសិកម្ម រុក្ខាប្រមាញ់ និងនេសាទ។

លោក រឿន រតនា បានបន្តទៀតថា ដោយសារមុនពេលបិទច្រកព្រំដែនកម្ពុជា-ថៃ យើងទទួលស្គាល់ថាលំហូរទុរេនមកពីថៃដើម្បីផ្គត់ផ្គង់ក្នុងស្រុកគឺមានច្រើន។ ប៉ុន្តែក្រោយយើងមានបញ្ហាជាមួយគ្នា និងឈានដល់ការបិទច្រកព្រំដែននោះ កត្តានេះនឹងរុញច្រានឱ្យតម្លៃទុរេននៅក្នុងប្រទេសមានការកើនឡើង អាចដល់ ៣០,០០០រៀលក្នុងមួយគីឡូ ខណៈដែលឆ្នាំទៅតម្លៃចន្លោះ ២០,០០០ ទៅ២៥,០០០រៀលប៉ុណ្ណោះ៕