(ភ្នំពេញ)៖ ឆ្លើយតបទៅនឹងការវិវឌ្ឍរីកចម្រើនផ្នែកសេដ្ឋកិច្ច សង្គម និងបច្ចេកវិទ្យា និងដើម្បីសម្រួលដល់ប្រជាពលរដ្ឋ និងធុរជន ក្រសួងរៀបចំដែនដី នគរូបនីយកម្ម និងសំណង់ បានជូនដំណឹងពីការពីរៀបចំយន្តការ ផ្តល់សេវាសាធារណៈរហ័ស (Express Service) លើសេវាសុរិយោដី នៅរដ្ឋបាលកណ្តាល ក្រសួងរៀបចំដែនដី នគរូបនីយកម្ម និងសំណង់។

នៅក្នុងសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ដែលបណ្តាញព័ត៌មាន Fresh News ទទួលបាននៅថ្ងៃទី០៤ ខែឱសភា ឆ្នាំ២០២៦នេះ បានបញ្ជាក់ថា ប្រជាពលរដ្ឋ និងធុរជនដែលមាន តម្រូវការប្រើប្រាស់សេវារហ័សខាងលើ អាចមកដាក់ពាក្យស្នើសុំ នៅច្រកចេញចូលតែមួយនៅទីស្តីការក្រសួងរៀបចំដែនដី នគរូបនីយកម្ម និងសំណង់ រៀងរាល់ម៉ោងធ្វើការ ចាប់ពីថ្ងៃជូនដំណឹងនេះតទៅ។

នៅពេលសួរថា តើសេវាសាធារណៈរហ័សមានអ្វីខ្លះ? មន្រ្តីទំនាក់ទំនងព័ត៌មានរបស់ក្រសួងរៀបចំដែនដី បានប្រាប់បណ្តាញព័ត៌មាន Fresh News ថា សេវាទាំងនេះមានពាក់ព័ន្ធរាល់ការចុះហេត្ថលេខារបស់ លោកឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។

មន្រ្តីរូបនេះបានបញ្ជាក់ថា សេវា Express Service មានដូចជា៖ ការចុះបញ្ជីដីធ្លី, ការស្នើសុំបំបែបក្បាលដី, ការស្នើសុំបំបែកអគារសហកម្មសិទ្ធិ...។

នេះជាយន្តការថ្មីមួយទៀត ត្រូវបានដាក់ចេញក្រោមចក្ខុវិស័យវែងឆ្ងាយ និងកាន់តែមានប្រសិទ្ធភាពរបស់លោកឧបនាយករដ្ឋមន្រ្តី សាយ សំអាល់ ដើម្បីឲ្យសេវាលើវិស័យដីធ្លីកាន់តែលឿនសម្រាប់ប្រជាពលរដ្ឋ និងក្រុមធុរជន កសាងទំនុកចិត្តកាន់តែខ្លាំង ក៏ដូចជាការចូលរួមកាត់បន្ថយជម្លោះដីធ្លីតាមមូលដ្ឋាន៕