(សៀមរាប)៖ កិច្ចប្រជុំគណៈកម្មការនយោបាយ នៃសភាប្រើភាសាបារាំង (APF) ត្រូវបានបិទបញ្ចប់ដោយជោគជ័យ នាព្រឹកថ្ងៃច័ន្ទ ទី៤ ខែឧសភា ឆ្នាំ២០២៦នេះ ក្រោមអធិបតីភាពដ៏ខ្ពង់ខ្ពស់ លោក អ៊ុច បូររិទ្ធ ប្រធានស្តីទីព្រឹទ្ធសភា និងជាប្រធានក្រុមសភាជាតិកម្ពុជា នៃសភាប្រើភាសាបារាំង ។
ពិនេះធ្វើនៅខេត្តសៀមរាប ដោយមានការអញ្ជើញចូលរួមពីសំណាក់សមាជិក សមាជិកា នៃសភាកម្ពុជា សភាប្រើភាសាបារាំង មកពី ១៥ប្រទេស និងតំណាងអង្គការអន្តរជាតិហ្រ្វង់កូហ្វូនី (Organisation Internationale de la Francophonie - OIF) ព្រមទាំងមន្ត្រីជាន់ខ្ពស់នៃអគ្គលេខាធិការដ្ឋានព្រឹទ្ធសភា និងរដ្ឋសភា និងសភាប្រើភាសាបារាំង។
សូមបញ្ជាក់ថា៖ កាលពីថ្ងៃទី៣ ខែឧសភា ឆ្នាំ២០២៦ លោក អ៊ុច បូររិទ្ធ ប្រធានស្តីទីព្រឹទ្ធសភា និងជាប្រធានក្រុមសភាជាតិកម្ពុជា នៃសភានិយាយភាសាបារាំង (APF) បានអញ្ជើញជាអធិបតីបើកកិច្ចប្រជុំគណៈកម្មការនយោបាយ នៃសភាប្រើភាសាបារាំងនៅសណ្ឋាគារអង្គរប៉ារ៉ាឌី ខេត្តសៀមរាប ដោយមានការអញ្ជើញចូលរួមពីសំណាក់សមាជិក សមាជិកា នៃសភាកម្ពុជា សភាប្រើភាសាបារាំង (Assemblée Parlementaire de la Francophonie-APF) មកពី ១៥ប្រទេស និងតំណាងអង្គការអន្តរជាតិហ្រ្វង់កូហ្វូនី (Organisation Internationale de la Francophonie - OIF) ព្រមទាំងមន្ត្រីជាន់ខ្ពស់នៃអគ្គលេខាធិការដ្ឋានព្រឹទ្ធសភា និងរដ្ឋសភា និងសភាប្រើភាសាបារាំង។

សម្រាប់កិច្ចប្រជុំនេះ ដំណើរការពីថ្ងៃទី៣ ដល់ថ្ងៃទី៤ ខែឧសភា ឆ្នាំ២០២៦ ដោយផ្តោតលើរបៀបវារៈសំខាន់ៗ ដូចជា៖
- ការអនុម័តសេចក្តីសង្ខេបនៃសេចក្តីសម្រេចចិត្តនៃកិច្ចប្រជុំគណៈកម្មការនយោបាយ ខែកក្កដា ឆ្នាំ២០២៥ នៅទីក្រុងប៉ារីស។
- ការពិនិត្យ និងពិភាក្សាអំពីទោសប្រហារជីវិតនៅក្នុងតំបន់សភាប្រើភាសាបារាំងជាដើម។
- ការពិនិត្យស្ថានភាពនយោបាយក្នុងប្រទេសប្រើភាសាបារាំង។
- បច្ចុប្បន្នភាពរបស់ក្រុមសភាជាតិនីមួយៗ។
- ការពិភាក្សាអំពីតួនាទីរបស់សភាប្រើភាសាបារាំងក្នុងការធ្វើឱ្យមានស្ថិរភាពនៅក្នុងតំបន់និងសកលលោក និងអនុសាសន៍របស់សមាជិកសភា ដើម្បីធ្វើឱ្យសន្តិភាពជាកម្លាំងចលករសម្រាប់ការអភិវឌ្ឍប្រកបដោយចីរភាព។

បន្ទាប់មកគណៈប្រតិភូ និងតំណាងសមាជិក សមាជិកា នៃសភាកម្ពុជា សភាប្រើភាសាបារាំង ចំនួន ៦៥នាក់ បានទៅទស្សនាសារមន្ទីរតេជោសន្តិភាព នៃមជ្ឈមណ្ឌលសកម្មភាពកំចាត់មីន ខេត្តសៀមរាប ដែលដឹកនាំដោយលោក អ៊ុច បូររិទ្ធ រួចគណៈប្រតិភូបានបន្តដំណើរទៅទស្សនាប្រាសាទអង្គរវត្ត ផងដែរ ។

នៅឯសារមន្ទីរ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានអញ្ជើញអមដំណើរគណៈប្រតិភូ និងបានធ្វើបទបង្ហាញជម្រាបជូនគណៈប្រតិភូអំពីវឌ្ឍនភាព និងកិច្ចខិតខំប្រឹងប្រែងរបស់កម្ពុជា ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាម ដើម្បីធានាសុវត្ថិភាពជូនប្រជាពលរដ្ឋ និងការអភិវឌ្ឍសង្គម-សេដ្ឋកិច្ចឱ្យកាន់តែរីកចម្រើន។ការបោសសម្អាតមីនមិនត្រឹមតែផ្តល់សុវត្ថិភាពដល់ប្រជាជនប៉ុណ្ណោះទេ ប៉ុន្តែគឺជាមូលដ្ឋានគ្រឹះដ៏រឹងមាំនៃសន្តិភាព និងការអភិវឌ្ឍសេដ្ឋកិច្ចគ្រួសារ និងសហគមន៍។ តាមរយៈការទស្សនាពិព័រណ៍ក្នុងសារមន្ទីរ គណៈប្រតិភូទទួលបានជ្រាបអំពីសមិទ្ធផលរបស់អង្គភាពស៊ីម៉ាក់ ដែលបានបង្កើតឡើងក្នុងឆ្នាំ១៩៩២ ដើម្បីដោះស្រាយវិបត្តិគ្រាប់មីន និងសំណល់ជាតិផ្ទុះនៅប្រទេសកម្ពុជា។
សារមន្ទីរតេជោសន្តិភាព មិនត្រឹមតែជាសក្ខីកម្មនៃរបត់ប្រវត្តិសាស្ត្រ ពី«វាលពិឃាត» មកជា «វាលសន្តិភាព» ប៉ុណ្ណោះទេ ប៉ុន្តែថែមទាំងជានិមិត្តរូបនៃការស្តារឡើងវិញនូវសុវត្ថិភាពសហគមន៍ និងការលុបបំបាត់ស្លាកស្នាមសង្រ្គាមនៅកម្ពុជា។ លើសពីនេះ ទីតាំងសារមន្ទីរនេះដើរតួជាមជ្ឈមណ្ឌលអប់រំ និងចែករំលែកបទពិសោធន៍នៃការកសាងសន្តិភាពទៅកាន់ពិភពលោក ។

សកម្មភាពនៃការមកធ្វើទស្សនកិច្ចនៅសារមន្ទីរតេជោសន្តិភាពនេះធ្វើឡើងស្របពេលដែលអគ្គលេខាធិការដ្ឋានព្រឹទ្ឋសភា រដ្ឋសភា សហការជាមួយសភាប្រើភាសាបារាំង និងអង្គការអន្តរជាតិហ្វ្រង់កូហ្វូនី បានរៀបចំសិក្ខាសាលាស្តីពី«ក្របខ័ណ្ឌ និងការប្រើប្រាស់ឌីជីថល និងបញ្ញាសិប្បនិម្មិតនៅក្នុងសភា» និងកិច្ចប្រជុំគណៈកម្មការនយោបាយ ដែលបានប្រព្រឹត្តទៅចាប់ពីថ្ងៃទី០២ ដល់ថ្ងៃទី០៤ ខែឧសភា ឆ្នាំ២០២៦ នៅទឹកដីអង្គរ ខេត្តសៀមរាប។
សូមបញ្ជាក់ថា៖សារមន្ទីរតេជោសន្តិភាព ត្រូវបានកសាងឡើងដើម្បីជានិមិត្តរូបនៃសន្តិភាពពេញលេញ ដែលកម្ពុជាសម្រេចបានតាមរយៈនយោបាយឈ្នះ-ឈ្នះ ។

សារមន្ទីរតេជោសនិ្តភាពនេះមិនត្រឹមតែជាកន្លែងដាក់តាំងបង្ហាញភស្តុតាងប្រវត្តិសាស្ត្រនៃមហាអាណាចក្រខ្មែរដ៏រុងរឿង និងសោកនាដកម្មនៃសង្គ្រាមរ៉ាំរ៉ៃដែលបានបន្សល់ទុកគ្រាប់មីនរាប់លានគ្រាប់ជាឃាតករលាក់មុខប៉ុណ្ណោះទេ ប៉ុន្តែវាក៏ជាមជ្ឈមណ្ឌលអប់រំ និងស្រាវជ្រាវសម្រាប់មនុស្សគ្រប់ជំនាន់ ឱ្យយល់ដឹងពីតម្លៃនៃសន្តិភាព និងការលះបង់របស់វីរយុទ្ធជនដោះមីនគ្រប់រូបផងដែរ ៕