(ភ្នំពេញ)៖ ដោយទទួលបានការអនុញ្ញាតដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ​កម្ពុជា អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធាន ក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា នឹងដឹកនាំគណៈប្រតិភូសភាពាណិជ្ជកម្មកម្ពុជា អញ្ជើញអមដំណើរ សម្ដេចធិបតីនាយករដ្ឋមន្តី និងលោកជំទាវបណ្ឌិត ចូលរួមកិច្ចប្រជុំកំពូលអាស៊ានលើកទី៤៨ នៅ កោះសេប៊ូ សាធារណរដ្ឋហ្វីលីពីន ពីថ្ងៃទី៧ ដល់ថ្ងៃទី៨ ខែឧសភា ឆ្នាំ២០២៦។

ក្នុងអំឡុងពេលនៃដំណើរទស្សនកិច្ចនេះ គណៈប្រតិភូសភាពាណិជ្ជកម្មកម្ពុជា នឹងជួបពិភាក្សាការងារជាមួយ សភាពាណិជ្ជកម្ម និងឧស្សាហកម្មហ្វីលីពីន ដើម្បីពង្រឹងទំនាក់ទំនងស្ថាប័នទាំងពីរ ក៏ដូចជាជំរុញពាណិជ្ជកម្ម និង វិនិយោគរវាងប្រទេសទាំងពីរ។

ធុរជនកម្ពុជា និងធុរជនហ្វីលីពីន ក៏នឹងមានឱកាសជួបប្រាស្រ័យទាក់ទងគ្នាដោយផ្ទាល់ ក្នុងឱកាសនៃជំនួបនេះ ដើម្បីស្វែងយល់ និងពិនិត្យលទ្ធភាពសហប្រតិបត្តិការលើវិស័យសំខាន់ៗ រួមមាន៖ ហិរញ្ញវត្ថុ វិនិយោគ កសិកម្ម ម្ហូបអាហារ ទេសចរណ៍ អចលនទ្រព្យ សំណង់ និង ឧស្សាហកម្មអេឡិចត្រូនិក ជាដើម។

ក្រៅពីនេះ គណៈប្រតិភូសភាពាណិជ្ជកម្មកម្ពុជា នឹងអញ្ជើញចូលរួមកិច្ចពិភាក្សា និងជំនួបពាណិជ្ជកម្មផ្សេងទៀត ដើម្បីជំរុញទំនាក់ទំនងជាមួយសហគមន៍ធុរកិច្ចក្នុងអាស៊ាន៕