(ពោធិ៍សាត់)៖ នាព្រឹកថ្ងៃទី០៥ ខែឧសភា ឆ្នាំ២០២៦នេះ នៅសាលាខេត្តពោធិ៍សាត់ លោក ខូយ រីដា អភិបាលនៃគណៈអភិបាលខេត្ត បានទទួលបច្ច័យចំនួន ២,០០០ដុល្លារ (ពីរពាន់ដុល្លារសហរដ្ឋអាមេរិកគត់) ពីព្រះតេជគុណ ឡាយ កន ព្រះគ្រូចៅអធិការវត្តបាកាន ស្ថិតក្នុងឃុំត្រពាំងជង ស្រុកបាកាន។ ថវិកានេះ ទទួលបានតាមរយៈសទ្ធាជ្រះថ្លារបស់ម្ចាស់ដើមទាន ប្រធានដើមបុណ្យ និងពុទ្ធបរិស័ទទូទៅ ដើម្បីរួមចំណែកក្នុងមហាកុសលសាងសង់អគារពហុព្យាបាល និងសង្គ្រោះបន្ទាន់ នៃមន្ទីរពេទ្យបង្អែកខេត្តពោធិ៍សាត់។

ព្រះតេជគុណ ឡាយ កន បានបង្ហាញនូវទឹកព្រះទ័យមេត្តាធម៌យ៉ាងខ្ពង់ខ្ពស់ តាមរយៈការខិតខំគៀងគរបច្ច័យ ពីសប្បុរសជន និងពុទ្ធបរិស័ទ ដើម្បីចូលរួមក្នុងគម្រោងអភិវឌ្ឍន៍វិស័យសុខាភិបាលនៅក្នុងខេត្ត។ ព្រះអង្គបានបញ្ជាក់ថា ការចូលរួមនេះ គឺដើម្បីជាគុណប្រយោជន៍ដ៏ចាំបាច់ សម្រាប់ផ្តល់កន្លែងសម្រាកព្យាបាលដ៏សមរម្យ និងទំនើប ជូនដល់បងប្អូនប្រជាពលរដ្ឋ ដែលជួបបញ្ហាសុខភាព។

ក្នុងឱកាសនោះ លោក ខូយ រីដា បានសម្តែងនូវការថ្លែងអំណរគុណយ៉ាងជ្រាលជ្រៅបំផុត ប្រគេនចំពោះព្រះតេជគុណ ឡាយ កន ដែលជានិច្ចកាលតែងតែរួមចំណែកជាមួយរដ្ឋបាលខេត្ត ក្នុងកិច្ចការមនុស្សធម៌ និងការអភិវឌ្ឍ។ លោកបានសង្កត់ធ្ងន់ថា៖ "ការកសាងសមិទ្ធផលលើវិស័យសុខាភិបាលនាពេលនេះ គឺជាការរួមចំណែកអភិវឌ្ឍន៍សង្គមជាតិ និងលើកកម្ពស់សុខុមាលភាពប្រជាជនគ្រប់ស្រទាប់វណ្ណៈ ក្រោមការដឹកនាំប្រកបដោយគតិបណ្ឌិត និងវៃឆ្លាតរបស់ សម្តេចបវរធិបតី ហ៊ុន ម៉ាណេត នាយករដ្ឋមន្ត្រីនៃកម្ពុជា។ អគារកម្ពស់ ៥ជាន់នេះ គឺជាសម្បត្តិជាតិដ៏មានតម្លៃ ដែលនឹងបម្រើផលប្រយោជន៍រួមជូនប្រជាពលរដ្ឋជារៀងរហូតទៅ។"

សូមបញ្ជាក់ថា អគារពហុព្យាបាល និងសង្គ្រោះបន្ទាន់ នៃមន្ទីរពេទ្យបង្អែកខេត្តពោធិ៍សាត់នេះ មានទំហំ បណ្តោយ ៥៤ម៉ែត្រ x ទទឹង ២២ម៉ែត្រ កម្ពស់ ៥ជាន់ ត្រូវបានបើកការដ្ឋានសាងសង់ កាលពីថ្ងៃទី១១ ខែមិថុនា ឆ្នាំ២០២៥។ គម្រោងដ៏ធំធេងនេះ កើតចេញពីគំនិតផ្តួចផ្តើមដ៏ខ្ពង់ខ្ពស់របស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ រួមជាមួយ ព្រះតេជគុណ ឥន្ទត្ថេរោ នៅ សុគន្ធថៃ ព្រះចៅអធិការវត្តហង្សាបីតិ (ហៅវត្តព្រែកស្តី) និងលោក ខូយ រីដា អភិបាលនៃគណៈអភិបាលខេត្តពោធិ៍សាត់។

បច្ចុប្បន្នគម្រោងនេះបានដំណើរការសាងសង់ ដែលប្រព្រឹត្តទៅតាមដំណាក់កាល ជាមួយនឹងការកែសម្រួលប្លង់ស្ថាបត្យកម្មឱ្យកាន់តែមានប្រសិទ្ធភាព។ រដ្ឋបាលខេត្តក៏សង្ឃឹមយ៉ាងមុតមាំថា សប្បុរសជននានានឹងបន្តចូលរួមឧបត្ថម្ភគាំទ្រតាមកម្លាំងសាមគ្គី ដើម្បីឱ្យសមិទ្ធផលជាប្រវត្តិសាស្ត្រនេះ លេចចេញជារូបរាង និងផ្តល់សេវាសុខាភិបាលកាន់តែប្រសើរឡើងជូនប្រជាពលរដ្ឋក្នុងខេត្តពោធិ៍សាត់ទាំងមូល៕