(ពោធិ៍សាត់)៖ នាព្រឹកថ្ងៃទី០៥ ខែឧសភា ឆ្នាំ២០២៦នេះ លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំក្រុមការងារមន្ទីរជំនាញ និងអាជ្ញាធរក្រុង ចុះពិនិត្យសកម្មភាពត្រាស់ស្សេរឈូសឆាយ តភ្ជាប់បើកផ្លូវច្រាំងស្ទឹងពីម្ខាងទៅម្ខាង ស្ថិតក្នុងភូមិសាស្ត្រក្រុងពោធិ៍សាត់ បន្ទាប់ពីកិច្ចដំណើរការរំដោះ និងដោះស្រាយគោលនយោបាយផលប៉ះពាល់ត្រូវបានបញ្ចប់ជាស្ថាពរ។

ក្នុងឱកាសចុះពិនិត្យដោយផ្ទាល់នោះ លោក ខូយ រីដា បានមានប្រសាសន៍លើកឡើងថា ការសម្រេចតភ្ជាប់បើកផ្លូវច្រាំងស្ទឹងនេះ គឺជាជំហានដ៏សំខាន់ ក្នុងការលើកកម្ពស់សោភ័ណភាពក្រុង និងបម្រើដល់ផលប្រយោជន៍សាធារណៈ។ លោកបានបញ្ជាក់ថា ចំពោះសំណង់ធារាសាស្ត្រក្បាលហុង នៃគម្រោងគ្រប់គ្រងធនធានទឹកបញ្ចូលគ្នា ដែលទទួលបានការគាំទ្រពីធនាគារអភិវឌ្ឍន៍អាស៊ី (ADB) គឺបានដោះស្រាយសំណងជូនបងប្អូនប្រជាពលរដ្ឋដែលរងផលប៉ះពាល់រួចរាល់អស់ហើយ ដោយតម្លាភាព និងយុត្តិធម៌។

លោកអភិបាលខេត្ត បានគូសបញ្ជាក់បន្ថែមថា ពាក់ព័ន្ធនឹងការងារដោះស្រាយគោលនយោបាយ ក្នុងអាណត្តិដឹកនាំជាង ៣ឆ្នាំកន្លងមកនេះ ទោះបីជាកន្លងមកមានបងប្អូនមួយចំនួនតូចមានការមិនសប្បាយចិត្តខ្លះក្តី ប៉ុន្តែក្រោយពីការអភិវឌ្ឍលេចចេញជារូបរាង ពួកគាត់មានភាពត្រេកអរ និងចូលរួមយ៉ាងសកម្ម។ បងប្អូនដែលរងផលប៉ះពាល់ ត្រូវបានអាជ្ញាធររៀបចំឱ្យទៅរស់នៅទីតាំងថ្មី ដែលមានហេដ្ឋារចនាសម្ព័ន្ធគ្រប់គ្រាន់ (ទឹក-ភ្លើង) មានប្លង់កម្មសិទ្ធិស្របច្បាប់ ហើយខេត្តក៏ត្រៀមសាងសង់កូនផ្សារតូចមួយនៅទីនោះ ដើម្បីជួយសម្រួលដល់ការប្រកបរបរទទួលទានប្រចាំថ្ងៃផងដែរ។

ក្រៅពីសមិទ្ធផលច្រាំងស្ទឹង លោក ខូយ រីដា ក៏បានបង្ហើបពីគម្រោងយុទ្ធសាស្ត្រនាពេលខាងមុខ ដើម្បីប្រែក្លាយមុខមាត់ខេត្តពោធិ៍សាត់ ឱ្យកាន់តែទាក់ទាញ រួមមាន៖ ការសាងសង់វិមានឯករាជ្យ, ការរៀបចំសួនវិមានឈ្នះ-ឈ្នះ និងការសាងសង់រង្វង់មូលទេពឧកញ៉ា ឃ្លាំង មឿង ក្នុងគោលបំណងរំលឹកគុណូបការៈបុព្វបុរសស្នេហាជាតិ និងបង្កើនភាពទាក់ទាញ ដល់ភ្ញៀវទេសចរជាតិ និងអន្តរជាតិ។

ក្នុងថ្ងៃដដែលនោះដែរ លោកអភិបាលខេត្ត ក៏បានអនុញ្ញាតឱ្យក្រុមសិល្បករ សិប្បការិនី ដឹកនាំដោយលោក តាន់ គឹមសួរ ចូលជួបសម្តែងការគួរសម និងពិភាក្សាការងារ នៅបន្ទប់រងចាំសាលាខេត្ត ក្នុងបេសកកម្មខ្លី ចុះមកផ្សព្វផ្សាយពីសក្តានុពលទេសចរណ៍នៅក្នុងទឹកដីខេត្តពោធិ៍សាត់។ លោកបានសម្តែងការគាំទ្រយ៉ាងពេញទំហឹង ព្រមទាំងសង្កត់ធ្ងន់ថា សកម្មភាពនេះឆ្លុះបញ្ចាំងពីឧត្តមគតិស្នេហាជាតិខ្ពស់ ស្របតាមកិច្ចខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា ក្នុងការជំរុញវិស័យទេសចរណ៍ឱ្យក្លាយជា "មាសបៃតង" ដើម្បីសេដ្ឋកិច្ចជាតិ និងការរីកចម្រើនរបស់សហគមន៍មូលដ្ឋាន៕