លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតី ក្នុងសន្និបាតបូកសរុបលទ្ធផលការងារប្រចាំឆ្នាំចាស់ និងលើកទិសដៅការងារឆ្នាំបន្ត របស់គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ (Video inside)
05-05-2026 14:10
(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា និងជាប្រធានកិត្តិយសគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ (គ.ជ.ស.ស.ខ) នាព្រឹកថ្ងៃអង្គារ ទី០៥ ខែឧសភា ឆ្នាំ២០២៦ បានអញ្ជើញជាអធិបតីភាពក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០២៤-២០២៥ និងលើកទិសដៅការងារសម្រាប់ឆ្នាំ២០២៦-២០២៧ របស់គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ សណ្ឋាគារ សាន់ & មូន រីវើសាយ។
នៅក្នុងឱកាសនោះលោកជំទាវបណ្ឌិត បានសម្តែងនូវអារម្មណ៍ពេញចិត្ត និងរីករាយក្រៃលែងក្រោយពីបានឃើញសមិទ្ធផលជាច្រើនដែលគណៈកម្មាធិការខិតខំបំពេញដើម្បីលើកកម្ពស់ការគោរពសីលធម៌សង្គម ការឱ្យតម្លៃស្ត្រី ការអប់រំដល់កូនខ្មែរជំនាន់ក្រោយឱ្យចេះគោរព ថែរក្សា និងការពារវប្បធម៌ប្រពៃណីដ៏ផូរផង់របស់ខ្មែរ ជាពិសេសការទប់ស្កាត់សកម្មភាពទាំងឡាយដែលធ្វើឱ្យប៉ះពាល់ដល់កិត្តិយសស្ត្រីខ្មែររួមទាំងសីលធម៌សង្គមខ្មែរ ។
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានថ្លែងថា «ការងារលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ គឺជាការងារដែលទាមទារនូវភាពអត់ធ្មត់ ភាពទន់ភ្លន់ ប៉ុន្តែត្រូវតែមានភាពម៉ឺងម៉ាត់ និងបន្តធ្វើជាប្រចាំ ហើយជាការងារដែលត្រូវចូលរួមពីគ្រប់ភាគីពាក់ព័ន្ធ ពីគ្រួសាររហូតដល់ស្ថាប័នរដ្ឋ និងសង្គមទាំងមូល»។
លោកជំទាវបណ្ឌិត បានបន្តថាស្ត្រីជាមាតាគឺជាអ្នកផ្ដល់ចំណេះដឹង សីលធម៌ និងសុជីវធម៌ដំបូងបង្អស់ដល់បុត្រធីតា ដែលជាគ្រឹះយ៉ាងរឹងមាំក្នុងការបណ្ដុះបណ្ដាលធនធានមនុស្ស និងអ្នកដឹកនាំល្អៗសម្រាប់ប្រទេសជាតិ។ ស្ត្រីបង្ហាញពីភាពអត់ធ្មត់ និងការលះបង់ខ្ពស់បំផុត ក្នុងការមើលថែគ្រួសារ និងផ្ដល់កម្លាំងចិត្តដល់ស្វាមីដែលបំពេញភារកិច្ចនៅជួរមុខ ដើម្បីឱ្យពួកគាត់មានចិត្តស្ងប់ក្នុងនាមជាអ្នកការពារជាតិ។
ឆ្លៀតក្នុងឱកាសនោះស្ត្រីទី១នៃកម្ពុជា បានអំពាវនាវតារាល្បីៗ អ្នកផលិតមាតិកាទាំងអស់ (Influencer, MMO)ជាពិសេសអ្នកដែលមានឥទ្ធិពលលើបណ្ដាញសង្គម ត្រូវយកចិត្តទុកដាក់ខ្ពស់ក្នុងការបញ្ចូលសារអប់រំ ចរិយាធម៌ និងសុជីវធម៌ ទៅក្នុងវីដេអូរបស់ខ្លួន និងអំណាចនៃសម្លេង និងរូបភាព នេះក្នុងផ្លូវវិជ្ជមាន ដើម្បីកសាងសង្គមមួយដែលមានសីលធម៌ល្អ និងជួយតម្រង់ទិសយុវជនជំនាន់ក្រោយឱ្យដើរលើផ្លូវដែលត្រឹមត្រូវ។
លោកជំទាវបណ្ឌិតបានបន្តថា «អ្នកផលិតមាតិកាត្រូវចងចាំថា ខ្លួនគឺជា "គំរូ" ដែលមានឥទ្ធិពលខ្លាំងលើសង្គម ព្រោះមានមនុស្សរាប់ម៉ឺន រាប់លាននាក់កំពុងតាមដានមើល ហើយក្មេងៗប្រៀបដូចជា "ក្រដាសស" ដែលងាយនឹងស្រូបយក និងធ្វើតាម (Copy and Paste) រាល់សកម្មភាពដែលពួកគេបានឃើញ មិនថាជាចំណុចល្អ ឬអាក្រក់នោះទេ។ ដូច្នេះត្រូវជៀសវាងការប្រើពាក្យអសុរោះ (អញ-ហ្អែង) ការស្លៀកពាក់ហួសហេតុ, ការសម្ដែងភាពស្និទ្ធស្នាលរវាងកុមារដែលមិនសមរម្យ និងការបង្ហាញសកម្មភាពអវិជ្ជមានដូចជាការជក់បារី ឬការបង្ហោះម៉ូតូជាដើម»។
ទន្ទឹមនឹនេះលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ បានឱ្យដឹងថាសន្និបាតនេះរៀបចំឡើងជារៀងរាល់ ២ឆ្នាំម្តងក្នុងគោលបំណងបូកសរុបលទ្ធផល សមិទ្ធផលការងាររបស់ក្រសួង ស្ថាប័ន ថ្នាក់ជាតិ និងថ្នាក់ក្រោមជាតិ ដែលសម្រេចបានក្នុងការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ។
លោកជំទាវកិត្តិបណ្ឌិ បានបន្តថានៅឆ្នាំ ២០២៤-២០២៥ នេះ គណៈកម្មាធិការជាតិដែលមានសមាសភាពអន្តរក្រសួង ស្ថាប័ន ដែលមានចំនួន ១៧ ក្រសួង ស្ថាប័ន បានដឹកនាំ និងសម្របសម្រួលការងារជាមួយក្រសួង ស្ថាប័ន នៅថ្នាក់ជាតិ ថ្នាក់ក្រោមជាតិ ព្រមទាំងអាជ្ញាធរមូលដ្ឋានគ្រប់លំដាប់ថ្នាក់ សង្គមស៊ីវិល ដៃគូអភិវឌ្ឍន៍ជាតិ និងអន្តរជាតិ រួមគ្នាអនុវត្តភារកិច្ចរបស់ខ្លួនតាម TOR (Terms of Reference) របស់ខ្លួន រួមទាំងសកម្មភាពឆ្លើយតបអនុសាសន៍ដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត និងអនុសាសន៍របស់លោកជំទាវបណ្ឌិត ប្រធានកិត្តិយស ដែលបានលើកឡើងក្នុងសន្និបាតឆ្នាំ ២០២៤៕
