(កណ្ដាល)៖ លោកបណ្ឌិត កៅ ថាច អនុប្រធានក្រុមការងារគណបក្សចុះមូលដ្ឋានស្រុកខ្សាច់កណ្តាល​ និងជាប្រធានទទួលបន្ទុកចលនាយុវជនស្រុកខ្សាច់កណ្តាល នៅថ្ងៃទី០៥ ខែឧសភា ឆ្នាំ២០២៦ បានអញ្ជើញជាអធិបតី ក្នុងកម្មវិធីបើកការប្រកួតកីឡាបាល់ទាត់ ពានរង្វាន់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រចាំស្រុកខ្សាច់កណ្តាល ខេត្តកណ្តាល។

នៅក្នុងពិធីបើកការប្រកួតកីឡានោះ ក៏មានការចូលរួមពីលោក ចេង ឌីណា ប្រធានគណៈអចិន្ត្រៃយ៍គណបក្សស្រុក, គណៈគ្រប់គ្រងសាលា លោកគ្រូ អ្នកគ្រូ សិស្សា នុសិស្ស ចលនាយុវជនឃុំទាំង១២ សរុបចំនួន ៦៤៦នាក់។

លោកបណ្ឌិត កៅ ថាច បានថ្លែងក្នុងឱកាសនោះថា ការរៀបចំកម្មវិធីប្រកួតកីឡានៅថ្ងៃនេះ គឺដើម្បីឲ្យយុវជនលេងកីឡា ប្រកបដោយសាមគ្គីភាព ភាតរភាព និងភាពសប្បាយរីករាយ ជាថ្មីម្តងទៀត បន្ទាប់ពីបុណ្យចូលឆ្នាំថ្មីប្រពៃណីខ្មែររួច ដែលបង្ហាញពីមិត្តភាព និងសាមគ្គីភាពផ្ទៃក្នុងរបស់យុវជន នៅក្នុងស្រុកខ្សាច់កណ្តាលតែម្តង។

លោកបណ្ឌិតបានរំលឹកថា ការបែកបាក់សាមគ្គីភាពជាតិ ធ្វើឲ្យជាតិយើងខ្សោយ ពោលតាមប្រវត្តិសាស្ត្របង្ហាញថា ក្រោយការបែកបាក់នៅសម័យអង្គរ រយៈពេល៥០០ឆ្នាំមកនេះ ធ្វើឲ្យខ្មែរខ្សោយ ហេតុដូច្នេះហើយយុវជនយើងត្រូវចាំថា សាមគ្គីភាពផ្ទៃក្នុងជាកម្លាំងនាំមកនូវជ័យជំនះ​ និងការអភិវឌ្ឍ​ ហើយក៏ផ្សារភ្ជាប់ជាមួយនឹងការលេងកីឡានេះឯង។

លើសពីនេះ លោកបណ្ឌិត បានបន្ថែមថា ការលេងកីឡាបង្ហាញពីជីពចររស់រវើកនៃជាតិយើងដែរ មានន័យថា ទោះបីជាមកដល់ពេលនេះ ប្រទេសយើងជួបបញ្ហាសង្រ្គាមឈ្លានពាន ពីភាគីថៃ ប៉ុន្តែដំណើរការសេដ្ឋកិច្ច និងសង្គមជាតិយើងនៅដំណើរការល្អ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី​។

លោកបានប្រាប់ដល់ប្អូនៗ បន្តការជឿជាក់លើរាជរដ្ឋាភិបាលយើង ជាពិសេសយុវជនយើង ដែលជាសសរទ្រូង និងជាកម្លាំងដ៏រឹងមាំ ដើម្បីចូលរួមចំណែកក្នុងការអភិវឌ្ឍន៍ នឹងជាឃឿនការពារជាតិមួយមិនអាចខ្វះបាន៕