លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សំណូមពរដល់សិល្បករ-សិល្បការីនី បង្កើតមាតិកាមានអត្ថន័យអប់រំល្អៗ និងគំនិតវិជ្ជាឱ្យបានកាន់តែច្រើន ដើម្បីជួយដល់សង្គមជាតិ (Video inside)
05-05-2026 15:56
(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា និងជាប្រធានកិត្តិយសគណៈកម្មាធិការជាតិ លើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ (គ.ជ.ស.ស.ខ) បានថ្លែងសំណូមពរដល់សិល្បករ-សិល្បការីនី បង្កើតមាតិកាមានអត្ថន័យអប់រំល្អៗ និងគំនិតវិជ្ជាឱ្យបានកាន់តែច្រើន ដើម្បីជួយដល់សង្គមជាតិ។
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអំពាវនាវដូចនេះ នៅថ្ងៃទី០៥ ខែឧសភា ឆ្នាំ២០២៦ នាឱកាសអញ្ជើញជាអធិបតីភាពក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០២៤-២០២៥ និងលើកទិសដៅការងារសម្រាប់ឆ្នាំ២០២៦-២០២៧ របស់គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ សណ្ឋាគារ សាន់ & មូន រីវើសាយ។
លោកជំទាវបណ្ឌិត ពេជ ចន្ទមុន្នី បានថ្លែងបញ្ជាក់ថា «សិល្បករ សិល្បការនីរបស់យើង គឺមានឥទ្ធិពលច្រើនខ្លាំងមែនទែនទៅលើក្មេងៗ នៅក្នុងសង្គមយើងបច្ចុប្បន្ន ហើយខ្ញុំដឹងថា សិល្បករ សិល្បការនីរបស់យើង គឺបង្កើតមាតិការនៃការអប់រំ គឺបានច្រើនអ្នក follow សូម្បីនាងខ្ញុំក៏មាន share វីដេអូពួកគាត់មួយចំនួនដែរ ដូចនេះនាងខ្ញុំសុំឲ្យប្អូនសុំជួយផ្សព្វផ្សាយ ធ្វើម៉េច គឺបង្កើតនូវមាតិកាទាំងឡាយណា ដែលផ្ដល់នូវការអប់រំ ផ្ដល់នូវគំនិតវិជ្ជមានដល់អ្នកដែលតាមដានរបស់ប្អូន»។
លោកជំទាវបណ្ឌិត ពេជ ចន្ទមុន្នី ក៏បានបញ្ជាក់ដែរថា សំដីរបស់សិល្បករ សិល្បការនី និងអ្នកបង្កើតនូវមាតិកាទាំងឡាយ ដែលបាននិយាយសុទ្ធតែមានអ្នកតាមដានច្រើន ដូចនេះសូមជួយបង្កើតនូវមាតិកា ដែលផ្ដល់នូវការអប់រំ ផ្ដល់នូវគំនិតវិជ្ជមាន ដល់អ្នកដែលតាមដានខ្លួន ដោយសារក្មេងៗទាំងអស់នោះសុទ្ធតែជាធនធានមនុស្សដ៏មានសារៈសំខាន់ នៅក្នុងសង្គមជាតិ។ ដូចនេះដើម្បីឱ្យសង្គមជាតិរបស់យើងខ្លាំង ទាល់តែមានក្មេងៗជំនាន់ក្រោយទាំង ស្ត្រី និងបុរស មានទាំងសុជីវធម៌ និងគុណធម៌ និងមានភាពរឹងមាំ ទើបសង្គមរបស់យើងមានភាពរីកចម្រើនបាន។
លោកជំទាវបណ្ឌិត ពេជ ចន្ទមុន្នី បានបន្ថែមទៀតថា «យើងត្រូវគិតថា កូនយើងក្មួយយើង ទៅថ្ងៃអនាគតនឹងរស់នៅក្នុងសង្គមមួយនេះដូចគ្នា ដូច្នេះយើងក៏ចង់ឲ្យកូនយើង ក្មួយយើង គឺបានប្រាស្រ័យទាក់ទងជាមួយនឹង អ្នកដទៃទៀតដែលមានសុជីវធម៌ មានសីលធម៌ ហើយនិងជាមនុស្សល្អ ជាធនធានមួយដ៏ល្អផងដែរ»។
សូមបញ្ជាក់ផងដែរថា គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ហៅកាត់ថា គ.ជ.ស.ស.ខ. ត្រូវបានបង្កើតឡើងនៅឆ្នាំ២០០៦ ក្នុងគោលបំណងថែរក្សា ការពារវប្បធម៌ជាតិ ធានាដល់ការគោរពសីលធម៌ និងសុភមង្គលគ្រួសារ ដោយការលើកកម្ពស់ស្ថានភាព តម្លៃ និងសុខុមាលភាពស្ត្រីខ្មែរ។
ជារៀងរាល់ ២ឆ្នាំម្តង គណៈកម្មាធិការតែងតែធ្វើសន្និបាតបូកសរុបលទ្ធផល និងលើកទិសដៅការងារ ហើយក្នុងរយៈពេល ២០ឆ្នាំមកនេះ គណៈកម្មាធិការសម្រេចបានសមិទ្ធផលជាច្រើនដូចជា យុទ្ធនាការផ្សព្វផ្សាយអប់រំយ៉ាងទូលំទូលាយ ការលើកកម្ពស់សីលធម៌ សុជីវធម៌ក្នុងការរស់នៅប្រចាំថ្ងៃ ការបង្ការនិងបង្ក្រាបបទល្មើសភាពយន្ត ការជំរុញការអនុវត្តច្បាប់ដែលមានស្រាប់ ការទប់ស្កាត់អំពើហិង្សានិងការជួញដូរមនុស្សដល់ទីតាំងផ្ទាល់ និងការលើកកម្ពស់សីលធម៌សង្គមតាមរយៈប្រព័ន្ធឌីជីថល៕
