(ពោធិ៍សាត់)៖ នារសៀលថ្ងៃទី០៥ ខែឧសភា ឆ្នាំ២០២៦នេះ លោក ខូយ រីដា អភិបាលនៃគណៈអភិបាលខេត្តពោធិ៍សាត់ ដោយមានការនិមន្តចូលរួមពី ព្រះតេជគុណ ឡាយ កន ព្រះគ្រូចៅអធិការវត្តបាកាន ព្រមទាំងថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត បានអញ្ជើញចុះជួបសំណេះសំណាលជាមួយលោកគ្រូ អ្នកគ្រូ នៃសាលាបឋមសិក្សា និងអនុវិទ្យាល័យ ហ៊ុន សែន បាកាន ស្ថិតក្នុងភូមិអូររំចេក ឃុំត្រពាំងជង ស្រុកបាកាន ខេត្តពោធិ៍សាត់។

គោលបំណងសំខាន់ នៃដំណើរចុះជួបសំណេះសំណាលនេះ គឺដើម្បីស្ទាបស្ទង់មតិគាំទ្រ ក្នុងការផ្លាស់ប្តូរទីតាំងគ្រឹះស្ថានសិក្សាថ្មី ដែលស្ថិតនៅក្បែរទីតាំងចាស់។ គម្រោងទីតាំងថ្មីនេះ នឹងត្រូវរៀបចំឱ្យមាន អគារសិក្សាស្តង់ដារ ទំនើប និងមានសុវត្ថិភាព។ រៀបចំបរិស្ថានបៃតង ដោយមានការដាំដើមឈើជាជួរ និងមានទីធ្លារធំទូលាយ ស្អាតល្អ។ ដោយឡែក ទីតាំងចាស់នឹងត្រូវរក្សាទុក សម្រាប់បម្រើជាឧត្តមប្រយោជន៍ ក្នុងទីអារាមវត្តបាកានវិញ។

ក្នុងឱកាសនោះ លោក ខូយ រីដា បានបញ្ជាក់ថា ដំណើរចុះមកនាពេលនេះ គឺធ្វើឡើងតាមសំណូមពររបស់ ព្រះតេជគុណ ឡាយ កន ព្រះគ្រូចៅអធិការវត្តបាកាន។ ព្រះអង្គមានសទ្ធាជ្រះថ្លា ដោយមានញោមរបស់ព្រះអង្គផ្ទាល់ និងសប្បុរសជនជាច្រើនទៀត មានបំណងចង់ទិញដីទីតាំងថ្មី ដែលមានទំហំរហូតដល់ទៅជាង ៥ហិកតា ដើម្បីកសាងជាគ្រឹះស្ថានសិក្សាថ្មីដ៏មានស្តង់ដារ សម្រាប់បម្រើដល់វិស័យអប់រំឱ្យកាន់តែប្រសើរឡើង។

លោកអភិបាលខេត្ត ក៏បានលើកឡើងអំពីការខិតខំប្រឹងប្រែងជំរុញ និងលើកកម្ពស់វិស័យអប់រំ ក្រោមការដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលជានិច្ចកាលតែងតែចាត់ទុកវិស័យអប់រំ ជាអាទិភាពចម្បងក្នុងការបណ្តុះបណ្តាលធនធានមនុស្ស ដើម្បីអភិវឌ្ឍប្រទេសជាតិ។

លោកបានសង្កត់ធ្ងន់ថា ខេត្តពោធិ៍សាត់មានកិច្ចការងារជាច្រើនដែលត្រូវអភិវឌ្ឍន៍។ ជោគជ័យនៃខេត្តពោធិ៍សាត់ស្អាត គ្មានសំរាម និងការរីកចម្រើនលើគ្រប់វិស័យ គឺកើតចេញពីការចូលរួមរបស់បងប្អូនប្រជាពលរដ្ឋទាំងអស់គ្នា ដែលអាចនិយាយបានថា ជាខេត្តដែលឈ្នះដាច់លើការអនុវត្តគោលនយោបាយ។

លោកអភិបាលខេត្ត បានធ្វើការអំពាវនាវដល់លោកគ្រូ អ្នកគ្រូ ទាំងអស់ថា៖ "ប្រសិនបើការផ្លាស់ប្តូរនេះ បម្រើជាឧត្តមប្រយោជន៍វែងឆ្ងាយ សម្រាប់ទីអារាមវត្តផង និងសម្រាប់សិស្សានុសិស្ស ដែលជាកូនចៅប្រជាពលរដ្ឋយើងផងនោះ សូមយើងទាំងអស់គ្នាត្រូវរួមគ្នាគាំទ្រ និងចូលរួមឱ្យបានសកម្ម។ ប៉ុន្តែទន្ទឹមនឹងនោះ បើពិនិត្យឃើញថាជាការជាន់ឈ្លី ឬមិនបំពេញតាមគម្រោងការណ៍ដែលបានគ្រោងទុក ក្នុងនាមយើងជាអ្នកការពារប្រយោជន៍រួម យើងត្រូវតែរួមគ្នាការពារឱ្យខានតែបាន"។

ក្នុងពីធីសំណេះសំណាលនោះ បានបញ្ចប់ទៅក្រោមបរិយាកាសស្និទ្ធស្នាល និងការយោគយល់គ្នាខ្ពស់ ដើម្បីបុព្វហេតុអភិវឌ្ឍន៍វិស័យអប់រំក្នុងមូលដ្ឋាន ព្រមទាំងបន្តចុះពិនិត្យដោយផ្ទាល់ នៅទីតាំងដីដែលគ្រោងធ្វើការដោះដូរផងដែរ៕