(ស្វាយរៀង)៖ លោក ឈឹម បុរស ប្រធានមន្ទីរអភិវឌ្ឍន៍ជនបទខេត្តស្វាយរៀង អមដំណើរដោយមន្ត្រីបច្ចេកទេស នាថ្ងៃទី៥ ខែឧសភា ឆ្នាំ២០២៦ បានអញ្ជើញចុះពិនិត្យវឌ្ឍនភាពការងារថែទាំ និងបញ្ចប់សុពលភាពផ្លូវក្រាល កៅស៊ូពីរជាន់ (DBST) ចំនួន ០១ខ្សែ មានប្រវែងសរុប ១២ ០១០ម៉ែត្រ និងមានទទឹង ៦ម៉ែត្រ។

ក្នុងឱកាសនោះ លោកប្រធានមន្ទីរ បានវាយតម្លៃខ្ពស់ចំពោះគុណភាពបច្ចេកទេស ដែលធានាបាននូវភាពរឹងមាំ និងសោភ័ណភាព ដើម្បីបម្រើដល់ការធ្វើដំណើររបស់បងប្អូនប្រជាពលរដ្ឋបានយូរអង្វែង។

ជាមួយគ្នានេះ បងប្អូនប្រជាពលរដ្ឋដែលរស់នៅសងខាងផ្លូវ បានសម្តែងនូវក្តីរំភើបសប្បាយរីករាយ និងត្រេកអរជាពន់ពេក ចំពោះសមិទ្ធផលផ្លូវកៅស៊ូដ៏ថ្មីស្រឡាងនេះ។ ផ្លូវនេះមិនត្រឹមតែជួយសម្រួលដល់ការធ្វើដំណើរ និងការដឹកជញ្ជូនកសិផលឱ្យកាន់តែមានភាពងាយស្រួល និងរហ័សទាន់ចិត្តប៉ុណ្ណោះទេ ប៉ុន្តែថែមទាំងបានរួមចំណែកលើកកម្ពស់កម្រិតជីវភាព និងការអភិវឌ្ឍសេដ្ឋកិច្ចនៅក្នុងមូលដ្ឋានឱ្យកាន់តែប្រសើរឡើងជាងមុនផងដែរ។

សូមបញ្ជាក់ថា ខ្សែផ្លូវ១ខ្សែនេះគឺជាសមិទ្ធផលស្ថិតក្នុង គម្រោងកែលម្អផ្លូវជនបទជំហាន៣ (RRIP-III) ដែលឆ្លងកាត់ឃុំចំនួន៣ ក្នុងស្រុកកំពង់រោទិ៍ រួមមាន៖ ឃុំព្រះពន្លា, ឃុំព្រៃធំ និងឃុំសំយ៉ោង។

ក្នុងឱកាសចុះពិនិត្យនោះ ប្រធានមន្ទីរបានវាយតម្លៃខ្ពស់ចំពោះគុណភាពបច្ចេកទេស ដែលធានាបាននូវភាពរឹងមាំ និងសោភ័ណភាព ដើម្បីបម្រើដល់ការធ្វើដំណើររបស់បងប្អូនប្រជាពលរដ្ឋបានយូរអង្វែង។

នៅថ្ងៃនេះលោក ខែក សុផាត ប្រធានការិយាល័យផ្លូវជនបទ បានដឹកនាំមន្រ្តីបច្ចេកទេស នៃមន្ទីរអភិវឌ្ឍន៍ជនបទខេត្ត ចុះពិនិត្យមើលការងារថែទាំផ្លូវប្រចាំឈ្មោះ (សង្កែ-បុសមន) ប្រវែង ៤ ៣០០ម៉ែត្រ ទទឹងខ្នងលើកម្រាលកៅស៊ូពីរជាន់ (DBST) ៧ម៉ែត្រ ស្ថិតនៅភូមិតាណែង ឃុំសង្កែ ទៅដល់ភូមិស្រម៉ ឃុំបុសមន ស្រុករំដួល ខេត្តស្វាយរៀងផងដែរ៕