(តាកែវ)៖ ថ្លែងក្នុងកិច្ចប្រជុំក្រុមប្រឹក្សាខេត្តតាកែវ នាព្រឹកថ្ងៃទី៦ ខែឧសភា ឆ្នាំ២០២៦ លោក អ៊ុំ អួក សមាជិក្រុមប្រឹក្សាខេត្តតាកែវ បានស្នើឱ្យអាជ្ញាធរ រួមនិងមន្រ្តីពាក់ព័ន្ធយកចិត្តទុកដាក់ និងចុះពិនិត្យមើលការសាងសង់រំលោភលើ ដីចំណីផ្លូវសាធារណៈរបស់រដ្ឋ ដើម្បីធានាបាននូវសុខសណ្ដាប់ធ្នាប់តាមដងផ្លូវ ពិសេសលើកកម្ពស់សោភ័ណភាពបានល្អប្រសើរបន្ថែមទៀត។

លោក អ៊ំ អ៊ួក បានបន្តថា៖ «កន្លងមកនេះយើងសង្កេតឃើញថានៅតាមដងផ្លូវ ទីប្រជុំជន ពិសេសនៅតាមផ្សារបងប្អូនអាជីវករ ប្រជាពលរដ្ឋតែងតែដាក់លក់ដូរ និងសាងសង់សំណង់តូច ធំរំលោភលើដីចំណីផ្លូវរបស់រដ្ឋដែល បានហាមឃាត់ ករណីនេះសូមអាជ្ញាធរក្រុង-ស្រុក និងមន្ត្រីជំនាញគ្រប់លំដាប់ថ្នាក់បង្កើនការចុះត្រួតពិនិត្យ និងអប់រំណែនាំដល់អាជីវករ ប្រជាពលរដ្ឋធ្វើយ៉ាងណាកុំឱ្យសាងសង់សំណង់លើដីចំណីផ្លូវបន្តទៀត»។

ឆ្លើយតបទៅនឹងការលើកឡើងរបស់សមាជិកក្រុមប្រឹក្សាខេត្ត, លោក ស៊ុត ខុន អភិបាលរងខេត្តតាកែវ បានឱ្យដឹងថា ពាក់ព័ន្ធនឹងបញ្ហាដីចំណីផ្លូវនេះអាជ្ញាធរខេត្តបាននឹងកំពុងយកចិត្តទុកដាក់ និងបានដឹកនាំជំរុញដល់ក្រុង-ស្រុក និងមន្រ្តីពាក់ព័ន្ធទាំងអស់ ចុះតាមដានត្រួតពិនិត្យជាប្រចាំ និងរៀបចំសណ្ដាប់ធ្នាប់នៅតាមផ្សារ ទីប្រជុំជននានា ពិសេសតាមផ្លូវជាតិលេខ២ និងលេខ៣ និងផ្លូវខេត្តជាដើម មិនឱ្យមានការដាក់លក់ ឬសាងសង់សំណង់ លើដីចំណីផ្លូវជាដាច់ខាត បើមានត្រូវឱ្យរុះរើចេញជាបន្ទាន់។

អភិបាលរងខេត្តតាកែវ បានបន្តថា បច្ចុប្បន្ននេះកំណាត់ផ្លូវជាតិលេខ២ ក៏ដូចជាផ្លូវមួយចំនួនក្នុងខេត្តកំពុងមានការកែលម្អ និងសាងសង់បន្ថែមជាបន្តបន្ទាប់ ដូច្នេះដើម្បីឆ្លើយតបទៅនឹងការអភិវឌ្ឍគម្រោងនេះ អាជ្ញាធរខេត្តបានណែនាំដល់អាជ្ញាធរក្រុង-ស្រុក ត្រូវរៀបចំសុខសណ្ដាប់ធ្នាប់តាមដងផ្លូវឱ្យបានល្អប្រសើរ ដោះស្រាយបញ្ហាការសង់សំណង់រំលោភលើដីចំណីផ្លូវរបស់រដ្ឋឱ្យបានឆាប់ ដើម្បីធ្វើយ៉ាងណាលើកម្ពស់សោភ័ណភាពតាមដងផ្លូវកាន់តែស្រស់ស្អាត និងកាត់បន្ថយការកកស្ទះការធ្វើចរាចរណ៍របស់ប្រជាពលរដ្ឋផងដែរ៕