(សៀមរាប)៖ មន្ទីរការងារ និងបណ្តុះបណ្តាលវិជ្ជាជីវៈខេត្តសៀមរាប សហការជាមួយរដ្ឋបាលខេត្ត នៅថ្ងៃទី០៦ ខែឧសភា ឆ្នាំ២០២៦នេះ បានប្រារព្ធពិធីអបអរសាទរ ខួបអនុស្សាវរីយ៍លើកទី១៤០ ទិវាពលកម្មអន្តរជាតិ ១ឧសភា ឆ្នាំ២០២៦ ក្រោមប្រធានបទ «រួមគ្នាកសាងភាពធន់ដើម្បីការងារសមរម្យ»។

ថ្លែងក្នុងឱកាសនោះ លោក ឌី រ៉ាដូ អភិបាលរងខេត្តសៀមរាប បានលើកឡើងថា ការប្រារព្ធទិវាពលកម្មអន្តរជាតិនេះឡើង ក្នុងគោលបំណង ដើម្បីរំលឹក និងឧទ្ទិសដឹងគុណដល់វីរៈភាពដ៏អង់អាចក្លាហាននៃកម្មករកម្មការនី ដែលបានប្រឹងប្រែងតស៊ូពុះពារ និងប្តូរជីវិត ដើមី្បសិទ្ធការងារកម្មករទាំងមូល ដើមី្បពង្រឹងរក្សាបាននូវទំនាក់ទំនងល្អរវាងកម្មករនិយោជិក ជាមួយនិយោជក និងរាជរដ្ឋាភិបាល ដើមី្បបន្តរក្សាបាននូវសន្តិភាព ស្ថិរភាពការងារ និងសន្តិសុខការងារនៅកម្ពុជា។

លោកបន្តថា ទិវាប្រចាំឆ្នាំនេះ ក្រោមប្រធានបទ «រួមគ្នា កសាងភាពធន់ដើម្បីការងារសមរម្យ» ជាការឆ្លុះបញ្ចាំងយ៉ាងច្បាស់នូវការយកចិត្តទុកដាក់ និងការប្តេជ្ញាចិត្តដ៏មុតមាំ របស់រាជរដ្ឋាភិបាលកម្ពុជា ក្នុងការលើកកម្ពស់ការអភិវឌ្ឍទីផ្សារការងារ ប្រកបដោយភាពធន់ និងចីរភាព ការកែលម្អលក្ខខណ្ឌការងារ ការធានាសិទ្ធិការងារ និងសេរីភាព អង្គការវិជ្ជាជីវៈ ការពង្រឹងប្រព័ន្ធគាំពារសង្គម និងការលើកកម្ពស់កិច្ចសន្ទនាសង្គម ក្នុងគោលដៅបម្រើឧត្តមប្រយោជន៍របស់កម្មករនិយោជិតទាំងក្នុង និងក្រៅប្រព័ន្ធ។

លោកបានបន្តថា នេះស្របតាមប្រសាសន៍ សម្តេចធិបតី ហ៊ុន ម៉ាណែត នាយករដ្ឋមន្រ្តី បានលើកឡើងថា «ការងារសមរម្យគឺជាការងារដែលប្រកបដោយសុខុមាលភាព លក្ខខណ្ឌកាន់តែប្រសើរ ផ្តល់ប្រាក់កម្រៃប្រសើរជាងមុន សម្រាប់បងប្អូនកម្មករនិយោជិត»។

លោកបញ្ជាក់ថា ខេត្តសៀមរាបមានអតីតពលករទទួលបានការងារធ្វើទាំងក្នុង និងក្រៅប្រព័ន្ធប្រមាណជិត២ ម៉ឺននាក់ រួមទាំងអ្នកមានមុខរបរ អាជីវកម្មផ្ទាល់ខ្លួន ក្នុងចំណោមអ្នកបានវិលត្រឡប់ជាង ៣ម៉ឺននាក់។ ថ្វីត្បិតតែ ខេត្តសៀមរាប មិនបានស្ថិតនៅតាមបណោយព្រំដែនក៏ពិតមែន ប៉ុន្តែយើងក៏បានទទួលរងនូវបន្ទុកយ៉ាងធ្ងន់ធ្ងរផងដែរ លើការសម្របសម្រួលដល់ជនភៀសសឹកមកពីបណ្តាលខេត្តជាប់ព្រំដែន ប្រមាណជាង១៥ម៉ឺននាក់។

លោកបន្ថែមថា បច្ចុប្បន្ននេះ ពួកគាត់បានវិលត្រឡប់ទៅវិញអស់ជាច្រើន តែនៅសល់តែប្រមាណជាង ៣ពាន់គ្រួសារ ដែលមានមនុស្សសរុបប្រមាណជាង ៩ពាន់នាក់ ដែលផ្ទះរបស់ពួកគាត់ត្រូវបានយោធាថៃឈ្លានពាន និងមួយចំនួនទៀត ស្ថិតនៅក្នុងតំបន់ក្រហម ដែលជាហេតុធ្វើឲ្យពួកគាត់មិនទាន់អាចវិលត្រឡប់ទៅវិញបាន។

លោក ឌី រ៉ាដូ ក៏បានអំពាវនាវដល់និយោជក កម្មករនិយោជិត អង្គការសហជីព អង្គការក្រៅរដ្ឋាភិបាល និងអង្គការអន្តរជាតិពាក់ព័ន្ធទាំងអស់ ត្រូវយកចិត្តទុកដាក់នូវ ការលើកទឹកចិត្តឱ្យមានការគោរពតាមស្មារតីនៃទិវា ១ឧសភា ជាបន្តទៀត ដើម្បីពិនិត្យមើលឲ្យមានភាពកាន់តែប្រសើរឡើង នៃលក្ខខណ្ឌការងារ និងវិធីសាស្រ្តអនុវត្តការងារកាន់តែល្អ និងបន្តអនុវត្តឲ្យស្របតាមលក្ខខណ្ឌការងារ និងវិធីសាស្រ្ត ដើម្បីជាផលប្រយោជន៍ទាំងនិយោជក និងកម្មករនិយោជិត ក៏ដូចជាកំណើនសេដ្ឋកិច្ចកាន់តែប្រសើរផងដែរ។

ជាមួយនេះ លោកក៏សូមនិយោជក កម្មករនិយោជិត និងសហជីព ត្រូវឈ្វែងយល់កាន់តែច្រើនពីលក្ខខណ្ឌសុវត្ថិភាពនិងសុខភាពការងារ និងថែរក្សាសុខភាព ជាពិសេសនៅក្នុងរដូវក្តៅនេះ ហើយបន្តរួមគ្នារក្សាសុខដុមនីយកម្មនៃទំនាក់ទំនងវិជ្ជាជីវៈ ដោយត្រូវចាត់ទុកសហគ្រាស គឺជា «ឆ្នាំងបាយរួម» និងជា«ផ្ទះទីពីរ» ដែលត្រូវរួមគ្នាថែរក្សាឲ្យបានគង់វង្ស មានជំនឿចិត្តលើការដឹកនាំរបស់រាជរដ្ឋាភិបាល និងជៀសវាងឲ្យឆ្ងាយពីការចាញ់បោកការញុះញង់ពីក្រុមជ្រុលនិយម ដែលព្យាយាមឆក់យកឱកាសនេះ បង្កផលប៉ះពាល់ដល់ស្ថិរភាពសង្គម ក្នុងកាលៈទេសៈដែលយើងត្រូវរួមសាមគ្គីគ្នាជាធ្លុងមួយក្នុងបុព្វហេតុការពារជាតិ៕