(កំពង់ធំ)៖ លោក នួន ផារ័ត្ន អភិបាលខេត្តកំពង់ធំ បានលើកឡើងថា រោងចក្រជាឆ្នាំងបាយរួមរបស់និយោជិត និងនិយោជក។ បងប្អូនកម្មករកម្មការិនី ត្រូវតែយកចិត្តទុកដាក់បង្កើនសមត្ថភាពរបស់ខ្លួនឲ្យបានល្អប្រសើរ ព្រមទាំងរៀនសូត្រចំណេះដឹងជំនាញបន្ថែមទៀត ដើម្បីឆ្ពោះទៅរកភាពជោគជ័យ ហើយបទពិសោធន៍ជំនាញបច្ចេកទេស ជាគុណតម្លៃស្នូលដែលមិនអាចខ្វះបាន។

លោកបានថ្លែងដូចនេះ នៅក្នុងពិធីសំណេះសំណាលជាមួយបងប្អូនកម្មករកម្មការរិនីក្រុមហ៊ុន «ស៊ី.អ.ស៊ី.ខេ.២ អភិវឌ្ឍន៍កៅស៊ូ» និងក្រុមហ៊ុន «បៀន ហៀក អិនវេសមេន» ក្នុងឱកាសអបអរសាទរខួបអនុស្សាវរីយ៍លើកទី១៤០ នៃទិវាពលកម្មអន្ដរជាតិ ១ ឧសភា ២០២៦ ក្រោមប្រធានបទ «រួមគ្នាកសាងភាពធន់ដើម្បីការងារសមរម្យ» កាលពីព្រឹកថ្ងៃទី៦ ខែឧសភា ឆ្នាំ២០២៦ នៅឃុំពពក ស្រុកស្ទោង។

លោកអភិបាលខេត្ត បានបញ្ជាក់ថា ដំណើរការវិនិយោគចំការកៅស៊ូនេះ មានការចុះអនុស្សារណៈយោគយល់គ្នារវាងក្រុមហ៊ុន និងរាជរដ្ឋាភិបាល ដែលដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ចសង្គមជាតិទាំងមូល និងផ្តល់អត្ថប្រយោជន៍ដល់បងប្អូនប្រជាពលរដ្ឋក្នុងមូលដ្ឋានផ្ទាល់ ពិសេសបានបង្កើនលំហូរសេដ្ឋកិច្ចគ្រួសារអចិន្ត្រៃយ៍ ដែលទាំងនេះសបញ្ជាក់ឲ្យឃើញពីការខិតខំប្រឹងប្រែងរបស់រាជរដ្ឋាភិបាលដែលមានសម្តេចធិបតី ហ៊ុន ម៉ាណែត ជាប្រមុខ ក្នុងការរក្សាបានសន្តិភាព ស្ថិរភាពនយោបាយ ដែលជាកត្តាសំខាន់បំផុតជំរុញដល់ការវិនិយោគរបស់ក្រុមហ៊ុន ក៏ដូចជាការផ្សារភ្ជាប់រវាងនិយោជក និងនិយោជិតប្រកបដោយសេចក្តីសុខដុមរមនា។

លោកបន្តទៀតថាថា លក្ខខណ្ឌទាំងនេះរាជរដ្ឋាភិបាល បានផ្តល់ជូននូវរបបសន្តិសុខសង្គម ដែលបានរៀបចំ គឺរបបធានារ៉ាប់រងហានិភ័យការងារ លើគ្រោះថ្នាក់កាងារ និងជំងឺវិជ្ជាជីវៈដល់សហគ្រាស គ្រឹះស្ថាន ដែលមាននយោជិត ចាប់ពីម្នាក់ ឡើងទៅត្រូវមានកាតព្វកិច្ចចុះបញ្ជីកា និងបង់វិភាគទានធានារ៉ាប់រងការងារ ដោយនយោជក ហើយមិនតម្រូវឱ្យកាត់ប្រាក់ ឈ្នួលពីនយោជិកនោះឡើយ ហើយផ្នែកធានារ៉ាប់រងថែទាំសុខភាព សំដៅលើការផ្តល់ ជូនសមាជិក បេឡាជាតិរបបសន្តិសុខសង្គម ដែលផ្តល់នូវការព្យាបាល និងថែទាំវេជ្ជសាស្ត្រ សេវាបង្កាសុខភាព និងប្រាក់បំណាច់ប្រចាំថ្ងៃដោយ មានជំងឺគ្រោះថ្នាក់ជាយថាហេតុ និងលំហែមាតុភាពផងដែរ។

លោក នួន ផារ័ត្ន បានលើកទឹកចិត្តឲ្យកម្មករកម្មការិនីទាំងអស់ ត្រូវបន្តសិក្សារៀនសូត្រ ទៅលើផ្នែកជំនាញឲ្យបានច្បាស់លាស់ ដើម្បីងាយស្រួលរកការងារធ្វើដើម្បីបានប្រាក់កម្រៃខ្ពស់ និងត្រូវចៀសឆ្ងាយពីគ្រឿងញៀន ត្រូវធ្វើយ៉ាងណាខិតខំឲ្យក្លាយជាកម្មករជំនាញ ដើម្បីក្លាយជាម្ចាស់ដោយខ្លួនឯង ការគោរពច្បាប់ចរាចរណ៍ ពិសេសទៀតត្រូវចាយវាយថវិការបស់ខ្លួនឲ្យចំគោលដៅ និងមិនត្រូវយកថវិកានោះទៅលេងល្បែងស៊ីសង ដែលនាំឲ្យខុសនឹងច្បាប់។

លោក អៀង សុភាព ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ធំ បានឲ្យដឹងថា ខេត្តកំពង់ធំ មានសហគ្រាស គ្រឹះស្ថានសរុប ៥៩៥ សហគ្រាស ដែលប្រើប្រាស់កម្លាំងកម្មករនិយោជិតសរុប ១៦.២៦៣នាក់ (ស្រី៦.២៣៥នាក់) ក្នុងនោះរួមមាន៖

*សិប្បកម្មផលិតឡឥដ្ឋ-ក្បឿង មានចំនួន ៣៦សហគ្រាស មានកម្មករ និយោជិត សរុប ១៧៤នាក់ (ស្រី៧៩នាក់)។
*វិស័យកសិឧស្សាហកម្ម មានចំនួន ២៥សហគ្រាស មានកម្មករនិយោជិត សរុប ១១,៨៩៧នាក់ (ស្រី៤,៧៧២នាក់)។ ក្នុងចំណោមវិស័យកសិឧស្សាហកម្មទាំង២៥ មានក្រុមហ៊ុនចម្ការកៅស៊ូធំៗចំនួន ១៧សហគ្រាស មានកម្មករ និយោជិតសរុប ១០.៩៥០នាក់ (ស្រី៤.១២០នាក់)។
*ក្រុមហ៊ុនចម្ការកៅស៊ូ វៀតណាម មាន ៩សហគ្រាស មានកម្មករ និយោជិតសរុប ៩.៧៣៩នាក់ (ស្រី៤.២៦៣នាក់)។

ជាមួយគ្នានេះ ប្រជាពលរដ្ឋដែលបានចូលរួមនៅក្នុងកម្មវិធី បានសំដែងការសាទររីករាយ និងថ្លែងអំណរគុណរាជរដ្ឋាភិបាលដែលបានគិតគូរយកចិត្តទុកដាក់មកលើកម្មករកម្មការិនី ឲ្យទទួលបាននូវអត្ថប្រយោជន៍ជាច្រើន៕