(រតនគិរី)៖ ក្រៅពីធ្វើស្រែចំការមានពលរដ្ឋជាច្រើនគ្រួសាររស់នៅឃុំហាត់ប៉ក់ ស្រុកវ៉ើនសៃ ខេត្តរតនគិរី បានបន្តប្រើប្រាស់ឧបករណ៍បុរាណ ក្នុងការស្វែងរកមាសតាមដងទន្លេសេសាន្តដើម្បីផ្គត់ផ្គង់គ្រួសារ។ ថ្វីត្បិតតែរ៉ែមាស មានតម្លៃប៉ុន្តែទម្រាំរែងបានរ៉ែមាស ១លី, ២លី, ១ហ៊ុន, ២ហ៊ុនពិបាកណាស់ដោយសារអ្នកភូមិប្រើឧបករណ៍បុរាណជាលក្ខណៈគ្រួសារត្រូវឈរត្រាំទឹកហាលថ្ងៃក្តៅហែង។

លោក ចាន់ ខុង មេឃុំហាត់ប៉ក់ បានប្រាប់ឲ្យដឹងនៅរសៀលថ្ងៃទី៥ ខែឧសភា ឆ្នាំ២០២៦ថា ពលរដ្ឋដែលនាំគ្នាចុះរែងរ៉ែមាសតាមដងទន្លេសេសាន្តនេះ ពួកគាត់ជាអ្នកស្រុករស់នៅកន្លែងនឹងតែម្តង មានដូចជាបងប្អូនជនជាតិភាគតិច, ជនជាតិឡាវ និងខ្មែរលាយចម្រុះគ្នា ហើយអាជ្ញាធរមូលដ្ឋានមិនបានហាមឃាត់ពួកគាត់ទេពីព្រោះជារបរចិញ្ចឹមឆ្នាំង។

លោក ចាន់ សុដន ជាជនជាតិឡាវ មានកំណើតនៅហាត់ប៉ក់ បានប្រាប់ឲ្យដឹងថា លោកបានចេះចាំពីរបៀបរែងមាសពីអ្នកចាស់ទុំក្នុងភូមិបង្រៀនគាត់ ហើយការប្រកបរបរនេះមានភាពងាយស្រួលព្រោះនៅតាមមាត់ទន្លេវាសំបូរទឹកស្រាប់ហើយពោល គឺរកបានទាំងខែវស្សា និងខែប្រាំងគ្រាន់បានតិចតួចចន្លោះពី ៥ម៉ឺន-១០ម៉ឺនរៀល ក្នុងមួយថ្ងៃប្រើប្រាស់កម្លាំងពលកម្មបងប្អូន កូនចៅផ្ទាល់តែម្តងមិនជួលគេទេ។

ចំណេកឯលោក ម៉ា ខន ជនជាតិខ្មែរប្រាប់ឲ្យដឹងថា ការងារនេះហត់ណាស់ លោក និងក្រុមគ្រួសារបានមករែងមាសនេះជាច្រើនថ្ងៃមកហើយក្នុង១ថ្ងៃ បាន១លី, ២លី ហើយថ្ងៃខ្លះបាន ១ហ៊ុន, ២ហ៊ុន។

លោកថា ឥលូវនេះប្រជាពលរដ្ឋនៅឃុំហាត់ប៉ក់ជាច្រើនគ្រួសារ បាននាំគ្នាមករែងមាសតាមដងទន្លេសេសាន្ត ដែលពួកគាត់ធ្លាប់អាស្រ័យផលជាយូរមកហើយ។

ទាក់ទិនទៅនឹងសកម្មភាពបងប្អូនប្រជាពលរដ្ឋនៅឃុំហាត់ប៉ក់ នៃស្រុកវ៉ើនសៃ កំពុងភ្លូកទឹកភ្លូកដី នាំគ្នារែងមាសតាមដងទន្លេសេសាន្តខាងលើនេះដែរ, ភ្នាក់ងារ Fresh News ប្រចាំខេត្តរតនគិរី នៅរសៀលថ្ងៃទី៦ ខែឧសភា ឆ្នាំ២០២៦ បានទំនាក់ទំនងទៅលោក សុវណ្ណ ធឹន អភិបាលស្រុកវ៉ើនសៃ និងលោក អ៊ុង ហ៊ួរ ប្រធានមន្ទីររ៉ែ និងថាមពលខេត្តរតនគិរី អំពីវិធានការទប់ស្កាត់ធនធានរ៉ែសម្បត្តិជាតិ ប៉ុន្តែមិនអាចសុំការបំភ្លឺពីលោកទាំង២នាក់នេះបានទេ៕