(ព្រំដែន)៖ ដោយគោរព និងអនុវត្តតាមបទបញ្ជាយ៉ាងម៉ឺងម៉ាត់របស់ថ្នាក់ដឹកនាំក្រសួងការពារជាតិ ក៏ដូចជាដើម្បីពង្រឹងស្មារតី និងពិនិត្យការត្រៀមលក្ខណៈសម្ភារៈបច្ចេកទេស នៅថ្ងៃទី៦ ខែឧសភា ឆ្នាំ២០២៦នេះ ឧត្តមសេនីយ៍ទោ ហ៊ុល សំអុន មេបញ្ជាការកងពលតូចដឹកជញ្ជូនលេខ៩៩ បានដឹកនាំក្រុមការងារចុះពិនិត្យស្ថានភាពរស់នៅ និងការបំពេញការងារជាក់ស្តែង របស់នាយទាហាន នាយទាហានរង និងពលទាហាន ដែលកំពុងប្រចាំការនៅសមរភូមិមុខ តាមបន្ទាត់ព្រំដែនកម្ពុជា-ថៃ។

ក្នុងឱកាសនៃការអញ្ជើញចុះពិនិត្យស្ថានភាពដោយផ្ទាល់ ឧត្តមសេនីយ៍ទោ ហ៊ុល សំអុន បានថ្លែងទៅកាន់កងទ័ពថា ក្នុងនាមជាកងទ័ពដឹកជញ្ជូន៖ «យើងគឺជា សរសៃឈាម នៃសមរភូមិ ទោះស្ថិតក្នុងស្ថានភាពបែបណាក៏ដោយ យើងត្រៀមខ្លួនជានិច្ចដើម្បីបម្រើជាតិ និងប្រជាជន ត្រូវមានកម្លាំងមុះមុត ស្មារតីរឹងមាំ។ ត្រូវត្រៀមលក្ខណៈសម្ភារៈបច្ចេកទេសពិនិត្យមធ្យោបាយដឹកជញ្ជូន និងគ្រឿងបំពាក់ ដើម្បីធានាបាននូវប្រសិទ្ធភាពខ្ពស់ក្នុងការចល័តទ័ព និងស្បៀងអាហារ មិនថាផ្លូវលំបាក ឬស្ថិតក្នុងស្ថានភាពបែបណា កងទ័ពដឹកជញ្ជូនត្រូវតែបន្តបេសកកម្មដោយមោះមុត»។

មេបញ្ជាការកងពលតូចដឹកជញ្ជូនលេខ៩៩ ក៏បានក្រើនរំលឹកដល់កងទ័ពយើងទាំងអស់គ្នាត្រូវ​បន្តរក្សានូវស្មារតីសាមគ្គីភាពផ្ទៃក្នុងឱ្យបានល្អ រួមសុខរួមទុក្ខជាមួយគ្នា។​ ត្រូវយកចិត្តទុកដាក់ថែទាំមធ្យោបាយដឹកជញ្ជូន និងសម្ភារៈដែលអង្គភាពប្រគល់ជូនឱ្យបានដូចជាការថែរក្សាទ្រព្យសម្បត្តិផ្ទាល់ខ្លួន និងបន្តលើកកម្ពស់ស្មារតីប្រុងប្រយ័ត្នខ្ពស់ ក្នុងការការពារបូរណភាពទឹកដី និងបម្រើប្រជាជននៅតាមតំបន់ព្រំដែន។

ឆ្លងតាមសកម្មភាពចុះពិនិត្យនេះ បានធ្វើឱ្យនាយទាហាន នាយទាហានរង និងពលទាហានទាំងអស់ មានក្តីរំភើប និងមានកម្លាំងចិត្តកាន់តែខ្លាំងក្នុងការបំពេញភារកិច្ច។ ទន្ទឹមនឹងនោះ រាល់បញ្ហាបច្ចេកទេស និងតម្រូវការចាំបាច់ត្រូវបានដោះស្រាយជាជំហានៗ ដើម្បីធានាបាននូវប្រសិទ្ធភាពការងារដឹកជញ្ជូននៅសមរភូមិជួរមុខ។

ជាមួយគ្នានោះដែរ មេបញ្ជាការក៏បាននាំយកស្បៀងអាហារ ភេសជ្ជៈ គ្រឿងឧបភោគបរិភោគ និងថវិកាមួយចំនួនឧបត្ថម្ភជូនកងទ័ពយើងដែលកំពុងប្រចាំការនៅសមរភូមិមុខ ដើម្បីជួយសម្រួលដល់ការរស់នៅក៏ដូចជាការលើកទឹកចិត្តដល់ការលះបង់របស់យុទ្ធជនដើម្បីបុព្វហេតុជាតិមសតុភូមិ៕