(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានថ្លែងថា លោកនឹងផ្ដល់ប័ណ្ណលើកលែងការបង់ថ្លៃសេវាជូន ក្រុមទ្រទ្រង់សុខភាពភូមិ នៅពេលដែលគាត់មកទទួលសេវាពិនិត្យ ព្យាបាលនៅមូលដ្ឋានសុខាភិបាលសាធារណ:ទាំងអស់ក្នុងខេត្តព្រះវិហារ។

ការថ្លែងរបស់លោកវេជ្ជបណ្ឌិត គួង ឡូ បានធ្វើឡើងក្នុងឱកាសដែលលោកអញ្ជើញចូលរួមដឹកនាំកិច្ចប្រជុំពិនិត្យសមិទ្ធិផលប្រចាំត្រីមាសទី១ របស់ការិយាល័យស្រុកប្រតិបត្តិត្បែងមានជ័យ នៅក្នុងមណ្ឌលសុខភាពស្អាង ដែលមានសមាជិកសមាជិការចូលរួមសរុបចំនួន ៩១នាក់ ក្នុងនោះមានក្រុមទ្រទ្រង់សុខភាពភូមិចំនួន ១៧នាក់ ដែលអញ្ជើញមកពីភូមិនានា ក្នុងឃុំទាំង៣ ក្នុងតំបន់គ្របដណ្តប់របស់មណ្ឌលសុខភាពស្អាង ស្ថិតក្នុងឃុំស្អាង ស្រុកជ័យសែន ខេត្តព្រះវិហារ នាថ្ងៃទី៤ ខែឧសភា ឆ្នាំ២០២៦។

នៅក្នុងឱកាសនោះលោកវេជ្ជបណ្ឌិត គួង ឡូ បានថ្លែងអំណរគុណ និងកោតសរសើរដល់ក្រុមទ្រទ្រង់សុខភាពទាំងអស់ដែលបានចូលរួមចំណែកក្នុងការធ្វើឲ្យសុខភាពប្រជាជនល្អប្រសើរ និងបានជម្រាបប្រាប់គាត់ថា មន្ទីរសុខាភិបាលនឹងផ្ដល់ប័ណ្ណលើកលែងការបង់ថ្លៃសេវាជូនគាត់នៅពេលគាត់មកទទួលសេវានៅមូលដ្នានសុខាភិបាលសាធារណៈទាំងអស់ក្នុងខេត្តព្រះវិហារ និងស្នើសុំឲ្យគាត់កាន់តែចូលរួមបន្ថែមទៀត ដើម្បីឲ្យសុខភាពប្រជាពលរដ្ឋកាន់តែល្អប្រសើរ។

លោកប្រធានមន្ទីរសុខាភិបាលខេត្តព្រះវិហារ បានជម្រាបពួកគាត់បន្ថែមទៀតថា ពួកគាត់បានដើរតួរយ៉ាងសំខាន់ក្នុងការផ្ដល់នូវសេវាសុខភាពបឋមជូនដល់ប្រជាពលរដ្ឋក្នុងសហគមន៏របស់ពួកគាត់។ពួកគាត់ ទាំង១៧នាក់ដែលបានចូលរួម បានបង្ហាញនូវ អារម្មណ៍សប្បាយរីករាយ និងបានសន្យាថាពួកគាត់នឹងខិតខំបំពេញការងារឲ្យបានល្អក្នុងនាមក្រុមការងារជួយសុខភាពប្រជាពលរដ្ឋនៅក្នុងសហគមន៏របស់ពួកគាត់ និងខិតខំអនុវត្តតាមការណែនាំរបស់មន្រ្តីមណ្ឌលសុខភាព ក៏ដូចជាការណែនាំរបស់មន្ទីរសុខាភិបាល ដើម្បីរួមចំណែកលើកកម្ពស់សុខភាពប្រជាពលរដ្ឋ៕