(ភ្នំពេញ)៖ អ្នកឧកញ៉ា សុខ សំណាង និងលោកជំទាវ​ ស៊ីម​ សុនិមល នៅថ្ងៃទី៦ ខែឧសភា ឆ្នាំ២០២៦ បាននាំយកនូវថវិកា ចំនួន ១០០,០០០ដុល្លារអាមេរិក ជូនកាកបាទក្រហមកម្ពុជា ក្នុងឱកាសខួបទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌ »។

ពិធីប្រគល់ និងទទួលនេះ មានការអញ្ជើញជាអធិបតីភាពរបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អនុប្រធានអចិន្ត្រៃយ៍ កាកបាទក្រហមកម្ពុជា និងមានការចូលរួមពីថ្នាក់ដឹកនាំកាកបាទក្រហមកម្ពុជា និងសប្បុរសជនជាច្រើនរូបទៀត។

គិតចាប់ពីឆ្នាំ២០១២មក ក្រុមហ៊ុនភេសជ្ជៈប៉ូវកម្លាំងបាកាស បានឧបត្ថម្ភដល់កាកបាទក្រហមកម្ពុជាជាប់ជានិច្ច។ ស្ថិតក្នុងឱកាសសំណេះសំណាលនេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានពាំនាំនូវព្រះរាជសវណីរបស់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស និងប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅចំពោះក្រុមហ៊ុន ភេសជ្ជៈប៉ូវកម្លាំងបាកាស (Bacchus) ក៏ដូចជាសប្បុរសជនគ្រប់មជ្ឈដ្ឋាន ដែលតែងតែបានចូលរួមបរិច្ចាគថវិកា សម្ភារ ជូនកាកបាទក្រហមកម្ពុជា ដោយសទ្ធាជ្រះថ្លា និងតាមការស្ម័គ្រចិត្ត ដែលនេះគឺពិតជាមានគុណតម្លៃណាស់ក្នុងការលើកកម្ពស់ស្មារតីវប្បធម៌នៃការចែករំលែក និងជាការផ្សារភ្ជាប់រវាងសប្បុរសជនជាមួយអ្នកទទួលផលរបស់កាកបាទក្រហមកម្ពុជា។

ជាមួយគ្នានេះលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក៏បានបញ្ជាក់អំពីសកម្មភាពរបស់កាកបាទក្រហមកម្ពុជា ដែលបានជួយដល់គ្រួសារយុទ្ធជនពលី យុទ្ធជនរបួសទាំងឡាយ ជនរងគ្រោះដោយសារមីន ប្រជាជនភៀសខ្លួន ប្រជាជនងាយរងគ្រោះ និងរងគ្រោះដោយគ្រោះមហន្តរាយនានា អង្គការសមាគមជនមានពិការភាព កុមារ ជាដើមឡើយ។

លោកជំទាវបណ្ឌិត បន្តថាគិតត្រឹមម៉ោង៨យប់ ថ្ងៃទី៥ ខែឧសភា ឆ្នាំ២០២៦ កាកបាទក្រហមកម្ពុជាទទួលបានថវិការឧបត្ថម្ភពីសប្បុរសជនគ្រប់ជម្ឈដ្ឋានសរុបជិត​ ៩,០០០,០០០ លានដុល្លារអាមេរិក។ ថវិកាដែលទទួលបាននេះ គឺបង្ហាញអំពីការគាំទ្រ សេចក្តីក្តីស្រឡាញ់ និងការជឿជាក់មកលើកាកបាទក្រហមកម្ពុជា ហើយដោយសារថវិកាពីសប្បុរសជន ក៏ដូចជាក្រុមហ៊ុន ភេសជ្ជៈប៉ូវកម្លាំងបាកាសនេះហើយ ដែលធ្វើឱ្យកាកបាទក្រហមកម្ពុជា តែងតែមានមុខភ្លាមៗជួយដល់បងប្អូនប្រជាពលរដ្ឋងាយរងគ្រោះទាំងអស់។

លោកជំទាវបណ្ឌិតបានបន្ថែមទៀតថា បើទោះបីថវិកាដែលទទួលបាននាពេលនេះ មានចំនួនតិចជាងកាលពីឆ្នាំមុនក៏ដោយ ក៏បង្ហាញឱ្យឃើញថាមានចំនួនច្រើនជាងការដែលកាកបាទក្រហមកម្ពុជាបានរំពឹងទុកកាលពីដើមឆ្នាំ និងសង្ឃឹមថាសង្ឃឹមជឿជាក់ថាតាមរយៈសកម្មភាពដែលនៅបន្តហូរហែជាបន្តបន្ទាប់ សប្បុរសជនគ្រប់មជ្ឈដ្ឋាននឹងនៅមានការចូលរួមជួយគាំទ្របន្ថែមទៀតដល់កាកបាទក្រហមកម្ពុជា ហើយថវិកានឹងមានការកើនឡើងថែមទៀតផងដែរ៕