(ភ្នំពេញ)៖ រដ្ឋសភាកម្ពុជា នៅថ្ងៃទី០៦ ខែឧសភា ឆ្នាំ២០២៦នេះ បានចេញសេចក្តីថ្លែងការណ៍សម្តែងនូវការគាំទ្រយ៉ាងពេញទំហឹង ចំពោះការសម្រេចចិត្ត របស់រាជរដ្ឋាភិបាលកម្ពុជា ក្នុងការផ្តួចផ្តើមយន្តការនៃការផ្សះផ្សារដោយចាប់បង្ខំ ក្រោមអនុសញ្ញាអង្គការ សហប្រជាជាតិស្តីពីច្បាប់សមុទ្រ (UNCLOS) ដើម្បីដោះស្រាយដោយសន្តិវិធីលើបញ្ហាតំបន់ ទាមទារដែនសមុទ្រត្រួតគ្នា (Overlapping Claims Area - OCA) រវាងកម្ពុជា-ថៃ បន្ទាប់ពីភាគីថៃបាន ប្រកាសដកខ្លួនជាឯកតោភាគី ចេញពីអនុស្សរណៈនៃការយោគយល់គ្នាឆ្នាំ២០០១ (MOU 2001) នាពេល ថ្មីៗនេះ។

យោងតាមសេចក្តីថ្លែងការណ៍ រដ្ឋសភាកម្ពុជា បានសម្តែងការសោកស្តាយយ៉ាងខ្លាំង ចំពោះការសម្រេចចិត្តលុបចោលអនុស្សរណៈនៃការ យោគយល់គ្នាឆ្នាំ២០០១ (MOU 2001) ជាឯកតោភាគីពីសំណាក់ភាគីថៃ។ ក្នុងនាមជាប្រទេសដែលប្រកាន់ ខ្ជាប់នូវការគោរពច្បាប់អន្តរជាតិ និងគោលការណ៍ដោះស្រាយជម្លោះដោយសន្តិវិធី កម្ពុជាពុំមានជម្រើសអ្វី ផ្សេងក្រៅពីការយកច្បាប់អន្តរជាតិ និងអនុសញ្ញាអង្គការសហប្រជាជាតិ ស្តីពីនីតិសមុទ្រ (UNCLOS) មកធ្វើជា មូលដ្ឋាន ជាពិសេសយន្តការផ្សះផ្សាដោយចាប់បង្ខំ ដែលមានចែងច្បាស់នៅក្នុងអនុសញ្ញានេះ។

រដ្ឋសភាបានលើកឡើងថា កម្ពុជាបានធ្វើដំណើរក្រោមមាគ៌ាដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី និងបន្តមកដល់រាជរដ្ឋាភិបាលនីតិកាលទី៧ ដឹកនាំដោយ សម្តេចមហា បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយបានរក្សាជំហរច្បាស់លាស់ ប្រែប្រួលលើខ្លឹមសារ និងយន្តការចរចាដោយសន្តិវិធី ស្របតាមច្បាប់អន្តរជាតិ។ ក្នុងរយៈពេលជាង ២៥ ឆ្នាំ កន្លងមកនេះ MOU-2001 បានដើរតួនាទីជាក្របខណ្ឌទ្វេភាគីជាសារវន្តតែមួយគត់ ដែលកម្ពុជានិងថៃបានឯក ភាពគ្នា ដើម្បីដោះស្រាយបញ្ហាតំបន់ទាមទារដែនសមុទ្រត្រួតគ្នា។ យន្តការនេះ គឺជាសក្ខីភាពនៃស្មារតីសហ ប្រតិបត្តិការ និងសុច្ឆន្ទៈពិតប្រាកដរវាងប្រទេសទាំងពីរ ដែលគ្មានយន្តការទ្វេភាគីដទៃណាមួយ អាចមក ជំនួសបានឡើយ។

រដ្ឋសភាកម្ពុជា បានបញ្ជាក់សារជាថ្មីម្តងទៀត នូវការគាំទ្រយ៉ាងពេញទំហឹង ចំពោះការសម្រេចចិត្ត របស់រាជរដ្ឋាភិបាលកម្ពុជា ក្នុងការប្រើប្រាស់យន្តការផ្សះផ្សាដោយបង្ខំនេះ និងការប្តេជ្ញា ចិត្តឥតងាករេ ចំពោះច្បាប់អន្តរជាតិ និងសន្តិភាពតំបន់៕